RA TAROGA NA ITABAGONE

E Dodonu me Levu Nomu iTokani ena Sala ni Veikilai ena Internet?

E kaya o Elaine: “Niu raici ira keimami vuli vata ni levu nodra itokani ena internet, au nanuma ga nira kilai levu. Ia dua na ka noqu vuvutaki ira.”

Ke o dau vakila tale ga qori, ena rawa ni vukei iko na ulutaga qo mo kua ni rarawa ke sega ni levu nomu itokani ena internet.

Cava na kena ca?

E kaya na Vosa Vakaibalebale 22:1, “me digitaki na yaca rogo vinaka me kua na iyau levu.” E sega gona ni ca ke o vinakata me vinaka na kemu irogorogo se mera taleitaki iko e levu.

Ia eso na gauna o na sega ni marau ke o vinakata mo taleitaki vakalevu. Vakacava e rawa ni vaka vu leqa qori? Io, e duavata ena tikina qori o Onya e yabaki 16. E kaya:

“Nira vinakata eso mera kilai levu era na cakava na ka rerevaki. Kena ivakaraitaki, au dau raici eso era rika mai ena tabavale e koronivuli.”

Ia eso era na katona ena vidio na ka rerevaki era cakava ra qai biuta ena internet, me rawa nira raica na nodra itokani. Kena ivakaraitaki, eso na itabagone era biuta ena internet nodra vidio nira kania na pouta lalai ni savasava. Ia e tu kina na wainimategaga e sega ni dodonu me laukana!

E kaya na iVolatabu: “Kua ni cakava e dua na ka . . . mo tukutukuni iko kina.”—Filipai 2:3, Good News Translation.

Vakasamataka mada:

E vinaka mo kilai levu ena internet?
O na bolemate ena ka vakarerevaki mo rawa ni taleitaki qai vakadonui vei ira nomu itokani?

Ka era kaya nomu icaba

“E vakarerevaki nira cakava eso na ka ga e rawa me yaco ga kina na lomadra. Kena ivakaraitaki, era nanuma me duatani nodra ivakarau ni vosa, isulusulu, se ivukivuki ena internet me rawa nira rogo kina. Ia o na rarawa ke o cakava na ka o kila ni cala mo rawa ni kilai levu kina.”—Leianna.

“E sega ni dina na kedra itukutuku”

Eso era sega ni cakava na ka rerevaki mera rogo kina ena internet. Ia era vakayagataka e dua tale na iwalewale. E kaya o Erica e yabaki 22:

“Eso era biuta ena internet na ka marautaki ena nodra bula. E vaka ga me levu nodra itokani, e levu tale ga na gauna ni nodra veimaliwai. Qori me nanumi ga kina ni levu e taleitaki ira.”

Eso era dau lasutaka na kedra itukutuku. E kaya o Cara e yabaki 15:

“Eso era lasutaka na itaba era biuta ena internet me vaka era tu ena pati. Ia na kena dina era tu ga e vale.”

A cakava tale ga qori o Matthew e yabaki 22, e kaya:

“Au biuta e dua na itaba me vaka au tu e Mount Everest, ia au se bera ni lesu mai Esia!”

E kaya na iVolatabu: “Keitou vinakata me keitou dina ena ka kece.”—Iperiu 13:18.

Vakasamataka mada:

O dau biuta ena internet eso na ka lasutaki mo rawa ni kilai levu kina?
Na itaba kei na ivakamacala o biuta ena internet e vakaraitaka dina na ivakarau ni nomu vakasama, lomamu kei na nomu rai?

Ka era kaya nomu icaba

“Eso era cakava na ka ga e rawa mera taleitaki kina. Ia cava o vinakata mo kilai kina—sega ni rakorako nomu isulusulu, velavela na ka o tukuna qai dokadokataka na ka o taukena? se E vinaka nomu itovo qai dauveikauaitaki? Eda marautaka nira taleitaki keda eso tale, ia qarauna ga me kua ca kina nomu lewaeloma.”—Hannah.

E bibi me levu noqu itokani ena sala ni veikilai ena internet?

Levu era ni na levu nodra itokani ke ra rogo qai taleitaki na nodra itaba ena internet. A cakava qori o Matthew sa cavuti oti mai, e kaya:

“Au dau tarogi ira eso, ‘E vica nomu itokani ena internet?’ se ‘E le vica era taleitaka na ka o biuta ena internet?’ Au na veitokani kei ira au sega ni kila qai nuitaka tu mera ciqoma noqu kerekere me keimami veitokani. Na sala ni veikilai ena internet e uqeti au meu cakava na ka meu rogo kina.”

Collage: 1. Matadredredre e dua na goneyalewa ni raica na levu ni tamata era taleitaka na ka e biuta ena internet. 2. E kania eso na kakana kamikamica. 3. E matararawa ni vaka me lako vakaca vua na ka e kania. — Na sala ni veikilai ena *internet* e vaka na kakana kamikamica, e lekaleka ga na kena kamica e rawa tale ga ni vakaleqai iko

E raica o Maria e yabaki 25, ni so era yavutaka na ka me baleti ira ena levu ni nodra itokani, kei na taleitaki ni veika era biuta ena internet. E kaya:

“Ke sega ni levu era taleitaka na kena itaba e dua na goneyalewa ena nanuma o koya ni yalewa rairai ca. E cala na nanuma qori, ia o ira e va qori nodra rai e vaka ga era vakatotogani ira tale tiko.”

E kaya na iVolatabu: “Meda kua ni dokadoka ni vakavuna na veiqati se veivuvutaki.”—Kalatia 5:26.

Vakasamataka mada:

O dau vakatauvatani iko kei ira eso tale ena sala ni veikilai ena internet?
O kauaitaki ira vakalevu nomu itokani ena internet se o ira nomu itokani dina?

Ka era kaya nomu icaba

“Mo kilai levu ena internet ena vinakati mo cakava na ka mera taleitaki iko kina e levu. Kena ibalebale, o sa na vakataki ira sara ga. O na kauaitaka kina vakasivia nodra rai, kei na ka mo cakava me rawa nira taleitaki iko. E sega ni cala ke o vinakata mo taleitaki, ia ena rawa ni vakaleqai iko ke o kauai kina vakasivia.”—Joshua.

Qarauna mo kua ni tukutukuni iko

O sa bau raici ira eso era tukutukuni ira, ia ena gauna vata qori era vosakudrukudru?

“Qo ni sa dua noqu motoka vou, levu era sa via vodo ga kina!”
“Au sa oca sara ga nira tukuna tiko e levu ni sa lutu na yagoqu!”

E vosakudrukudru e dua me nanumi ga ni yalomalumalumu, ia e tukutukuni koya tiko.

iVakasala: Ena vakacudrui ira eso tale noda dau tukutukuni keda. Na vuna? Nira kila vinaka tu na inaki eda cakava kina qori. Era na sega ni taleitaki keda tale ga e levu ke veivakaisini na noda yalomalumalumu.

Qarauna me kua ni veivakaisini nomu yalomalumalumu ni o biuta na itaba se vola e dua na ka ena sala ni veikilai ena internet. Muria na ivakasala vuku ena iVolatabu: “Me vakacaucautaki iko e dua tale me kua na gusumu.”—Vosa Vakaibalebale 27:2.