Axɔ́su Agbahwlɛntɔ́ lɛ Ðò Azǎn Gudogudo Tɔn lɛ Mɛ
Axɔ́su Agbahwlɛntɔ́ lɛ Ðò Azǎn Gudogudo Tɔn lɛ Mɛ Nǔɖɔɖ’ayǐ e xó è ɖɔ ɖò Gbǎví Nǔtinmɛ Tɔn elɔ mɛ lɛ é tinmɛ nǔ e jɛ ɖò táan ɖokpo ɔ mɛ lɛ é. Ye xlɛ́ ɖò ali gegě nu ɖɔ mǐ ɖò gbɛ̀ nɔ wɛ ɖò “nǔ lɛ bǐ sín fifó hwenu” alǒ, ɖò azǎn gudogudo tɔn lɛ mɛ.—Dan. 12:4.
Wemafɔ (lɛ): Nǔɖe. 11:7; 12:13, 17; 13:1-8, 12
Nǔɖɔɖ’ayǐ: “Kanlin” ɔ na kp’acɛ dó ayikúngban ɔ jí nú xwè kanweko mɔkpan. Ðò azǎn gudogudo tɔn lɛ mɛ ɔ, è na gblewǔ kanlin ɔ sín ta tɛnwegɔ́ ɔ. Nukɔnmɛ ɔ, ta enɛ sín akpa na kú, bɔ “gbɛtɔ́ e ɖò ayikúngban jí lɛ bǐ” na xwedó kanlin ɔ. Satáan na zán kanlin enɛ dó ‘fun ahwan xá nyɔnu ɔ sín vǐ e kpò lɛ é.’
Jijɛnu tɔn: Ðò Sinvɔgbɛ ɔ gudo ɔ, acɛkpikpa gbɛtɔ́ tɔn e fɔ́n gǔ dó Jehovah jí lɛ é wá xwetɔ́n. Xwè kanweko mɔkpan gudo ɖò Wɛkɛ Hwan Nukɔntɔn ɔ hwenu ɔ, acɛkpikpa Grande-Bretagne tɔn vɔ́da bǐ. É lɛ́ mɔ hlɔnhlɔn hwenu e é jɛ akɔ xá États-Unis é. Ðò azǎn gudogudo tɔn elɔ mɛ wɛ Satáan ɖò tuto toxóɖiɖɔ tɔn gbɛ̀ elɔ tɔn zán dó dóya nú togun Mawu tɔn wɛ tawun.
Wemafɔ (lɛ): Dan. 11:25-45
Nǔɖɔɖ’ayǐ: Ðò azǎn gudogudo tɔn lɛ mɛ ɔ, axɔ́su totaligbé tɔn ɔ kpo tofɔligbé tɔn ɔ kpo na hwlɛn agba xá yeɖée.
Jijɛnu tɔn: Allemagne kpo Anglo-Amérique kpo tɔ́n ahwan yeɖée. Ðò 1945 ɔ, Union Soviétique kpo ahwan tɔn lɛ kpo huzu axɔ́su totaligbé tɔn ɔ. Ðò 1991 ɔ, Union Soviétique j’ayǐ, b’ɛ wá yá é ɔ, Russie kpo ahwan tɔn lɛ kpo huzu axɔ́su totaligbé tɔn ɔ.
Wemafɔ (lɛ): Eza. 61:1; Mal. 3:1; Luk. 4:18
Nǔɖɔɖ’ayǐ: Jehovah na sɛ́ “wɛnsagun” tɔn dó, bonu é na ‘bló ali ɖó’ cobonu è na ɖó Axɔ́suɖuto Mɛsiya tɔn ɔ ayǐ. Wɛnsagun ɔ na jɛ ‘wɛnɖagbe ɖé dó wamamɔnɔ lɛ’ jí.
Jijɛnu tɔn: Bɛ́sín 1870 ɔ, Nɔví Russell kpo gbɛ̌ tɔn lɛ kpo w’azɔ̌ kpo kanɖodónǔwu kpo, bo mɔ nǔ jɛ nǔ e Biblu kplɔ́n mɛ tawun lɛ é mɛ. Ðò 1881 ɔ, ye jɛ ɖɛ̌ tɛ jí jí ɖɔ mɛsɛntɔ́ Mawu tɔn lɛ ɖó na jla wɛnɖagbe ɔ. Ye ɖè xóta ɖé lɛ tɔ́n, ɖi “È Ðò Wɛnjlatɔ́ 1 000 Ba Wɛ,” “Gbigbɔ Ðè Mi Bonu Mi Na Jla Wɛnɖagbe Ɔ.”
