Tasúná

NǓ E wú è sɔ́ nǔ nú alɔnuwéma élɔ́ é wɛ nyí ɖɔ é ná tínmɛ nǔ e Kúnnuɖetɔ́ Jexóva tɔn lɛ́ ɖi nǔ ná ɖo sinsɛn linu lɛ́ é bǐ ǎ. É nyɔ́ wa ɔ, mǐ tɛ́n kpɔ́n bo tínmɛ nǔgbódodó ɖěɖěe Kúnnuɖetɔ́ lɛ́ ɖi nǔ ná lɛ́ é ɖé lɛ́, bo lɛ́ xlɛ́ lěe wěmaxɔmɛví towe ná wa nǔ gbɔn ényí é su ɖo xwédo e mɛ mɛjitɔ́ lɛ́ ɖokpó alǒ we lɛ́ bǐ nyí Kúnnuɖetɔ́ ɖe é mɛ é nyi wɛn.

Kúnnuɖetɔ́ Jexóva tɔn lɛ́ nɔ ké ya tawun nú susu ɖo gbigbɔ lixo vǐ yětɔn lɛ́ tɔn. Bɔ yě kú d’é jí ɖɔ énɛ́ nɔ wa ɖagbe nú vǐ yětɔn lɛ́ ɖo akpáxwé gbɛzán yětɔn tɔn ɖěvo lɛ́. Nǔ ɖěɖěe yě ɖi nǔ ná lɛ́ é kpó nǔgbódodó ɖěɖěe yě nɔ xwedó lɛ́ é kpó nɔ zɔ́n bɔ gbɛ yětɔn nɔ ɖó nu bo nɔ lɛ́ d’alɔ yě bɔ yě nɔ ɖí xwi xá tagba e yě nɔ mɔ gbe bǐ gbe lɛ́ é. Gɔ́ ná ɔ, nǔ énɛ́ lɛ́ e yě ɖi nǔ ná lɛ́ é kpó nǔgbódodó énɛ́ lɛ́ kpó ɖó ná sísɛ́ yě bɔ yě ná tɛ́n kpɔ́n bo nyí wěmaxɔmɛví kanɖódónǔwútɔ́ lɛ́ lobo lɛ́ nyí toví ɖagbe lɛ́ ɖo gbɛzán yětɔn bǐ mɛ.

Kúnnuɖetɔ́ lɛ́ nɔ tɛ́n kpɔ́n bo nɔ ɖó linlin e ɖo jlɛ̌ jí é dó gbɛ ɔ wú, énɛ́ wɛ zɔ́n bɔ wěma kplɔ́nkplɔ́n ɖo tají tawun nú yě. Énɛ́ wú ɔ, jlǒ yětɔn wɛ nyí ɖɔ yě ná zán nǔwúkpíkpé yětɔn lɛ́ lěe yě kpé wú gbɔn é bǐ dó w’azɔ̌ ɖó kpɔ́ xá we. Nú nǔ e kan Kúnnuɖetɔ́ Jexóva tɔn lɛ́ é ɔ, yě ná kpo ɖo wǔsyɛ́n dó lanmɛ nú vǐ yětɔn lɛ́ wɛ ɖo xwé yětɔn lɛ́ gbe kpó fí e yě nɔ sɛn Mawu ɖe gbɔn gbɛ ɔ bǐ mɛ lɛ́ é kpó ɖɔ yě ní wa azɔ̌ e nyí yětɔn é bá dó ɖu wěma kplɔ́nkplɔ́n yětɔn sín le bǐ mlɛ́mlɛ́.