Taro na Dauwiliwili

Na cava e cavuta kina o Jisu na ka e tukuna o Tevita ena Same 22:1 ni bera toka ga ni mate?

Ni bera toka ga ni mate o Jisu e cavuta na ka e volai ena Maciu 27:46: “Noqu Kalou, noqu Kalou, na cava oni sa biuti au kina?” E vakayacora kina o Jisu na ka e tukuna na daunisame o Tevita ena Same 22:1. (Mari. 15:34) Ena cala ke da tukuna ni cavuta na vosa qori o Jisu ni rarawataki Jiova se ni sa lailai nona vakabauta ena gauna qori. E kila vinaka tu o Jisu na vuna me mate kina qai tu vakarau me mate. (Maciu 16:21; 20:28) E kila vinaka tale ga ni gauna ena mate kina, sa na sega ni “taqomaki” koya o Jiova. (Jope 1:10) E vinakata gona o Jiova me vakaraitaka o Jisu ni na yalodina tiko ga se mani dredre vakacava na ka e sotava me yacova na mate.—Mari. 14:35, 36.

Na cava mada e cavuta kina o Jisu na ka e tukuni ena Same qo? Eda sega ni rawa ni vakadeitaka, ia meda raica mada e vica na vuna.a

Ni cavuta o Jisu na vosa ya, e rairai vakabibitaka tiko ni na sega ni taqomaki koya o Jiova ni sa na mate. Me sauma o Jisu na ivoli, ena sega ni vukei koya kina o Jiova. Ni bula vakatamata, e vinakati sara ga me “mate ena vukuda na tamata kece.”—Iper. 2:9.

Ni cavuta o Jisu na Same qo, vakacava e vinakata mera nanuma eso ni dusia na same taucoko? Sa matau vei ira na Jiu ena gauna ya mera wiligusutaka e levu na same. Nira rogoca e dua na tikina mai na same, sa na totolo ga nodra vakasamataka na same taucoko qori. Ke va qori na nanuma i Jisu, sa na vukei ira tiko na nona imuri era Jiu mera nanuma e levu na parofisai e tiko ena same e vakamacalataka na ka ena yaco vua ni sa na mate. (Same 22:7, 8, 15, 16, 18, 24) Ena iotioti tale ga ni vica na tikina, e vakacaucautaki kina o Jiova, e vakamacalataka tale ga ni na roboti vuravura na nona lewa vakatui.—Same 22:27-31.

Ni cavuta o Jisu na ka e tukuna o Tevita, vakacava e vakabibitaka tiko ni sega nona cala? Ni bera ni mate o Jisu, e lewai vakatawadodonu qai tau na kena itotogi ni veibeci. (Maciu 26:65, 66) A lewai ga vakatotolo ni sa bogilevu, e sega tale ga ni muri na ka vakalawa ni gauna ya. (Maciu 26:59; Mari. 14:56-59) Ni cavuta o Jisu na taro qori, e rairai vakabibitaka tiko ni sega nona cala, e sega tale ga na yavu me vakamatei kina.

Vakacava e tukuna tiko o Jisu ni nona rarawa na daunisame o Tevita, e dusia ni sega ni vakadonui koya o Jiova? Ni taroga qori o Tevita, e sega ni vakaraitaka ni sa lailai nona vakabauta. E vakamacalataka tarava ni nuitaka na kaukaua i Jiova me veivakabulai, e vakalougatataki koya tiko ga. (Same 22:23, 24, 27) E va tale ga qori o Jisu na “Luvei Tevita,” nona vakararawataki ena kau, e sega ni kena ibalebale ni sega ni vakadonui koya o Jiova.—Maciu 21:9.

Vakacava e rarawataka vakalevu o Jisu ni sa na sega ni taqomaki koya o Jiova me rawa ni vakaraitaka nona yalodina? A sega ni nakita taumada o Jiova me vakararawataki o Luvena qai vakamatei. E qai vinakati me mate ni rau sa talaidredre o Atama kei Ivi. E sega nona cala o Jisu, ia e vinakati me vakararawataki qai vakamatei me saumi kina na taro nei Setani, me volia lesu tale ga na ka e vakayalia na tamata. (Mari. 8:31; 1 Pita 2:21-24) E rawati ga qori ni sega ni taqomaki Jisu mada vakalekaleka o Jiova. Se qai vakadua me cakava qori.

Vakacava e vukei ira tiko nona imuri o Jisu mera kila na vuna e vakatara kina o Jiova me mate ena sala qo?b E kila o Jisu ni nona mate ena kaunirarawa me vaka na daubasulawa, era na tarabe kina e levu. (1 Kor. 1:23) Ke ra kila na nona imuri na vuna dina e mate kina, ena matata vei ira na kena ibalebale. (Kala. 3:13, 14) Era na raici koya gona me nodra iVakabula, sega ni daubasulawa.

Se mani vuna cava e tukuna kina o Jisu na vosa qori, e kila ni veika e sotava tiko e inaki i Jiova vua. Ni cavuta oti ga na same qori, e kaya o Jisu: “Sa vakacavari!” (Joni 19:30; Luke 22:37) Nona sega ni taqomaki koya vakalekaleka o Jiova, e rawa ni vakayacora vinaka sara o Jisu na veika e talai mai kina e vuravura. E vakayacora tale ga na veika e volai me baleti koya “ena Lawa e vola o Mosese, nodra ivola na Parofita, kei na Same.”—Luke 24:44.