A ka tuun a?
Étɛ́wú toɖévomɛnu lɛ́ ka nɔ ahwankpá axɔ́sú Davídi tɔn mɛ?
AHWANFUNTƆ́ toɖévomɛnu élɔ́ lɛ́ nɔ ahwankpá Davídi tɔn mɛ: Sɛlɛ́ki Amumɔ́ɔ ví ɔ, Ulíi Hitíti ɔ kpó Yitúma Mɔwábunu ɔ kpó.a (1 Tan 11:39, 41, 46) ‘Keleti lɛ́, Pɛlɛ́ti ví lɛ́ kpó Gati ví lɛ́ kpó’ lɔ ɖo ahwankpá Davídi tɔn mɛ. (2 Sam. 15:18) É cí ɖɔ Keleti lɛ́ kpó Pɛlɛ́ti ví lɛ́ sɛkpɔ́ Filisitɛ́ɛn lɛ́ tawun ɖɔhun. (Ezek. 25:16) Gati ví lɛ́ ɔ, toxo Filisitɛ́ɛn lɛ́ tɔn Gati mɛ wɛ yě nɔ nɔ.—Joz. 13:2, 3; 1 Sam. 6:17, 18.
Étɛ́wú Davídi ka sixú ko yí toɖévomɛnu lɛ́ dó ahwankpá tɔn mɛ? É kú d’é jí ɖɔ yě ɖo gbejí nú émí, bɔ tají hú bǐ ɔ, yě ɖo gbejí nú Jexóva. Ði kpɔ́ndéwú ɔ, The New Interpreter’s Dictionary of the Bible ɖɔ dó Keleti lɛ́ kpó Pɛlɛ́ti ví lɛ́ kpó wú ɖɔ: “Yě nɔ gbejí nú Davídi ɖo hwenu e vɛ́ wǔ n’i hú gǎn ɖo axɔ́súɖuɖu tɔn hwenu lɛ́ é mɛ.” Nɛ̌ yě ka wa mɔ̌ gbɔn? Hwenu e “Izlayɛ́li ví lɛ́ bǐ” jó axɔ́sú Davídi dó bo jɛ ‘nya nǔvɔ́nɔ e nɔ nyí Cɛ́va’ é gúdo é ɔ, Keleti lɛ́ kpó Pɛlɛ́ti ví lɛ́ kpó kpo ɖo gbejí nú Davídi, bo d’alɔ bɔ è ɖó nǔ gǔfínfɔ́n Cɛ́va tɔn nu. (2 Sam. 20:1, 2, 7) É wá su hweɖévonu bɔ axɔ́sú Davídi sín vǐ Adoniyási tɛ́n kpɔ́n bá xo axɔ́súzinkpo ɔ yí. Amɔ̌, Keleti lɛ́ kpó Pɛlɛ́ti ví lɛ́ kpó kpo ɖo gbejí nú Davídi, bo d’alɔ bɔ è sɔ́ Salomɔ́ɔ ɖó axɔ́súzinkpo jí; Salomɔ́ɔ wɛ Jexóva sɔ́ bɔ é ná jɛ axɔ́sú ɔ domɛ.—1 Axɔ́. 1:24-27, 38, 39.
Toɖévomɛnu ɖěvo e nɔ gbejí nú Davídi tawun é wɛ nyí Itáyi Gatinu ɔ. Itáyi kpó ahwanfuntɔ́ tɔn 600 lɛ́ kpó nɔ gǔdo nú axɔ́sú Davídi hwenu e Davídi sín vǐ Abusalɔ́mu fɔ́n gǔ, bo lílɛ́ jɔ nú ayi súnnu e ɖo Izlayɛ́li lɛ́ é tɔn sín axɔ́sú ɔ gúdo é. Ðo bǐbɛ́mɛ ɔ, Davídi ɖɔ nú Itáyi ɖɔ ahwan ɔ kún kan ɛ ó, ɖó toɖévomɛnu wɛ é nyí. Amɔ̌, Itáyi ɖɔ: ‘Jexóva ɖo gbɛ! Sɛ́mɛɖó ce axɔ́sú ɔ ɖo gbɛ; è yi fí ɖé ɔ, nyi lɔ ná yi. È nɔ gbɛ ɔ, nyi lɔ ná nɔ gbɛ. È kú ɔ, nyi lɔ ná kú!’—2 Sam. 15:6, 18-21.
Itáyi nɔ gbejí nú Davídi, axɔ́sú e Jexóva sɔ́ é
Toɖévomɛnu wɛ Keleti lɛ́, Pɛlɛ́ti ví lɛ́ kpó Gati ví lɛ́ kpó nyí có, yě ka tuun ɖɔ Jexóva wɛ nyí Mawu nǔgbó ɔ, bo nɔ ɖó sísí ɖaxó n’i, bo lɛ́ yí gbe ɖɔ Davídi wɛ nyí mɛ e Jexóva sɔ́ é. É ná ko su Davídi nukúnmɛ tawun ɖɔ é ɖó gbejínɔtɔ́ mɔ̌hun lɛ́ ɖo akpá.
a Sɛ́n Mawu tɔn e è wlán dó Sɛ́nflínmɛ 23:4-7 mɛ é gbɛ́ ɖɔ Amumɔ́ɔ ví lɛ́ kpó Mɔwábunu lɛ́ kpó kún ɖó ná byɔ́ Izlayɛ́li togun ɔ mɛ ó. Amɔ̌, é cí ɖɔ toɖévomɛnu énɛ́ lɛ́ kún ná nyí hǎgbɛ́ akɔta ɔ tɔn bǐ mlɛ́mlɛ́ ɖo sɛ́n linu ó dó gesí wɛ sɛ́n énɛ́ ɖe ɖɔhun, ényí gbígbɛ́ wɛ é ɖe ɖɔ yě kún ná nɔ dó gbɛ̌ xá togun Mawu tɔn, alǒ nɔ togun ɔ mɛ ó ǎ. Kpɔ́n Étude perspicace des Écritures, Volume 1, wěx. 100, 101.