Wema-Sɛ́dó-Mɛ Hagbɛ̌ Alixlɛ́mɛtɔ́ ɔ Tɔn

Wɛnɖagbejlatɔ́ hatɔ́ vívɛ́:

Wǔjɔmɛ jiwǔ ɖé wɛ é nyí ɖɔ mǐ ɖò bǔ bo nɔ sɛn Jehovah, Mawu nǔgbo ɖokpo géé ɔ. “Azɔ̌gbɛ́” tɔn wɛ mǐ nyí, bɔ é zé Axɔ́suɖuto tɔn e è ko ɖó ayǐ é sín wɛnɖagbejijla kpo nǔ kplɔnkplɔn mɛ lɛ kpo sín azɔ̌ ɔ d’alɔ mɛ nú mǐ. Azɔ̌ mímɛ́ ɖé wɛ, bo lɛ́ nyí gbɛhwlɛngán sín azɔ̌ ɖé. (1 Kɔ. 3:9, nwt; Mat. 28:19, 20) Bo na dó wà azɔ̌ enɛ gbɔn gbɛ̀ ɔ bǐ mɛ, ɖò fífá kpo bǔninɔ kpo mɛ ɔ, è ɖó na bló tuto nú mǐ ganji.—1 Kɔ. 14:40.

Wema elɔ na d’alɔ we bɔ a na mɔ nukúnnú jɛ lee agun Klisanwun tɔn nɔ wà nǔ gbɔn égbé é wu. É ɖɔ xó dó wǔjɔmɛ kpo azɔ̌ kpo ɖěɖee a ɖó, ɖi Kúnnuɖetɔ́ Jehovah tɔn ɖé é jí. Enyi wǔjɔmɛ towe lɛ xɔ akwɛ ɖò nukún towe mɛ, bonu a wà azɔ̌ towe lɛ ɔ, a na “ɖò dǒ lí wɛ ɖò nǔɖiɖi mɛ.”—Mɛ. 16:4, 5; Ga. 6:5.

Enɛ wu ɔ, mǐ dó wusyɛn lanmɛ nú we ɖɔ a ni kplɔ́n wema elɔ tɛnwin lɛnwin. Ba ali ɖěɖee nu a sixu zán nǔ e ɖ’emɛ lɛ é ɖò gbɛzán hwiɖesunɔ tɔn mɛ ɖè lɛ é. Ði kpɔ́ndéwú ɔ, enyi a huzu wɛnjlatɔ́ e ma ko bló baptɛm ǎ é ayisɔnmɔ wɛ ɔ, afɔ tɛ lɛ a ka ɖó na ɖè bo na bló baptɛm, lobo nyí ɖokpo ɖò Kúnnuɖetɔ́ Jehovah tɔn lɛ mɛ? Ðò alɔ ɖevo mɛ ɔ, enyi a ko bló baptɛm wɛ ɔ, etɛ lɛ a ka sixu wà bo na yì nukɔn ɖò gbigbɔ lixo, lobo gbló ada nú sinsɛnzɔ́ e a nɔ wà nú Jehovah é? (1 Tim. 4:15) Nɛ̌ a ka sixu jɛhun dó fífá agun ɔ tɔn jí gbɔn? (2 Kɔ. 13:11) Ba xósin nǔkanbyɔ enɛ lɛ tɔn ɖò wema elɔ mɛ.

Enyi nɔví sunnu e ko bló baptɛm é ɖé wɛ nú we ɔ, etɛ lɛ a ka sixu wà bo na jɛxa bá nyí devízɔ́watɔ́ sinsɛnzɔ́wiwa tɔn, lobo wá nyí mɛxo agun tɔn ɖò nukɔnmɛ? Ðó mɛ yɔyɔ̌ afatɔ́n mɔkpan ɖò ahwan nyi wá tutoblonunu Mawu tɔn mɛ wɛ wutu ɔ, è ɖó hudo nɔví sunnu ɖěɖee jɛxa bo na nyí nukúnkpénuwutɔ́ lɛ é tɔn tawun. Wema elɔ na d’alɔ we bɔ a na mɔ nǔ ɖěɖee nǔ gbigbɔ tɔn enɛ lɛ ‘biba’ nɔ byɔ lɛ é.—1 Tim. 3:1.

Ðɛ vívɛ́ mǐtɔn wɛ nyí ɖɔ wema elɔ ni d’alɔ we, bonu a mɔ tɛn e mɛ a ɖè ɖò tuto Jehovah tɔn mɛ é, lobonu é ni xɔ akwɛ nú we. Mǐ yí wǎn nú mi mɛ bǐ tawun, bo kpó ɖò ɖɛ xò wɛ ɖɔ hwi lɔ na nɔ mɛ ɖěɖee na sɛn Tɔ́ mǐtɔn jixwé tɔn ɔ, Jehovah, kaka sɔyi kpo xomɛhunhun kpo lɛ é mɛ.—Ðɛh. 37:10, 11; Eza. 65:21-25.