Xó Mawu Tɔn ka Nɔ Ðó Hlɔnhlɔn Ðò Gbɛzinzan Towe Ayihɔngbe Ayihɔngbe Tɔn Mɛ À?

Biblu xixa ayihɔngbe ayihɔngbe sixu d’alɔ mǐ bɔ mǐ na “dó ɖɔ dò” bo “syɛnlǐn ɖò nùɖiɖi mɛ.” (Kolo. 2:6, 7) É ɖò mɔ̌ có, cobonu Xó Jehovah tɔn na ɖó hlɔnhlɔn ɖò gbɛzán mǐtɔn mɛ ɔ, mǐ ɖó na nɔ lin tamɛ kpɔ́n d’eji bo na nɔ lɛ́ zán nugbodòdó e ɖ’emɛ lɛ é. (Ebl. 4:12; Ja. 1:22-25) Sɔgbe kpo Traduction du monde nouveau kpo ɔ, Jozuwée 1:8 ɖɔ: “Sɛ́nwema elɔ ɖó na nɔ zɔ nú nu towe ǎ; a ɖó na nɔ xà kpo gbè dɛ̌dɛ̌ kpo ɖò zǎn kpo kéze kpo, bo na dó sixu wà nǔ sɔgbe xá nǔ e è wlan d’emɛ lɛ é bǐ tɛnwin lɛnwin; ɖó enɛ gudo ɔ ali towe na kpa we bɔ a na wà nùnywɛnú.” Wemafɔ enɛ ɖè wlɛnwín nùxixa tɔn e nɔ hɛn lè wá é atɔn xlɛ́: (1) Nɔ xà Xó Mawu Tɔn “zǎn kpo kéze kpo.” (2) Nɔ xà “kpo gbè dɛ̌dɛ̌ kpo,” é wɛ nyí ɖɔ a na nɔ xà ɖò alɔkpa ɖé mɛ bo na dó sixu lin tamɛ kpɔ́n bo lɛ́ dó nukún nǔ e jɛ lɛ é kpo ninɔmɛ lɛ kpo mɛ kpɔ́n. (3) Nɔ wà nǔ sɔgbe xá “nǔ e è wlan d’emɛ lɛ é bǐ.” Wěɖexámɛ enɛ lɛ zinzan na zɔ́n bɔ gbɛzinzan ayihɔngbe ayihɔngbe tɔn mǐtɔn na “kpa” mǐ bɔ mǐ na lɛ́ “wà nùnywɛnú.”