Nǔ Sinsɛnzɔ́ Towe Ni Bí Alɔ nú We D’eji: Lee A Sixu Wà Nǔ Xá Xwétɔ́ E Nylahun Dó We É ɖé Gbɔn É

Etɛwu É ka Ðò Taji: Mɛ e mǐ nɔ xò gò ɖò sinsɛnzɔ́ ɔ mɛ é gègě nɔ ɖó sísí nú mǐ. É ɖò mɔ̌ có, Jezu ɖɔ ɖ’ayǐ ɖɔ mɛɖé lɛ na gbɛ́ wǎn nú mǐ. (Jaan 17:14) Enɛ wu ɔ, enyi mǐ yì xò gò xwétɔ́ ɖé bonu é nylahun dó mǐ ɔ, é ɖó na kpaca mǐ ǎ. Enyi é wá jɛ ɖó mɔ̌ ɔ, mǐ ɖó na wà nǔ e na hun xomɛ nú Jehovah e sín afɔ mǐ sɔ́ ɖó te é. (Hlɔ. 12:17-21; 1 Pi. 3:15, 16a) Mɔ̌ biblo na zɔ́n bɔ ninɔmɛ ɔ sɔ́ na nyla d’eji ǎ, bo na lɛ́ ɖekúnnu nú xwétɔ́ ɔ kpo mɛɖebǔ e ɖò mǐ kpɔ́n sɛ́dó wɛ lɛ é kpo. Enɛ na lɛ́ zɔ́n bɔ ye sixu ɖótó Kúnnuɖetɔ́ Jehovah Tɔn ɖevo hweɖevonu.—2 Kɔ. 6:3.

Lee È Sixu Bló Gbɔn É:

Ma jɛ adǎn ó bo wà nǔ kpo xomɛnyínyɔ́ kpo. Enɛ na d’alɔ bɔ ninɔmɛ ɔ na kpɔ́n te. Ma lin ɖɔ emi wu wɛ é ɖò hunnylanylá jí ó. (Nùnywɛtɔ́xó 7:9) É sixu nyí tagba mɛɖesunɔ tɔn ɖé wɛ zɔ́n b’ɛ ɖò xomɛsin jí, alǒ hwenu e a wá dó é wɛ ma nyɔ́ ǎ. É na bo tlɛ nyí wɛn mǐtɔn wɛ dó xomɛsin n’i ɔ, flín ɖɔ gǎn gbɛ̀ elɔ tɔn wɛ ɖò mɛ lɛ dɔn dó vi mɛ wɛ.—2 Kɔ. 4:4.
Nǎ xósin kpo gbè fífá kpo, xógbe towe lɛ ni lɛ́ nyɔ́ sè. (Nùnywɛxó 15:1) A gbà adɔ̌ dó n’i wɛ à, alǒ nùɖé kɔn wɛ a ɖè é sín? Mǐ nɔ dó kɛnklɛn ɖó azɔ̌ e wà wɛ mǐ ɖè é wu ǎ có, a sixu sɔ́ hwiɖée hwe bo dó kɛnklɛn n’i ɖó ba e a wá ba ɛ kpɔ́n ɖò hwenu e ma nyɔ́ ǎ é wu. Nú é ka nyí ɖɔ nǔ agɔ ɖé wɛ é sè dó mǐ wu wutu wɛ é ɖò xomɛsin ɔ jí ɔ ka ló? Enyi mɔ̌ wɛ ɔ, a sixu ɖɔ: “Un mɔ nǔ jɛ nǔ e wu mi ɖò xomɛ sìn wɛ é mɛ. É ɖò mɔ̌ có, é cí ɖɔ xó enɛ lɛ e mi sè dó mǐ wu é kún nyí nugbǒ ó ɖɔhun. Un sixu tinmɛ lee é nyí gbɔn é à?” Enyi nǔ e mǐ ɖi nǔ na lɛ é ɖě, bɔya mɛ ɖiɖe sín agun mɛ alǒ hun ma dó wɛ ka gbán ɖò nukún tɔn mɛ ɔ ka ló? A sixu ɖɔ: “Un mɔ nukúnnú jɛ nǔ e ɖɔ wɛ mi ɖè ɔ mɛ. Mɛ ɖevo lɛ lɔ nɔ ɖɔ xó mɔhun lɛ. Mi jló ɖɔ ma xlɛ́ nǔ e wu mǐ nɔ wà nǔ gbɔn mɔ̌ é mi ɖò Biblu mɛ à?”
Enyi zingidi mɛ ɔ tɔn hugǎn ɔ, é sixu nyɔ́ ɖɔ a ni gosin finɛ hú ɖɔ a ni tɛnkpɔn bo na xósin ɖé. Enyi é ɖɔ ɖɔ emi kún sɔ́ ba Kúnnuɖetɔ́ Jehovah Tɔn ɖebǔ ɖò xwé emitɔn gbè ó hǔn, a sixu n’ɛ jiɖe ɖɔ mǐ na sè gbè nú jlǒ tɔn.

Tɛ́n Nǔ Elɔ Kpɔ́n Sun ɔ Mɛ:

Blǒ nǔ e jí mǐ ɖɔ xó dó lɛ é ɖò sinsɛn-biblo xwédo tɔn towe hwenu.
Hwenu e a ko gosin xwétɔ́ e nylahun dó we é ɖé gɔ́n gudo é ɔ, ɖɔ xó kpo mɛ e kpo hwi kpo zɔ́n é kpo dó lee a sixu ko wà nǔ gbɔn b’ɛ kpɔ́n te hugǎn é jí.