AKPÁXWÉ 4
Sín Axɔsu Nukɔntɔn Izlayɛli Tɔn jí jɛ Hwenu E Izlayɛli-ví lɛ Yì Kannumɔgbenu ɖò Babilɔnu É
Sawulu wá nyí axɔsu nukɔntɔn Izlayɛli tɔn. Amɔ̌, Jehovah wá gbɛ́ ɛ, bo sɔ́ Davidi, bɔ é nyí axɔsu ɖó tɛn tɔn mɛ. Mǐ na kplɔ́n nǔ gègě dó Davidi wu. Mɛ winnyawinnya wɛ Davidi nyí cobo ka hu nya jiganjigan e nɔ nyí Goliati é. Enɛ gudo ɔ, é hɔn nú wǔ hwan axɔsu Sawulu tɔn. Gudo mɛ ɔ, nya ɖé tíìn, bɔ Abigayɛlu lɔn bonu Davidi hu i ǎ.
Mǐ na lɛ́ kplɔ́n nǔ gègě dó Davidi sín vǐ Salomɔɔ wu. É wɛ nyí axɔsu Izlayɛli tɔn e jɛ Davidi tɛnmɛ é. Axɔsu atɔn nukɔntɔn Izlayɛli tɔn lɛ ɖokpo ɖokpo ɖu axɔsu nú xwè 40. Salomɔɔ sín kú gudo ɔ, è má Izlayɛli ɖó axɔsuɖuto wè: Axɔsuɖuto totaligbé tɔn kpo axɔsuɖuto tofɔligbé tɔn kpo.
Akɔta 10 totaligbé tɔn lɛ sín axɔsuɖuto nɔ ayǐ nú xwè 257, hwɛ̌ có Asiliinu lɛ wá viva ɛ. Xwè 133 gudo ɔ, akɔta wè tofɔligbé tɔn lɛ sín axɔsuɖuto lɔmɔ̌ jɛ ayǐ. Hwenɛnu wɛ è bɛ́ Izlayɛli-ví lɛ yì kannumɔgbenu ɖò Babilɔnu. Akpáxwé ƐNƐGƆ elɔ kpi tàn nǔ e jɛ ɖò xwè 510 gblamɛ é tɔn. Nǔ titewungbe gègě wɛ jɛ ɖò xwè enɛ lɛ vlamɛ.