Xosɛxweta

Nǔ e nɔ ɖu ayi mɛ nú mɛ gègě bɔ ye nɔ nya gbě tɔn ɖò égbé é wɛ nyí ɖɔ gbɛ̀ ɔ ni tuùn ye. Xota elɔ na ɖɔ xó dó nǔ e wu mǐ ɖó na sɔ́ ayi mǐtɔn ɖó mɛ tuùntuùn taji hugǎn ɔ jí é jí, enɛ wɛ nyí tuùn e Jehovah nɔ tuùn mɛsɛntɔ́ tɔn gbejinɔtɔ́ lɛ é. Mǐ na lɛ́ ɖɔ xó dó lee Jehovah nɔ ɖexlɛ́ ɖɔ emi tuùn mɛ, bɔ ɖò hweɖelɛnu ɔ, é nɔ nyí ɖò ali maɖónukún tawun lɛ nu gbɔn é jí.

Ðò xota elɔ mɛ ɔ, mǐ na gbéjé nǔ e wu nya gbejinɔtɔ́ Mɔyizi ba wǔjɔmɛ e é ɖó, bo na yì Akpádídó Yikúngban ɔ jí é kpò é kpɔ́n. Xota ɔ na lɛ́ d’alɔ mǐ, bɔ mǐ na mɔ lee mǐ na nyì alɔ nú mɔ e mɛ Mɔyizi jɛ é mɛ jijɛ gbɔn é.

Jehovah ɖ’acɛ bo sixu ɖɔ ɖɔ emitɔn wɛ gbɛtɔ́ lɛ bǐ nyí. Enɛ wu ɔ, é nɔ byɔ mǐ ɖɔ mǐ ni zé mǐɖée bǐ jó nú emi. Amɔ̌, mɛɖé lɛ ɖɔ ɖɔ emi ɖò gbeji nú Mawu, bo ka nɔ zán tónúmase sín gbɛzán. Ðò xota nukɔntɔn ɔ mɛ ɔ, mǐ na kplɔ́n nǔ taji ɖé lɛ ɖò tan Biblu tɔn e kúnkplá Kanyɛ́ɛ, Salomɔ́ɔ, Mɔyizi kpo Aalɔ́ɔn kpo é mɛ. Ðò xota wegɔ ɔ mɛ ɔ, mǐ na ɖɔ xó dó ali vovo e nu mǐ sixu xlɛ́ ɖè ɖɔ wǔ e Jehovah jɔ mǐ, bɔ mǐ nyí étɔn bo nyí togun tɔn é sù nukún mǐtɔn mɛ é jí.