TÀN 12
Gbɛtɔ́ lɛ Gbá Agbǒ Ðaxó Ðé
XWÈ ɖò xwè jí jɛ wɛ é ɔ, vǐ Nɔwee tɔn lɛ jì vǐ gègě. Nɔwee sín vivǔ enɛ lɛ lɔ sù, bo gbà kún. Tlolo ɔ, gbɛtɔ́ kpé ayikúngban ɔ bǐ jí.
Vivuvivu Nɔwee tɔn ɖokpo nɔ nyí Nimulodu. Nya baɖabaɖa ɖé wɛ n’i, bɔ é nɔ nya gbě bo nɔ hu kanlin kpo gbɛtɔ́ kpo. É lɛ́ sɔ́ éɖee dó ɖó axɔsu. Enɛ wu ɔ, Mawu gbɛ́ wǎn nú Nimulodu.
Hwenɛnu ɔ, mɛ bǐ wɛ nɔ dó gbè ɖokpo. Nimulodu jló na xò ye bǐ kplé ɖó fí ɖokpo bo na dó sixu kpa acɛ dó ye jí. Enɛ wu ɔ, a ka tuùn nǔ e é bló é à? É ɖɔ nú gbɛtɔ́ lɛ ɖɔ ye ni bló toxo ɖé, bo gbá agbǒ ɖaxó ɖokpo d’emɛ. Ye nɛ ɖò bliki sún wɛ ɖò ɖiɖe ɔ mɛ nɛ.
Xɔgbigbá enɛ ɔ hun xomɛ nú Jehovah Mawu ǎ. Jlǒ tɔn wɛ nyí ɖɔ gbɛtɔ́ ni gbakpé ayikúngban ɔ bǐ jí. Loɔ gbɛtɔ́ lɛ ka ɖɔ: ‘Mi wá! Mi nú mǐ ni bló toxo ɖé, bo gbá agbǒ e na yì aga bo sɔ́ jinukúnsin é d’emɛ. Enɛ ɔ, mǐ na nyí nusuɖaxó!’ Susu e jɛxa Mawu é ba wɛ ye ɖè nɛ.
Mawu ɖó xɔgbigbá enɛ ɔ te. A ka tuùn lee é bló mɔ̌ gbɔn é à? É wlú gbè dó nu nú ye ajijimɛ, bɔ ye jɛ gbè vovo dó jí. Xɔgbátɔ́ lɛ sɔ́ nɔ sè nǔ jɛ yeɖee gbè mɛ ǎ. Enɛ wɛ zɔ́n bɔ è nɔ ylɔ toxo enɛ ɖɔ Babɛli abǐ Babilɔnu. Tinmɛ tɔn wɛ nyí “Nǔ Hannyahannya.”
Mɛ e ɖò Babɛli lɛ é jɛ gbigba dó jí. Ye mɛ e sè gbè ɖokpo ɔ lɛ é nɔ xò yeɖee kplé, bo nɔ yì sá xwé ɖó fí ɖevo ɖò ayikúngban ɔ jí.
Genèse 10:1, 8-10; 11:1-9.