Nǔ E Mɛ lɛ Nɔ Ðɔ Dó Ðɛxixo Wu É
“Enyi un xoɖɛ ɔ, é nɔ cí nú mì ɖɔ Mawu ɖò akpá ce, bo hɛn alɔ ce, bo ɖò ali xlɛ́ mì wɛ hwenu e un ɖò bubú wɛ é ɖɔhun.”—MARÍA.
“Asì ce kú, hwenu e é ko ɖí xwi xá kansɛ́ɛzɔn nú xwè 13 gudo é. Un flín ɖɔ un nɔ xoɖɛ sɛ́dó Mawu gbè bǐ gbè, bo nɔ lɛ́ mɔ ɖɔ é nɔ ɖótó mì nǔgbo hwenu e un ɖò wuvɛ̌ mɛ é. Enɛ nɔ zɔ́n bɔ un nɔ vo ɖ’ayi mɛ.”—RAÚL.
“Ðɛ ɔ, nǔnina ɖaaɖagbe ɖé wɛ é nyí, bɔ Mawu na gbɛtɔ́ lɛ.”—ARNE.
Nú María, Raúl, Arne kpo mɛ gegě ɖevo lɛ kpo ɔ, ɖɛ nyí nǔnina bǔnɔ ɖé. Ye nɔ mɔ ɖɔ mǐ sixu ɖɔ xó nú Mawu, dó kú n’i, bo lɛ́ byɔ alɔdó tɔn gbɔn ɖɛxixo gblamɛ. Ye kúdeji mlɛ́mlɛ́ ɖɔ nǔ e Biblu ɖɔ dó ɖɛxixo sɛ́dó Mawu wu é ɔ, nǔgbo wɛ: “Mǐ ɖó ganjɛwu kpíkpé ɖò Mawu nukɔn ɖɔ mǐ byɔ nǔ ɖebǔ nú é sɔgbe xá jlǒ tɔn ɔ, é nɔ ɖótó mǐ.”—1 Jaan 5:14.
Ðò alɔ ɖevo mɛ ɔ, é nɔ vɛwǔ nú mɛ gegě bɔ ye na yí gbè nú nǔ e Biblu ɖɔ dó ɖɛxixo wu é. Steve ɖè lee nǔ cí n’i dó ɖɛxixo wu é xlɛ́, bo ɖɔ: “Hwenu e un ɖò xwè 17 mɔ̌ ɖó wɛ é ɔ, xɔ́ntɔn ce atɔn kú ɖò nǔ d’abaɖa we hwenu. Mɔ̌to gbà dó mɛ ɖokpo b’ɛ kú, bɔ xù sɔ́ mɛ we ɖě lɛ yì.” Etɛ Steve ka wà? “Un xoɖɛ sɛ́dó Mawu bo na dó tuùn nǔ e wu nǔ enɛ lɛ bǐ jɛ é, amɔ̌, un mɔ sinkɔn ɖě ǎ. Enɛ wu ɔ, un kanbyɔ nyiɖée ɖɔ, ‘Tɛwu un ka na kpò ɖò ɖɛ xò wɛ?’” Mɛ gegě nɔ mɔ ɖɔ è kún na sinkɔn nú ɖɛ emitɔn lɛ ó, bɔ enɛ wu ɔ, ye nɔ kan nǔ e wu ye ɖó na kpò ɖò ɖɛ xò wɛ é byɔ yeɖée.
É nɔ lɛ́ sín nǔ ɖevo lɛ wu, bɔ mɛ lɛ nɔ xò nǔ kpɔ́n dó ɖɛxixo wu. Mɛɖé lɛ nɔ ɖɔ ɖɔ, ɖó Mawu tuùn nǔ lɛ bǐ wu ɔ, é ko tuùn nǔ e hudo mǐ lɛ é kpo ninɔmɛ e ɖí xwi xá wɛ mǐ ɖè lɛ é kpo, enɛ wu ɔ, é kún sɔ́ byɔ ɖɔ è ni ɖɔ nǔ enɛ lɛ n’i ó.
Mɛ ɖevo lɛ ɖi ɖɔ Mawu kún nɔ ba na ɖótó ɖɛ yetɔn lɛ ó, ɖó nǔ e ye wà nyi dò wá yì lɛ é wu. Jenny ɖɔ: “Wuvɛ̌ ɖaxó e un nɔ mɔ hugǎn é wɛ nyí ɖɔ, un nɔ mɔ ɖɔ un kún hwɛ́n nǔtí ó. Un wà nǔ e wá vɛ́ nú mì lɛ é, enɛ wu ɔ, un nɔ ɖɔ nú nyiɖée ɖɔ un kún jɛxa bonu Mawu na ɖótó mì ó.”
Nɛ̌ nǔ ka nɔ cí nú we dó ɖɛxixo wu? Enyi nǔ ko cí mɔ̌ nú we kpɔ́n, alǒ, a nɔ xò nǔ kpɔ́n dó ɖɛxixo wu wɛ nyí ɔ, tuùntuùn ɖɔ xósin e sixu jɛmɛ nú mɛ lɛ é ɖò Biblu mɛ sixu dó gbɔ nú we. Mǐ sixu ɖeji dó nǔ e Biblu ɖɔ dó ɖɛxixoa wu é wu, é sixu d’alɔ we bɔ a na mɔ xósin nú nǔkanbyɔ lěhun lɛ:
Mawu ka nɔ ɖótó ɖɛ mǐtɔn lɛ dóo à?
Tɛwu è ma ka nɔ mɔ sinkɔn nú ɖɛ ɖé lɛ ǎ?
Nɛ̌ a ka sixu xoɖɛ gbɔn bɔ Mawu na sè?
Ðagbe tɛ lɛ ɖɛxixo ka sixu wà nú we?
a Ðɛ e mɛsɛntɔ́ Mawu tɔn lɛ gegě xò é ɖò Biblu mɛ, kaka jɛ ɖěɖee Jezu Klisu xò lɛ é jí. Ðɛ 150 jɛji wɛ ɖò Akpáxwé Biblu Tɔn E È Wlán Dó Ebléegbe Mɛ, bɔ mɛ lɛ nɔ ylɔ́ ɖɔ Alɛnuwema Xóxó ɔ é mɛ.