Yě nyɔ́ xomɛ dó cukú ce lɛ́ wú

“Ényí gbɛtɔ́ lɛ́ kɛ́ɖɛ́ wú wɛ Kúnnuɖetɔ́ lɛ́ nɔ nyɔ́ xomɛ dó ǎ, yě nɔ lɛ́ nyɔ́ xomɛ dó cukú ce lɛ́ lɔ wú. Gbe ɖokpó ɔ, Elaine e ɖo te ɖo kɛkɛ́ví ɔ kpá é ná bisikwíti cukú ce we lɛ́. Énɛ́ gúdo ɔ, un kplá cukú ce lɛ́ bónú mǐ sɛkpɔ́ kɛkɛ́ví ɔ hweɖébǔnu ɔ, yě nɔ ba ná yi Kúnnuɖetɔ́ lɛ́ gɔ́n, bónú yě ná ná yě bisikwíti.

“Ée sun lɛ́ ɖo wǐwá yi wɛ é ɔ, cukú lɛ́ nɔ ɖu vǐví bisikwíti yětɔn tɔn, bɔ nyɛ nɔ ɖu vǐví xóɖɔɖókpɔ́ kléwún ɖé tɔn xá Kúnnuɖetɔ́ lɛ́. Amɔ̌, un nɔ ba ná ɖɔ xó ɖó kpɔ́ xá yě dín ǎ. Xwe 70 jɛjí wɛ un ɖó, un ka tuun nǔ káká ɖé dó nǔ e Kúnnuɖetɔ́ lɛ́ ɖi nǔ ná lɛ́ é wú ǎ. Ðó sinsɛn lɛ́ gěgé ko flú mì wútu ɔ, un mɔ ɖɔ é ná nyɔ́ hú gǎn ɖɔ nyiɖésú ní kplɔ́n Biblu ɔ nú nyiɖée.

“Hwenɛ́nu ɔ, un lɛ́ xo go Kúnnuɖetɔ́ ɖěvo lɛ́ ɖo toxo ɔ sín awa ɖěvo lɛ́ xwé, bɔ yě nɔ ɖo te ɖo kɛkɛ́ví yětɔn lɛ́ kɔn. Hwebǐnu wɛ yě lɔ nɔ nyɔ́ xomɛ dó mɛ wú. Hwe lɛ́ bǐ nu wɛ yě nɔ zán Biblu dó ná xósin nú nǔkanbyɔ́ ce lɛ́, bɔ énɛ́ zɔ́n bɔ un lɛ́ ɖeji dó yě wú hú gǎn.

“Gbe ɖokpó ɔ, Elaine kanbyɔ́ mì ɖɔ: ‘Mi ka lin ɖɔ kanlin lɛ́ ɔ, nǔníná ɖé wɛ yě nyí bó gosín Mawu gɔ́n a?’ Bɔ un yí gbe n’i ɖɔ: ‘Ɛɛn, un tuun mɔ̌ ganjí!’ Énɛ́ gúdo ɔ, Elaine xa Ezayíi 11:6-9 nú mì. Bɛ́sín hwenɛ́nu ɔ, un ba ná kplɔ́n Biblu. Amɔ̌, káká jɛ fínɛ́ ɔ, un ba ná yí nǔ ɖěbǔ ɖo Kúnnuɖetɔ́ lɛ́ sí bá xa ǎ.

“Ðo azǎn e bɔ d’é wú lɛ́ é mɛ ɔ, un lɛ́ mɔ Elaine kpó asú tɔn Brent kpó, bɔ mǐ ɖɔ xó dó nǔ kléwún kléwún e dɔn mɛ tawun lɛ́ é jí. Yě byɔ́ mì ɖɔ nyi ní xa Matíe jɛ Mɛsɛ́dó, bó ná dó mɔ nǔ jɛ nǔ e è ní wa nǔ Klísu ɖɔhun nyí é wú. Bɔ un xa nǔgbó. É sɔ́ lín ǎ bɔ un yí gbe bó ná kplɔ́n Biblu xá Brent kpó Elaine kpó. Juin mɛ mɔ̌ wɛ, ɖo 2016.

“Un nɔ ɖo nukún ɖó Biblu e un nɔ kplɔ́n ɖo aklúnɔzángbla lɛ́ bǐ mɛ é kpó kplé e mǐ nɔ bló ɖo kpléxɔ Axɔ́súɖuto ɔ tɔn mɛ lɛ́ é kpó wɛ. Xomɛ hun mì tawun ɖɔ un ɖo nǔ e Biblu ɖɔ nǔgbó lɛ́ é kplɔ́n wɛ. É ná bló xwe ɖokpó vɛlɛɛ mɔ̌ é ɔ, un bló batɛ́mu bó húzú Kúnnuɖetɔ́. Din ɔ, xwe 79 wɛ un ɖó, bɔ xomɛ hun mì tawun ɖɔ un mɔ sinsɛn nǔgbó ɔ. Jehovah kɔn nyɔ̌ná dó jǐ ce gbɔn alɔ e é dó mì, bɔ un ɖo mɛsɛntɔ́ tɔn e gbɔn gbɛ ɔ bǐ mɛ lɛ́ é mɛ é gblamɛ.”