iDusidusi ni iVola ni Soqoni ni Bula vaKarisito kei na Cakacaka Vakaitalatala
ME 2-8
IYAU MAI NA VOSA NI KALOU | 1 SAMUELA 27-29
“Ka e Cakava o Tevita ni Lako ena iValu”
it-1 41
Akisi
Ni drovaki Saula tiko o Tevita, e rua na gauna e lai vakaruru kina ena vanua nei Tui Akisi. Na kena imatai, oya ni nanumi ni kedra meca, e vakalecaleca o Tevita ni leqa na nona vakasama qai vakatalai koya o Akisi me vaka na lialia. (1Sa 21:10-15; Sm 34:Ulu ni Same; 56:Ulu ni Same) Ni lako tale yani o Tevita ena ikarua ni gauna, era tomani koya e 600 na tamataivalu kei na nodra vuvale, e tukuna o Akisi mera tiko ga e Sikilaki. Nira tiko e kea ena dua na yabaki va na vula, e nanuma sara ga o Akisi ni ravuravu tiko o Tevita ena veikoro e Juta. Ia na kena dina ni a ravuti ira tiko na Kesuri, ira na Kiseri, kei ira na Amalekaiti. (1Sa 27:1-12) E mana nona vakalecaleca o Tevita mani lesi koya o Akisi me nona yadra nira vakarau ravuti Tui Saula tiko na kai Filisitia. Ni sa vakarau tu na ka kece, sa qai vakasukai Tevita kei ira na nona tamata o Akisi mera lesu i Sikilaki nira uqeti koya kina na “nodra turaga” na kai Filisitia. (1Sa 28:2; 29:1-11) Ni sa tui o Tevita qai valuti Kaca, e rairai sega ni vakamatei Akisi. A bula tiko donuya na gauna e veiliutaki kina o Solomoni.—1Tu 2:39-41; raica GATH.
it-2 245 ¶6
Lasu
E vakacala sara ga na iVolatabu na lasu, sega ni kena ibalebale qo ni dodonu me tukuni na itukutuku dina kece vei ira na sega ni dodonu mera kila. E veivakasalataki o Jisu Karisito: “Dou kua ni solia na ka tabu vei ira na koli, se kolotaka na nomudou mataniciva e matadra na vuaka, de ra buturaka ra qai vuki tale mai mera basuraki kemudou.” (Mac 7:6) Qori na vuna e sega ni dau tukuna kina o Jisu na itukutuku kece, se sauma vakadodonu na taro ena so na gauna ni rawa ni vakavu leqa. (Mac 15:1-6; 21:23-27; Jn 7:3-10) Qori tale ga na ka e cakava o Eparama, Aisake, Reapi, kei Ilaisa ni ratou sega ni tukuna na itukutuku kece vei ira na sega ni qaravi Jiova.—Vte 12:10-19; wase 20; 26:1-10; Jos 2:1-6; Jem 2:25; 2Tu 6:11-23.
Vakekeli ena Vosa ni Kalou
E Rawa Nira Veivuke na Mate?
Vakasamataka mada. E tukuna na iVolatabu ni dua e mate “sa lesu o koya ina qele,” sa “takali” [tale ga] “nona vakanananu.” (Same 146:4) Rau kila vinaka o Saula kei Samuela ni sega ni vakadonuya o Jiova na vakacuru. Ena dua na gauna sa oti, e vakaitavi sara ga o Saula ena nodra kau tani na dauvakatevoro ena vanua!—Vunau ni Soro 19:31.
Vakasamataka na tikina qo. Ke bula tiko na yalo i Samuela, vakacava ena beca na lawa ni Kalou me tokona e dua na dauvakacuru me rawa ni sotavi Saula? A sega ni via vosa o Jiova vei Saula. Vakacava e rawa ni dua na dauvakacuru e vakaukauataka na Kalou Cecere Duadua me vosa vei Saula ni vakayagataki Samuela? Sega. E matata ni sega sara ga ni o “Samuela” qori, na parofita yalodina ni Kalou. E dua ga na kabula vakayalo se timoni e vakalecaleca tiko mai me nanumi ni o Samuela.
