KLISANWUN GBƐ̀ ZINZAN

Kplé Aklunɔzán Gblamɛ Tɛntin Tɔn Sín Nǔ Yɔyɔ̌ Ðé

Bɛ́sín janvier 2018 ɔ, tinmɛ ɖevo lɛ gɔ́ nú ɖiɖe lɛ kpo video lɛ kpo e ɖò Les Saintes Écritures. Traduction du monde nouveau nùkplɔnkplɔn tɔn (nwtsty) mɛ, bo ɖò ɛntɛnɛti jí é na nɔ tɔ́n ɖò kplé aklunɔzán gblamɛ tɛntin tɔn mɛ, enyi é na bo ma tlɛ ko ɖò gbè towe mɛ dìn ǎ ɔ nɛ. É ɖò wɛn ɖɔ nǔ enɛ lɛ na gɔ́ sò nú lee a nɔ sɔnǔ nú kplé lɛ gbɔn é. Hú mɔ̌ ɔ, ye ni d’alɔ we bonu a ni sɛkpɔ Tɔ́ mǐtɔn wanyiyinɔ Jehovah d’eji!

TINMƐ ÐEVO LƐ

Tinmɛ ɖevo lɛ nɔ na mɔjɛmɛ ɖevo lɛ dó aca, xá kpo gbè kpo jí ɖò wemafɔ Biblu tɔn gègě mɛ.

Matie 12:20

Myɔ e ko ɖò cící wɛ é: Ko wɛ è nɔ dó bló zogbɛ́n e è nɔ zán ɖò kpaà mɛ ɖò xwé lɛ gbè é, bo nɔ kɔn olivumi d’emɛ. Zogbɛ́nkan ɖé nɔ dɔn ami ɔ wá zogbɛ́n ɔ nu bɔ zo nɔ xɛ. Xógbe Glɛkigbe tɔn e è zán nú “myɔ e ko ɖò cící wɛ é” sixu dó gesí zogbɛ́nkan e ɖò azɔ sì wɛ bo ko ɖò na cí wɛ é ɖé. Nǔɖɔɖ’ayǐ e ɖò Ezayíi 42:3 mɛ é kɛnu dó wuvɛ̌sexámɛ Jezu tɔn wu; é na cí nukúnɖiɖo gudogudo tɔn mɛɖesɔhwetɔ́ lɛ kpo mɛ e awakanmɛ gbɔjɔ na lɛ é kpo tɔn ǎ.

Matie 26:13

Nugbǒ: Xókwin Ebléegbe tɔn ʼa·menʹ e è lilɛ dó a·menʹ ɖò Glɛkigbe mɛ é sín tinmɛ wɛ nyí “ni nyí mɔ̌,” alǒ “é ni cɛ́.” Jezu nɔ zán xókwin enɛ hwɛhwɛ dó bɛ́ xó ɖé, dó dó akpá ɖé, alǒ dó ɖɔ nùɖé ɖ’ayǐ, bo nɔ dó ɖexlɛ́ ɖɔ nǔ e ɖɔ wɛ emi ɖè é nyí nugbǒ, bo kún na gblá ó. Lee Jezu nɔ zán xókwin “nugbǒ” alǒ nicɛ ɔ gbɔn é kpé wè ɖò wema mímɛ́ lɛ mɛ ǎ. Hwenu e Jezu vɔ́ xókwin (a·menʹ a·menʹ) ɖɔ ɖebɔdoɖewu, lee é nyí gbɔn ɖò Wɛnɖagbe-Wema Jaan tɔn mɛ é ɔ, è lilɛ xókwin e é zán é dó “nugbǒ.”—Jn 1:51.

ÐIÐE LƐ KPO VIDEO LƐ KPO

Fɔtóo lɛ, ɖiɖe lɛ, video e ma ɖó nùxixo ǎ lɛ é kpo ɖiɖe e nɔ danwǔ lɛ é kpo nɔ na tinmɛ ɖevo lɛ dó nǔ ɖěɖee è wlan dó Biblu mɛ lɛ é jí.

Bɛtifajée, Olivutínsó ɔ, kpo Jeluzalɛmu Kpo

Video klewun elɔ xlɛ́ ali e è nɔ gbɔn yì Jeluzalɛmu sín gletoxo et-Tour tɔn égbé tɔn mɛ ɖò zǎnzǎnhweji é; è lin ɖɔ gletoxo enɛ wɛ nyí Bɛtifajée Biblu mɛ tɔn e ɖò Olivutínsó ɔ sín ta lɛ ɖokpo nu é. Betaníi ɖò zǎnzǎnhweji Bɛtifajée tɔn, ɖò Olivutínsó ɔ sín zǎnzǎnhweji. Enyi Jezu kpo ahwanvu tɔn lɛ kpo wá Jeluzalɛmu ɔ, ye nɔ dɔ́ Betaníi ee è nɔ ylɔ égbé ɖɔ el-ʽAzariyé (El ʽEïzariya) é, Alabu nyikɔ ɖé wɛ bɔ tinmɛ tɔn nyí “Nɔtɛn Lazáa Tɔn.” É ɖò wɛn ɖɔ Mata, Mali, kpo Lazáa kpo sín xwégbe wɛ Jezu nɔ nɔ. (Mt 21:17; Mk 11:11; Lk 21:37; Jn 11:1) Enyi Jezu gosin xwé yetɔn gbè bo xwè Jeluzalɛmu ɔ, é sixu ko gbɔn ali e video ɔ xlɛ́ é ɖɔhun ɖokpo jí. Hwenu e Jezu xá tócíví ɖé jí ɖò Olivutínsó ɔ jí xwè Jeluzalɛmu ɖò 9 Nisáan 33 H.M. tɔn é ɔ, é sixu ko mlɛ́ ali e gosin Bɛtifajée yì Jeluzalɛmu é.

Ali e gosin Betaníi yì Bɛtifajée é
Bɛtifajée
Olivutínsó
Tɔdo Sedlɔn Tɔn
Só E Jí Tɛmpli ɔ Ðè É

Hunjɛ́n Ðò Afɔgbɛnnuxú ɖé Mɛ

Fɔtóo e xlɛ́ afɔgbɛnnuxú gbɛtɔ́ tɔn e mɛ è xwè hunjɛ́n e ɖó santimɛtlu 11,5 dó, bɔ è vɔ́ bló pɛ́pɛ́pɛ́ é ɖé wɛ nyí elɔ. È mɔ dòdó ɔ ɖò 1968, hwenu e è ɖò dò kun wɛ ɖò totaligbé Jeluzalɛmu tɔn é, bo mɔ ɖɔ Hlɔmanu lɛ sín táan mɛ ɖokpoo wɛ é ko tíìn. Enɛ na kúnnuɖenú dobanunǔ dò kunkun tɔn e xlɛ́ ɖɔ è nɔ zán hunjɛ́n lɛ dó xwè mɛ e è ɖó kúhwɛ́ na lɛ é dó atín wu é. Hunjɛ́n enɛ sixu ko cí ee sɔja Hlɔmanu lɛ zán dó xwè Jezu Klisu dó atín wu é ɖɔhun. È mɔ afɔgbɛnnuxú ɔ ɖò awinnyagbá e mɛ è nɔ bɛ́ xú mɛ e ko kú bɔ agbaza tɔn ko nyɔ é tɔn lɛ dó é ɖé mɛ. Enɛ xlɛ́ ɖɔ è nɔ ɖi mɛ e è ɖó kúhwɛ́ na bo xwè dó atín wu é ɖé.—Mt 27:35.