Tɛ́n kpɔ́n bo kplɔ́n nǔ yɔ̌yɔ́ lɛ́ hwenu e a ɖo nǔ kplɔ́n wɛ é

Ée mǐ ná ɖo nǔ sɔ́ wɛ bo ná kplɔ́n nǔ é ɔ, mǐ sixú nɔ kan nǔ élɔ́ byɔ́ mǐɖée: ‘Étɛ́ ɖó nukún wɛ un ka ɖe bo ná kplɔ́n?’ Amɔ̌, é ná nyɔ́ ɖɔ mǐ ní ɖó ayi te bo ma lɔn nú nǔ e ɖó nukún wɛ mǐ ɖe lɛ́ é wá va nukún nú mǐ bónú mǐ gɔn ayi ɖó nǔ e kplɔ́n mǐ wɛ Jexóva ɖe é wú ó. Nɛ̌ mǐ ka sixú ɖótó nǔ e Jexóva ɖo tíntɛ́nkpɔ́n wɛ bo ná kplɔ́n mǐ é gbɔn?

Xo ɖɛ bo byɔ́ nǔnywɛ́. Byɔ̌ Jexóva ɖɔ é ní d’alɔ we bónú a ná tuun nǔ e é ba ɖɔ a ní kplɔ́n din é. (Ja. 1:5) Ma gán jɛ nǔ e a ko tuun é kɛ́ɖɛ́ kan mɛ kpowun ó.—Nǔx. 3:5, 6.

Ðǒ sísí nú hlɔ̌nhlɔ́n e Biblu ɖó b’ɛ ma kpé we ǎ é. “Xó Mawu tɔn ɖo gbɛ.” (Ebl. 4:12) “Xó” Mawu tɔn e ɖo gbɛ é sixú w’azɔ̌ ɖo mǐ wú ɖo ali vovo nu hweɖébǔnu e mǐ xa Biblu ɔ é. Amɔ̌, tuun jɛ́n mǐ ná to tuun hwɛ̌ ɖɔ é byɔ́ ɖɔ mǐ ní kplɔ́n nǔ e kplɔ́n mǐ wɛ Mawu ɖe é cóbɔ nǔ ná nyí mɔ̌.

Nǔ e ɖo távo Jexóva tɔn jí lɛ́ é bǐ ní nɔ su nukún towe mɛ. Nǔɖuɖu gbigbɔ tɔn e é nɔ ná mǐ lɛ́ é cí “agɔ̌” e dó jǒ é ɖɔhun. (Eza. 25:6) Ma nɔ nyi alɔ nú xóta ɖěɖěe a lin ɖɔ émí kún ná ɖu vǐví yě kplɔ́nkplɔ́n tɔn lɛ́ é ó. É nyí le yětɔn kɛ́ɖɛ́ wɛ a ná ɖu ǎ, loɔ, nǔ e Mawu nɔ sɔ́ nǔ tɔn nú mɛ é ná lɛ́ dó awǎjijɛ nú we ɖésú!