Wemafɔ (lɛ): Mat. 13:24-30, 36-43
Nǔɖɔɖ’ayǐ: Kɛntɔ́ ɖé dó gbehan nyanya lɛ dó jinukún ɖagbe lɛ tɛntin, bɔ è jó gbehan nyanya lɛ dó, bɔ ye sù, bo bla ta nú jinukún lɛ kaka jɛ nǔkún-yiya hwenu; enɛ gudo ɔ, è na ɖè gbehan nyanya lɛ ɖó vo nú jinukún lɛ.
Jijɛnu tɔn: Bɛ́sín 1870 ɔ, è jɛ Klisanwun nǔgbo lɛ tuùn ɖó vo nú Klisanwun nǔvú lɛ jí. Ðò azǎn gudogudo tɔn lɛ mɛ ɔ, è ɖè Klisanwun nǔgbo lɛ ɖó vo nú Klisanwun nǔvú lɛ, bo xò ye kplé dó agun lɛ mɛ.
Wemafɔ (lɛ): Dan. 2:31-33, 41-43
Nǔɖɔɖ’ayǐ: Bocyɔ e è sɔ́ gan alɔkpa alɔkpa dó bló é ɔ, gan kpo ko kpo wɛ è cáká ɖó kpɔ́ dó bló afɔ tɔn lɛ.
Jijɛnu tɔn: Ko ɔ nɔte nú gbɛtɔ́ e ɖò Anglo-Amérique sín acɛ glɔ́, bo ka nɔ lɛ́ fɔ́n gǔ dó acɛkpikpa enɛ jí lɛ é. Mɛ enɛ lɛ zɔ́n bɔ acɛkpikpa enɛ sɔ́ nɔ sixu kpéwú bo nɔ wà nǔ gan ɖɔhun ǎ.
Wemafɔ (lɛ): Mat. 13:30; 24:14, 45; 28:19, 20
Nǔɖɔɖ’ayǐ: È xò “jinukún lɛ” kplé dó “agɔ̌” mɛ, bo sɔ́ ‘deví gbejinɔtɔ́, ayiɖotenanɔ ɔ’ ɖó mɛ e ɖò “xwé” ɔ gbè lɛ é nu. È jɛ “axɔ́suɖuɖu Mawu tɔn sín Wɛnɖagbe” jla “gbɛ̀ ɔ bǐ” jí.
Jijɛnu tɔn: Ðò 1919 ɔ, è sɔ́ deví gbejinɔtɔ́ ɔ ɖó togun Mawu tɔn nu. Bɛ́sín hwenɛnu ɔ, Biblu Kplɔntɔ́ lɛ bló bɔ wɛnjijlazɔ́ ɔ vunkan. Égbé ɔ, Kúnnuɖetɔ́ Jehovah tɔn lɛ nɔ ɖekúnnu ɖò tò 200 jɛji mɛ, bo nɔ ɖè wema jinjɔn Biblu jí lɛ tɔ́n dó gbè 1 000 jɛji mɛ.
Wemafɔ (lɛ): Dan. 12:11; Nǔɖe. 13:11, 14, 15
Nǔɖɔɖ’ayǐ: Kanlin zo wenɔ ɔ nɔ nukɔn bɔ è bló ‘kanlin ɔ sín akpajlɛ’ ɖé, bɔ é na ‘gbɛ̀ kanlin ɔ sín akpajlɛ’ ɔ.
Jijɛnu tɔn: Anglo-Amérique e nyí Acɛkpikpa E Ðó Agbɔ̌n Hú Bǐ Ðò Gbɛ̀ ɔ Mɛ É é nɔ nukɔn bɔ è sɔnǔ nú Akɔjijɛ Akɔta lɛ tɔn. Akɔta ɖevo lɛ nɔ gudo nú tutoblonunu enɛ. Axɔ́su totaligbé tɔn ɔ lɔ wá byɔ Akɔjijɛ Akɔta lɛ tɔn mɛ ɖò 1926, bo tɔ́n sín mɛ ɖò 1933. Akɔjijɛ Akɔta lɛ tɔn ɖɔhun ɔ, Gbɛ̌ Kplékplé Akɔta lɛ tɔn (sɛ́nkpo tɔn dó Flansegbe mɛ: ONU) lɔ xɔ susu e Axɔ́suɖuto Mawu tɔn kɛɖɛ wɛ jɛxa é nú éɖée.
Wemafɔ (lɛ): Dan. 8:23, 24
Nǔɖɔɖ’ayǐ: Axɔ́su hunnylatɔ́ ɖé “na dɔn nǔ gegě gúdú.”
