Hwlɛndo Hwenu lɛ Ðò Sinsɛnzɔ́ Towe Mɛ
Kúnnuɖetɔ́ Jehovah Tɔn lɛ zán ganxixo 1 945 487 604 ɖò sinsɛnzɔ́ ɔ mɛ ɖò xwè sinsɛnzɔ́ tɔn 2014 tɔn mɛ; enɛ xlɛ́ céɖécéɖé ɖɔ mǐ kudeji bo na hɛn alɔnu mǐtɔn ján ɖò sinsɛnzɔ́ Jehovah tɔn mɛ. (Eza. 6:8; 1 Kɔ. 15:58) Ðó “hwenu kpɛɖé wɛ kpò” wutu ɔ, é ka sixu nyɔ́ bló bɔ mǐ na zán hwenu xɔ akwɛ mǐtɔn lɛ ɖò sinsɛnzɔ́ ɔ mɛ bo na dó mɔ gbɛtɔ́ gègě à?—1 Kɔ. 7:29.
Hwenu lɛ hwinhwlɛndo alǒ hwenu lɛ zinzan ganji ɖò sinsɛnzɔ́ ɔ mɛ nɔ byɔ ɖɔ mǐ ni nɔ ɖyɔ alɔ. Ði kpɔ́ndéwú ɔ, enyi a nɔ zán ganxixo ɖokpo alǒ hú mɔ̌ ɖò akpáxwé sinsɛnzɔ́ ɔ tɔn ɖé mɛ hwɛhwɛ, bo ka nɔ mɔ mɛɖé bo nɔ ɖɔ xó na ǎ ɔ, a ka sixu bló huzuhuzu ɖé lɛ bo na mɔ tɛn dó mɔ mɛ gègě bo ɖɔ xó na à? Ninɔmɛ lɛ nɔ gbɔn vo sín fí ɖé jɛ fí ɖé. É ɖò mɔ̌ có, alixlɛ́mɛ elɔ lɛ e bɔ d’ewu é sixu d’alɔ we bɔ a na zán hwenu towe ganji, bo na dó sixu nyì alɔ nú “akpotokwín nyì dó jɔhɔn mɛ.”—1 Kɔ. 9:26.
• Kúnnuɖiɖe Xwé ɖé Gbè Jɛ Xwé ɖé Gbè Tɔn: Sín xwè mɔkpan ɖíe ɔ, wɛnjlatɔ́ lɛ ko ɖó aca bo nɔ jɛ yɛhwexó ɖɔ jí sín xwé ɖé gbè jɛ xwé ɖé gbè hwenu e ye tɔ́n nú sinsɛnzɔ́ ɔ é. É ɖò mɔ̌ có, ɖó mɛ gègě nɔ yì azɔ̌ yetɔn lɛ mɛ ɖò kéze mɛ wutu ɔ, etɛwu a ma ka na tɛ́n yɛhwexóɖiɖɔ sín xwé ɖé gbè jɛ xwé ɖé gbè ɔ kpɔ́n ɖò hwelɛkɔ alǒ gbadanu cawun hwenu e mɛ gègě nɔ ɖò xwégbe bo nɔ ɖò gbigbɔjɛ wɛ é ǎ? Ðò kéze ɔ mɛ ɔ, kúnnuɖiɖe ɖò alitó alǒ nǔsatɛn lɛ sixu hɛn lè ɖaxó wá.
• Kúnnuɖiɖe Agbawungba Tɔn: È ɖó na sɔ́ tavo kpo nǔ kɛkɛví ɖɔhun e jí è nɔ tɛ́ wema lɛ dó é kpo ɖó fí e afɔzɔntɔ́ nɔ sukpɔ́ ɖè bo ɖò agun ɔ sín acɛ mɛ lɛ é. (Kpɔ́n Sinsɛnzɔ́ Axɔsuɖuto ɔ Tɔn Mǐtɔn Juillet 2013 tɔn, wex. 5.) Enyi afɔzɔntɔ́ lɛ ma sɔ́ wá sukpɔ́ ɖò fí e è sɔ́ bo nɔ ɖekúnnu agbawungba tɔn ɖè é ɖé ǎ ɔ, Wěɖegbɛ́ Sinsɛnzɔ́ Tɔn Agun ɔ Tɔn sixu ɖɔ bɔ è na sɔ́ nǔ kɛkɛví ɖɔhun ɔ alǒ tavo ɔ ɖó fí ɖevo e afɔzɔntɔ́ lɛ nɔ sukpɔ́ ɖè é.
• Mɛbakpɔ́n lɛ kpo Biblu Kpinkplɔn Xá Mɛ lɛ Kpo: É ka sixu nyɔ́ ɖɔ a ni sɔ́ mɛbakpɔ́n towe lɛ kpo hwenu e a nɔ kplɔ́n Biblu xá mɛ lɛ é kpo ɖó táan e mɛ akpáxwé sinsɛnzɔ́ ɔ tɔn ɖevo lɛ ma nɔ na sínsɛ́n sɔmɔ̌ ǎ é à? Ði kpɔ́ndéwú ɔ, enyi sinsɛnzɔ́ xwé ɖé gbè jɛ xwé ɖé gbè tɔn ɔ nɔ na sínsɛ́n ɖò Síbígbe zǎnzǎn lɛ ɔ, a ka sixu nɔ yì kplɔ́n Biblu xá mɛ lɛ ɖò hwelɛkɔ alǒ gbadanu lɛ à? Ðò mɛbakpɔ́n lɛ hwenu ɔ, wɛnjlatɔ́ lɛ ka sixu bló tuto bo nɔ yì ba mɛ e ye nɔ kplɔ́n nǔ xá bɔ ye nɔ nɔ xá ɖokpo ɔ mɛ lɛ é kpɔ́n hwɛ̌ cobo nɔ yì mɛ ɖěɖee ɖò xá ɖevo mɛ lɛ é gɔ́n, bo na mɔ tɛn dó wà nǔ gègě ɖò sinsɛnzɔ́ ɔ mɛ à?
Nugbǒ wɛ ɖɔ mǐ hɛn ɔ mǐ na xà ganmɛ mǐtɔn bɛ́sín hweɖebǔnu e mǐ bɛ́ kúnnuɖiɖe é, amɔ̌, hwenu e sinsɛnzɔ́ mǐtɔn ɖè sínsɛ́n tɔ́n é wɛ awǎjijɛ mǐtɔn nɔ jɛji. Enyi a mɔ ɖɔ alɔɖiɖo ɖò akpáxwé sinsɛnzɔ́ ɔ tɔn ɖé mɛ kún nɔ ɖè sínsɛ́n tɔ́n ɖò hweɖenu ó hǔn, tɛ́n akpáxwé tɔn ɖevo kpɔ́n. Xoɖɛ sɛ́dó Jehovah “jinukúnnɔ ɔ” bo byɔ ɛ alixlɛ́mɛ tɔn, bo na mɔ tɛn dó hwlɛndo hwenu lɛ ɖò sinsɛnzɔ́ ɔ mɛ.—Mat. 9:38.