Vakananuma Vakatitobu na Veika sa Cakava o Jiova ena Vukumu

NI OTI ga vakalailai na nona vakaturi o Jisu, erau taubale tiko mai Jerusalemi i Emeo na nona tisaipeli. E tukuni ena Kosipeli o Luke: “Ni rau veivosaki voli, e lako voleka yani vei rau o Jisu qai tomani rau. Ia erau sega ni kilai koya.” E kaya vei rau: “‘Cava drau veivosakitaka tiko?’ Erau mani tu vakadua ena matararawa.” Na cava erau rarawataka? Eratou nanuma tiko na tisaipeli ni na vakabulai ira na Isireli ena gauna sara ga oya o Jisu mai na nodra veiliutaki na kai veimatanitu. Ia a qai vakamatei tale o Jisu. Qori na ka erau rarawataka na nona tisaipeli.​—Luke 24:​15-​21; Caka. 1:6.

A vakamacala sara vei rau o Jisu ena “ka me baleti koya e volai tu ena iVolatabu kece me tekivu mai na ivola i Mosese kei na nodra ivola na Parofita.” Io, e levu na ka bibi qai veivakayaloqaqataki a yaco ena nona cakacaka vakaitalatala o Jisu! Ni rau vakarorogo tiko vei Jisu na tisaipeli, a vuki na nodrau rarawa me marau. Erau qai kaya ena yakavi ni siga oya: “E uqeta sara ga na lomadaru na nona vosa tiko vei kedaru e gaunisala, ni sereka voli na iVolatabu, se vakacava?” (Luke 24:​27, 32) Na cava eda vulica vei rau na tisaipeli i Jisu?

Tarai Keda Vakacava na Kena Sega ni Yaco na ka e Namaki?

Erau rarawa na tisaipeli erau taubale tiko i Emeo ni sega ni yaco na ka erau nanamaki tu kina. E dina ena kedrau ituvaki na ka e tukuni ena Vosa Vakaibalebale 13:12: “Ni vakaberaberataki na ka sa nuitaki tiko sa dau oca kina na yaloda.” Eso tale ga era yalodina voli ni qaravi Jiova me sagavulu na yabaki, era nanuma ni dodonu me sa yaco na “veivakararawataki levu.” (Maciu 24:21; Vkta. 7:​14) E macala gona ni na vakavu rarawa tiko ena gauna qo na kena se sega ni vakayacori na ka eda namaka.

Ia nanuma tiko ni rau marau tale na tisaipeli ni vukei rau o Jisu me rau vakananuma na parofisai era sa vakayacori oti​—eso era vakayacori sara ga ena nodrau gauna. Ke da cakava tale ga qori, eda na marau tiko ga da qai valuta na yalolailai. A kaya o Michael sa qase ni ivavakoso voli mai vakadede: “Kua ni vakasamataka tiko ga na veika e se bera ni cakava o Jiova. Ia vakananuma vakatitobu na ka e sa cakava oti.” Qori e ivakasala vinaka dina!

Veika sa Cakava o Jiova

Vakasamataka mada eso na ka vakasakiti sa cakava o Jiova. A kaya o Jisu: “O koya e vakabauti au ena cakava tale ga na cakacaka au cakava. Na ka tale ga e cakava ena levu sara.” (Joni 14:12) Eda sa cakava tiko na dauveiqaravi ni Kalou nikua na cakacaka vaKarisito levu duadua me bau vakayacori. E sivia na vitu na milioni eda vakanamata tu meda bula ena veivakararawataki levu. Vakasamataka mada, na keda iwiliwili eda qaravi Jiova tiko ena yalodina nikua kei na levu ni vanua e veiyasa i vuravura eda gumatua tiko kina ni veiqaravi e se sega ni bau vakilai e liu! Sa vukei ira dina na nona dauveiqaravi o Jiova me ‘levu sara na ka era cakava’ me vaka ga a parofisaitaka o Jisu.

Na cava tale sa cakava ena vukuda o Jiova? Vakaivakatakarakara, sa vukei ira na yalomalumalumu mera gole tani mai na vuravura ca ra qai curu ina parataisi vakayalo e vakarautaka. (2 Kor. 12:​1-4) Me tiko na gauna mo dau vakananuma kina eso na ka talei me baleta na parataisi oya e tu vakarawarawa vei keda. Kena ivakaraitaki, raica mada na nomu laibri ni ivola se na kena e tiko ena Kingdom Hall. Vakacega mada na Watch Tower Publications Index, se vakaraica na Watchtower Library. Rogoca e dua na katokatoni ni drama vakaivolatabu. Railesuva ena nomu vakasama na ka o rogoca se raica ena soqo siga tolu sa oti. Vakasamataka tale ga na totoka ni noda veimaliwai kei ira na mataveitacini. Sa yalololoma dina o Jiova ni sega ni caka rawa na kakana vakayalo e vakarautaka vei keda da qai lewe ni dua na mataveitacini e vuravura raraba​—qori dina na parataisi vakayalo!

A kaya na daunisame o Tevita: “I Jiova na noqu Kalou, sa ka levu na nomuni cakacaka e veivakurabuitaki ko ni sa cakava, kei na nomuni nanuma vei keimami.” (Same 40:5) Io, nida vakananuma vakatitobu na veika totoka sa cakava ena vukuda o Jiova kei na nona lomani keda, eda na vakaukauataki tale meda vosota ena yalodina nida qarava mai vu ni lomada na Tamada vakalomalagi, o Jiova.​—Maciu 24:13.

[iYaloyalo ena tabana e 31]

A vukei rau na nona tisaipeli o Jisu merau vakananuma vakatitobu na veika sa cakava ena vukudrau o Jiova

[iYaloyalo ena tabana e 32]

Railesuva ena nomu vakasama na ka o rogoca se raica ena soqo siga tolu sa oti