Jijɛnu tɔn: Acɛkpikpa E Ðó Agbɔ̌n Hú Bǐ Ðò Gbɛ̀ ɔ Mɛ É, Anglo-Amérique dɔn nǔ gegě gúdú. Ði kpɔ́ndéwú ɔ, ɖò Wɛkɛ Hwan Wegɔ́ ɔ hwenu ɔ, États-Unis dɔn nǔ gegě gúdú, bɔ mɔhun ko jɛ kpɔ́n ǎ, hwenu e é da bɔnbu we dó acɛkpikpa weɖobǔ gbɛ̀ ɔ tɔn sín akɔta e nyí kɛntɔ́ yetɔn ɖé é é.
Wemafɔ (lɛ): Dan. 11:31, nwt; Nǔɖe. 17:3, 7-11
Nǔɖɔɖ’ayǐ: Kanlin “vɔvɔ cɛ́cɛ́” e ɖó zo wǒ é tɔ́n sín domaɖó-azan ɔ mɛ, bo lɛ́ nyí axɔ́su tantɔngɔ́ ɔ. Wema Daniyɛli tɔn dó gesí axɔ́su enɛ, bo ɖɔ ɖɔ é cí “nǔ e xyɔwǔ” é ɖé ɖɔhun.
Jijɛnu tɔn: Akɔjijɛ Akɔta lɛ tɔn wá vivɔnu ɖò Wɛkɛ Hwan Wegɔ́ ɔ hwenu. Ðò ahwan ɔ gudo ɔ, è “ɖó” ONU “ayǐ.” Akɔjijɛ Akɔta lɛ tɔn ɖɔhun ɔ, ONU lɔ xɔ susu e Axɔ́suɖuto Mawu tɔn wɛ jɛxa é nú éɖée. ONU na tɔ́n ahwan sinsɛn lɛ.
Wemafɔ (lɛ): 1 Tɛ. 5:3; Nǔɖe. 17:16
Nǔɖɔɖ’ayǐ: Akɔta lɛ na jla ɖɔ “fífá tíìn, bɔ ayi jɛ ayǐ,” bɔ “zo wǒ” lɛ kpo “kanlin” ɔ kpo na tɔ́n ahwan “agalɛtɔ́ ɔ” bo na sú kún dó n’i. Enɛ gudo ɔ, è na sú kún akɔta lɛ tɔn dó.
Jijɛnu tɔn: Akɔta lɛ sixu jla ɖɔ emi bló bɔ fífá kpo ayijayǐ kpo tíìn. Enɛ gudo ɔ, akɔta ɖěɖee ɖò gudo nú ONU lɛ é na sú kún dó nú tutoblonunu sinsɛn nǔvú tɔn lɛ bǐ. Enɛ wɛ na hun nǔ sín ya ɖaxó ɔ nu. Ya ɖaxó enɛ na wá vivɔnu hwenu e è na sú kún dó nú gbɛ̀ ɔ ɖò Haamagedɔni hwenu é.
Wemafɔ (lɛ): Ezek. 38:11, 14-17; Mat. 24:31
Nǔɖɔɖ’ayǐ: Gɔgu na tɔ́n ahwan togun Mawu tɔn. Enɛ gudo ɔ, wɛnsagun lɛ na xò “mɛ e Mawu cyan lɛ” é kplé.
Jijɛnu tɔn: Axɔ́su totaligbé tɔn ɔ kpo acɛkpikpa ɖevo e kpò lɛ é kpo na tɔ́n ahwan togun Mawu tɔn. Ðò hweɖenu ɖò ahwantɔ́nmɛ enɛ gudo ɔ, è na xò mɛ yí ami dó ɖè e kpò lɛ é kplé dó jixwé.
Wemafɔ (lɛ): Ezek. 38:18-23; Dan. 2:34, 35, 44, 45; Nǔɖe. 6:2; 16:14, 16; 17:14; 19:20
Nǔɖɔɖ’ayǐ: ‘Mɛ e ɖò sɔ́ wewé ɔ jí ɔ’ “na ɖu ɖ’eji” yì fó gbɔn kún súsú dó nú Gɔgu kpo ahwan tɔn lɛ kpo gblamɛ. ‘È sɔ́ kanlin ɔ nyi dó myɔ togotogo ɔ mɛ,’ bo gbà bocyɔ aditi ɔ.
Jijɛnu tɔn: Jezu, ee nyí Axɔ́su nú Axɔ́suɖuto Mawu tɔn é na wá hwlɛn togun Mawu tɔn. Jezu kpo 144 000 e na kp’acɛ xá ɛ lɛ é kpo gɔ́ nú wɛnsagun lɛ na sú kún dó nú akɔta ɖěɖee tɔ́n ahwan togun Mawu tɔn é bǐ. Enɛ wɛ na ɖó nǔ gbɛ̀ Satáan tɔn nu.