ME 16-22
Vakekeli ena Vosa ni Kalou
it-1 369 ¶2
Taciqu
E vakayagataki na vosa “taciqu” vei ira e duavata na nodra sasaga kei na nodra inaki. Kena ivakaraitaki, o Tui Airami e Taia e kacivi Tui Solomoni me tacina. E sega ni baleta ga ni tautauvata nodrau itutu, e tautauvata tale ga na ka erau cakava ni rau vakarautaka na kau kei na so tale na ka me baleta na valenisoro. (1Tu 9:13; 5:1-12) “Raica! Sa dua na ka vinaka qai marautaki nira tiko ena duavata na veitacini!” Na ka e vola o Tevita e dusia nira sega ni veiyaloni ga se duavata o ira na veitacini vakadra. (Same 133:1) Koya gona, nona kacivi Jonacani o Tevita me tacina e yavutaki sara ga ena nona lomani koya, e tautauvata tale ga na ka erau taleitaka, ia erau sega ni veiwekani. (2Sa 1:26) E donu vinaka nira vakatokai mera veitacini na veitokani e tautauvata na ka era taleitaka kei na nodra rai, ke ca mada ga.—Vvb 18:9.
ME 30–JUNE 5
Vakekeli ena Vosa ni Kalou
it-2 206 ¶2
iCavacava ni Veisiga
Parofisai nei Pelami. Ni bera nira butuka na Isireli na Vanua Yalataki, e tukuna na parofita o Pelami vei Tui Pelaki e Moapi: “Mai, meu vakasalataki iko mada ena ka era na cakava na tamata qo [ira na Isireli] vei ira na nomu tamata ena icavacava ni veisiga. . . . Ena cadra mai vei Jekope e dua na kalokalo, ena tubu mai vei Isireli e dua na ititoko vakatui. Ena vorolaka sara ga o koya na yadre i Moapi kei na nodra qavokavoka kece na luve ni tiko yavavala.” (Tvl 24:14-17) Na kena vakayacori taumada na parofisai qori, na “kalokalo” ya o Tui Tevita, ni vakadrukai ira na kai Moapi. (2Sa 8:2) E macala gona, na kena vakayacori na parofisai qo, e tekivu na “icavacava ni veisiga” ena gauna e veiliutaki kina vakatui o Tevita. Ni vakatayaloyalotaki Jisu na Tui vakaMesaia o Tevita, ena vakayacori tale ga na parofisai qo ena gauna i Jisu ni vakamalumalumutaki ira na kena meca.—Ais 9:7; Same 2:8, 9.
JUNE 6-12
Vakekeli ena Vosa ni Kalou
it-1 266
Kumi
Levu na lewenivanua ena Tokalau wili kina o ira na Isireli era dau mareqeta na kumidra mera dokai kina. E tukuni ena lawa ni Kalou vei ira na Isireli mera kua ni kotiva na ‘drau ni ulu e babadra,’ ya ena maliwa ni daligadra kei na matadra, kei na tutu ni kumidra. (Vns 19:27; 21:5) Sa rauta baleta nira dau kotiva na kumidra eso na lotu butobuto.
JUNE 13-19
Vakekeli ena Vosa ni Kalou
it-1 590 ¶1
Tevita
E rai tiko o Jiova qai vakaraitaka na nodrau ivalavala vakamadua. Ke vakadonuya o Jiova mera rogoca na turaganilewa era vakarurugi ena Lawa i Mosese na kisi me baleti Tevita kei Pacisepa, a rawa sara ga ni rau vakamatei ena nodrau ivalavala ca, ena mate vata kei tinana na gone e kunekunetaki ena vuku ni nodrau veibutakoci. (Vkr 5:18; 22:22) Ia o Jiova sara ga e vakatulewa ena kisi qori qai vakaraitaka vei Tevita nona yalololoma ena vuku ni veiyalayalati ni Matanitu (2Sa 7:11-16), sa rauta me cakava qori o Jiova baleta ni dau yalololoma o Tevita (1Sa 24:4-7; vakatauvatana Jem 2:13), e veivutunitaka tale ga na nona ivalavala ca. (Sm 51:1-4) Ia erau sega ni galala mai na itotogi kece. E tukuna o Jiova ena gusu i Necani: “Au na vakatubura na ca mai na nomu vuvale.”—2Sa 12:1-12.
