Ezayíi
27 Ðo azǎn énɛ́ gbe ɔ, Jexóva ná sɔ́ hwǐ tɔn e ɖá, d’agba, bo ɖó hlɔ̌nhlɔ́n é,
bo ná sɔ́ ayi tɔn ɖó Levyatáan,* dan e nɔ ɖíɖí é,
énɛ́ wɛ nyí Levyatáan, dan e nɔ ɖíɖí gbɔn adɔgo jí é jí;
é ná hu nǔɖíɖó e d’abaɖa bo ɖo xu mɛ é.
2 Ðo azǎn énɛ́ gbe ɔ, mi ji han n’i* ɖɔ:
“Vǐwungbo e nɔ ná vɛ̌ɛn e nɔ nyɛ fún é!
3 Nyɛ Jexóva ɔ, un ɖo xɛ nya ɖo jǐ tɔn* wɛ.
Un nɔ hú sin n’i hwebǐnu.
Un nɔ nya xɛ ɖo jǐ tɔn zǎn kéze,
bónú mɛ ɖěbǔ ní ma wa nǔ dó wǔ tɔn ó.
4 Xomɛsin ɖěbǔ ɖo xo ce mɛ ǎ.
Mɛ̌ ka ná sɔ́ wunkan kpó gběhan nyanya kpó dó kpé hun xá mì ɖo ahwangbénu?
Un ná gbídí yě, bo ná dó yě bǐ zo ɖó kpɔ́.
5 Ényí nǔ ma ná nyí mɔ̌ ǎ hǔn, é ní tɛ́ dó ahohó ce wú gbánwúngbánwún.
É ní dó hwɛ gbɔ xá mì;
nyɛ wɛ é ná dó hwɛ gbɔ xá.”
6 Ðo azǎn e jawě lɛ́ é jí ɔ, Jakɔ́bu ná dó ɖɔ do,
Izlayɛ́li ná gba sɛ́, bo ná tɔ́n kun;
yě ná bló bɔ sínsɛ́n ná gɔ́ ayǐkúngban ɔ jí.
7 Dandan wɛ ɖɔ è ní xo è kpó mɛ e ɖo xixo è wɛ é sín bǎ kpó a?
Alǒ, è ɖó ná hu i, mɛ e é hu lɛ́ é ɖɔhun wɛ a?
8 A ná liza xá ɛ kpó xósúsú e dó xɛsi é kpó hwenu e a ná ɖo nyinya ɛ wɛ é.
A ná nya ɛ kpó funfún towe hlɔ̌nhlɔ́nnɔ ɔ kpó ɖo azǎn e gbe jɔhɔn zǎnzǎnhwe jí tɔn ɔ ná nyi é.
9 Mɔ̌ mɛ ɔ, è ná súnsún nǔwanyido Jakɔ́bu tɔn,
bɔ nǔ e ná jɛ hwenu e è ná ɖe hwɛ tɔn síin é ɖíe:
é ná bló bɔ vɔ̌sákpe ɔ sín awǐnnya lɛ́ bǐ
ná cí hwě e è gba hánnyá lɛ́ é ɖɔhun,
è ná jó dotín mímɛ́* lɛ́, alǒ nǔ e jí è nɔ dó zǎlínkpɔ́n zo ɖe lɛ́ é ɖě dó ǎ.
10 Ðó toxo e è mɛ ahohó lɛ́ lɛ̌ dó é ná jɛ vɔ̌;
è ná wɔn amagbo lɛ́, bo ná jó yě dó gbětótló ɖɔhun.
Nyibúví ná ɖu ama ɖo fínɛ́, bo ná mlɔ́ fínɛ́,
lobo ná ɖu atínla lɛ́.
11 Ényí alaví tɔn lɛ́ xú ɔ,
nyɔ̌nu lɛ́ ná wá, bo ná wɛ́n yě,
lobo ná flɔ́ myɔ ná.
Ðó togun élɔ́ ɖó nukúnnúmɔjɛnǔmɛ ǎ.
Énɛ́ wú wɛ Mɛ e ɖó yě é ma ná kú nǔbláwǔ ɖě nú yě ǎ,
bɔ Mɛ e bló yě é ná nyɔ́ xomɛ ɖě dó yě wú ǎ.
12 Togun Izlayɛ́li tɔn è, gbe énɛ́ gbe ɔ, Jexóva ná gbɛ atínsínsɛ́n lɛ́ sín tɔjɔtɛn Tɔsisa ɔ* tɔn kɔn, káká yi tɔsisa* Ejípu tɔn ɔ kɔn, bɔ è ná xo mi kplé ɖějɛɖěgúdo. 13 Ðo azǎn énɛ́ gbe ɔ, è ná kún lanzo ɖaxó ɖokpó, bɔ mɛ ɖěɖěe ɖo dindɔn wɛ ɖo Asilíi to mɛ lɛ́ é kpó mɛ ɖěɖěe gba kpé gbɔn Ejípu to mɛ lɛ́ é kpó ná wá, bo ná ɖe kɔ́ nú Jexóva ɖo só mímɛ́ ɔ jí ɖo Jeluzalɛ́mu.