A parofisaitaki tu ena iVolatabu nira na basika mai vei ira na lotu vaKarisito taumada na qasenivuli lasu ni mate oti o Jisu, era na vakasesea na ka dina vakaivolatabu. (Cakacaka 20:29, 30) A qai yaco dina qori. Era bosoka vata na ivakavuvuli i Jisu kei na vakasama ni lotu butobuto, qai basika kina na lotu vaKarisito lasu. (2 Timoci 4:3, 4) E rawa vakacava me keimami kila ni sa donu tiko na ka keimami vulica ena iVolatabu?

A vakatakila o Jiova na ka dina. A tukuna tu mai o Jiova ni na ‘vakalevutaki na kilaka dodonu ena gauna ni icavacava.’ (Taniela 12:4) Ena yabaki 1870, era raica rawa e dua na ilawalawa lailai dau vakasaqara na ka dina, ni levu na ivakavuvuli vakalotu e sega ni yavutaki ena iVolatabu. Era mani vakasaqara mera kila na ivakavuvuli taumada ni iVolatabu, qai vakalougatataki ira o Jiova mera kila na iVolatabu.

Era vulica vagumatua na iVolatabu na tagane yalomalumalumu. O ira na tagane gugumatua era vakatokai mera Gonevuli ni iVolatabu, na yaca keimami se kilai kina ena gauna ya, era tauyavutaka e dua na ivakarau ni vuli keimami se vakayacora tiko ga nikua. Era veivosakitaka yadua sara ga na usutu ni iVolatabu. Nira sega ni kila na ibalebale ni dua na tikinivolatabu, era vaqara eso tale na tikinivolatabu me vakamatatataka vei ira. Nira raica e dua na vakasama e duavata kei na veitikinivolatabu tale eso, era na vola sara. Nira vakalaiva me vakamacala ga na iVolatabu, era mani kunea tale kina na ka dina me baleta na yaca ni Kalou, nona Matanitu, nona inaki me baleta na kawatamata kei na vuravura, kedra ituvaki na mate kei na inuinui ni veivakaturi. Na nodra vakasaqaqara e sereki ira mai na levu na ivakavuvuli lasu kei na kena ivalavala.​—Joni 8:31, 32.

Era raica rawa na Gonevuli ni iVolatabu ena 1879, ni sa kena gauna me vakatakilai raraba na ka dina. Ena yabaki gona ya era tekivu tabaka kina na mekesini keimami se tabaka tiko ga nikua, Na Vale ni Vakatawa Kacivaka na Matanitu i Jiova. Nikua keimami sa wasea tiko na ka dina vakaivolatabu ena 240 na vanua ena sivia na 750 na vosa. Sa qai vakadua me vakalevutaki na kilaka dina nikua!

• Na cava e yaco ina ka dina vakaivolatabu ni mate oti o Jisu?

• E rawa vakacava me keimami kila tale na ka dina ena Vosa ni Kalou?

Sa vicasagavulu na yabaki na neimami vakayagataka, tabaka, qai veisoliyaka na iVakadinadina i Jiova e levu na itabataba ni iVolatabu. Ia keimami raica ni gadrevi me vakarautaki e dua na ivakadewa vou ni iVolatabu me vukei ira na lewenivanua mera kila “na ka dina,” ni qori na inaki ni Kalou vei keda kece. (1 Timoci 2:3, 4) Oya na vuna e sevutaki kina ena 1950 e vica na iwase ni iVolatabu vou na New World Translation (iVakadewa ni Vuravura Vou) e vakadewataki ena vosa ni gauna qo. Sa vakadewataki donu na iVolatabu qori ena sivia na 130 na vosa.

Bibi me dua na iVolatabu e kilai rawarawa. E dau veiveisau na vosa ni toso na gauna, e levu tale ga na ivakadewa ni iVolatabu e dau vakayagataka eso na vosa e sega ni matata qai dredre me kilai. Sa kune tale ga e levu na ivolavivigi makawa era muria vakavoleka sara na ivakadewa taumada ni iVolatabu, e kilai vinaka kina na iVolatabu vakaIperiu, vakaArame, kei na vaKirisi.

Bibi me dua na vakadewa e tukuna dina na Vosa ni Kalou. Mera kua ni veisautaka na dauvakadewa iVolatabu na vosa uqeti ni Kalou, e dodonu ga mera muria vinaka na kena ilavelave taumada. Ia e levu na ivakadewa ni iVolatabu era sega ni vakayagataka na yaca ni Kalou o Jiova.

Bibi me dua na iVolatabu e vakacaucautaki koya e vakavuna na kena volai. (2 Samuela 23:2) Na iVakadewa ni Vuravura Vou e vakalesuya tale vaka7,000 na yaca i Jiova ena vanua ga a volai kina ena ivolavivigi makawa ni iVolatabu, me vaka e laurai ena itaba e toka e ra. (Same 83:18) Ena vuku ni vakadidike vagumatua a caka ena loma ni vica na yabaki, e tabaki rawa kina e dua na iVolatabu e marautaki nida wilika qai vakatakila na rai ni Kalou. Ke sa tabaki se sega ena nomu vosa na New World Translation, o uqeti mo dau wilika e veisiga na Vosa i Jiova.​—Josua 1:8; Same 1:2, 3.

• Na cava keimami vakatulewataka kina me dua na vakadewa vou ni iVolatabu?

• Na cava me cakava e veisiga e dua e via vulica na loma ni Kalou?