JUNE 20-26
IYAU MAI NA VOSA NI KALOU | 2 SAMUELA 13-14
“E Vakaleqai Aminoni Nona Nanumi Koya Ga”
it-1 32
Apisalome
Vakamatei o Aminoni. E goneyalewa rairai totoka o Tema na ganei Apisalome. E taleitaki koya vakalevu o Aminoni, na ganena vakacabecabe e qase. E tauvimate vakalasulasu o Aminoni, e talatala sara me lako mai o Tema ina nona vale me vakasaqara na kena, mani vesuki koya qai kucuva. Oti qori sa veisau nona taleitaki Tema o Aminoni me sevaki koya vakalevu qai vakatalai koya. E dresulaka o Tema na nona isulu balavu totoka era dau dara na luvenitui era se goneyalewa qai biuta e uluna na dravusa, oti rau sota kei Apisalome. E kila sara na ka e yaco qai kasamitaki Aminoni, ni sa kila tiko nona dau vinakati Tema. E vakasalataki ganena me kua ni tukuna e dua na ka, mani kauti koya me lai tiko ena nona vale.—2Sa 13:1-20.
it-1 33 ¶1
Apisalome
Sa oti e rua na yabaki, sa gauna tale ga ni koti sipi. E gauna marautaki qori mani tuvanaka o Apisalome e dua na kanavata e Pealiasori, rauta ni 22 na kilomita (14 na maile) ena vualiku kei Jerusalemi. E sureti ira kece na luvena tagane na tui, vaka kina o Tevita. E vakasuka o tamana na veisureti, e cikevi koya o Apisalome me talai Aminoni yani na nona ulumatua me kena isosomi. (Vvb 10:18) E “marau na loma i Aminoni ena waini” ena gauna ni soqo, e qai vakaroti ira na nona dauveiqaravi o Apisalome mera vakamatei koya. Era dui dro na luvena tagane na tui mera lesu i Jerusalemi. E mani dro o Apisalome vei tukana na turaga ni Siria ena matanitu o Kesuri ena Tokalau ni Wasa o Kalili. (2Sa 13:23-38) Na “iseleiwau” a tukuna na parofita o Necani sa tiko sara ga ena “vuvale” i Tevita, ena tiko ga e kea ena vo ni nona bula.—2Sa 12:10.
Vakekeli ena Vosa ni Kalou
g04 12/22 8-9
Na Rairai Totoka e Bibi Duadua
Meda dikeva mada e dua na luvei Tevita o Apisalome. E tagane totoka ia e sega ni yalovinaka. E kaya na iVolatabu me baleti koya: “E sega ni dua e Isireli taucoko me qoroi vakalevu na kena totoka me vakataki Apisalome. E sega ni dua na ka e vakamelei rawa mai na qeteqeteniyavana ina buradelana.” (2 Samuela 14:25) Ena nona vinakata me rogo, e talaidredre kina vei tamana, e saga tale ga me kovea na veiliutaki. E moceri ira mada ga na wati tamana lalai. Na kena itinitini e cudruvi Apisalome na Kalou, mani mate vakaloloma.—2 Samuela 15:10-14; 16:13-22; 17:14; 18:9, 15.
Vakacava o taleitaki Apisalome? Sega. E sevaki na ka kece me baleti koya. Na kena totoka e sega ni vakabulai koya, baleta ni dokadoka, e sega ni yalodina. Ia e tu ena iVolatabu na nodra ivakaraitaki e levu era yalomatua, era taleitaki, e sega ga ni tukuni na kedra irairai. Na ka ga e bibi na irairai e loma.
JUNE 27–JULAI 3
IYAU MAI NA VOSA NI KALOU | 2 SAMUELA 15-17
“E Talaidredre o Apisalome ni Dokadoka”
it-1 860
Tagane mera liu
Dau kena ivakarau ena Tokalau e Loma mera lesi eso mera cici e liu qai muri yani na qiqi ni tui mera vakarautaka se kacivaka na nona lako yani, mera vukei koya tale ga. (1Sa 8:11) Erau muria na ivakarau qori o Apisalome kei Atonaija me rau dokai kina, rau vakaraitaka tale ga nodrau talaidredre ni rau lesia e 50 na tagane mera cici e liu qai muri yani na nodrau qiqi.—2Sa 15:1; 1Tu 1:5; raica RUNNERS.
it-1 1083-1084
Epironi
Oti e vica na yabaki, sa qai lesu i Epironi o Apisalome na luvei Tevita, mani tuvanaka lo me kovea na veiliutaki nei tamana. (2Sa 15:7-10) E rairai vanua rogo o Epironi ni a koroturaga kei Juta ena dua na gauna, e nona koro tale ga o Apisalome, mani nanuma me tekivu mai kea na nona sasaga. Dua na gauna e muri, e qai taravaki Epironi tale na makubui Tevita o Tui Riopoami. (2Ve 11:5-10) Nira vakalalai Juta oti na kai Papiloni, era suka tale i kea na Jiu era kau vakavesu, eso gona vei ira era lai tiko e Epironi (Kiriaciaripa).—Nie 11:25.