Ezayíi
20 Xwe e mɛ Asilíi xɔ́sú Saagɔ́ɔn sɛ́ Taatáni* dó Acidɔ́di é ɔ, é tɔ́n ahwan Acidɔ́di toxo ɔ bo yí. 2 Hwe énɛ́ nu ɔ, Jexóva ɖɔ xó gbɔn Ezayíi, Amɔ́zi ví ɔ jí, bo ɖɔ: “Yi, ɖe ati e ɖo alinkan towe é nyi ayǐ, bo ɖe afɔkpa towe lɛ́.” Bɔ é wa mɔ̌; é ɖo goklé,* bo ɖo afɔvɔ́ bo ɖo zɔnlin ɖi wɛ.
3 Énɛ́ gúdo ɔ, Jexóva ɖɔ: “Lěe mɛsɛntɔ́ ce Ezayíi ɖo goklé bo lɛ́ ɖo afɔvɔ́, bo ɖi zɔnlin nú xwe atɔn bɔ é nyí wuntun ɖé kpó akpágbanúmɛ ɖé kpó nú Ejípu kpó Etiopíi kpó gbɔn é ɔ, 4 mɔ̌ wɛ Asilíi xɔ́sú ɔ ná kplá Ejípu sín mɛ e è wlí lɛ́ é kpó kannumɔ Etiopíi tɔn lɛ́ kpó gbɔn, súnnuví lɛ́ kpó degénɔ lɛ́ kpó, bɔ yě ná ɖo mɛ̌ bo ɖo afɔvɔ́ bɔ yonu yětɔn ná ɖo wěxo, bɔ é ná nyí winnyá nú Ejípu. 5 Ado ná hu yě bɔ winnyá ná hu yě, ɖó Etiopíi e nyí nukúnɖíɖó yětɔn é kpó Ejípu e wú yě nɔ gó ɖó é* kpó wú. 6 Mɛ ɖěɖěe nɔ nɔ to énɛ́ e ɖo xutó é mɛ lɛ́ é ná ɖɔ ɖo azǎn énɛ́ gbe ɖɔ: ‘Mi kpɔ́n nǔ e jɛ dó nukúnɖíɖó mǐtɔn wú é, éyɛ́ mɛ e mǐ nɔ hɔn yi su bo nɔ gán ɖo Asilíi xɔ́sú ɔ lɔ mɛ é! Nɛ̌ mǐ ka ná gán gbɔn din?’”