Nǔ e sixú d’alɔ we bɔ a ná nɔ kplɔ́n nǔ ɖo gbesisɔmɛ é
É NƆ vɛ́ wǔ nú we bónú a ná nɔ kplɔ́n Biblu ɖo gbesisɔmɛ, bo lɛ́ ɖu vǐví tɔn wɛ a? Nǔ nɔ ɖibla nyí mɔ̌ nú mǐ mɛ bǐ hweɖélɛ́nu. Amɔ̌, lin tamɛ dó nǔ ɖěvo e mǐ nɔ bló ɖo gbesisɔmɛ lɛ́ é wú, ɖi wǔ lilɛ mɔ̌. Wǔ lilɛ nɔ byɔ́ hwenu kpó gǎndídó kpó, amɔ̌, kpɔ́n lěe lanmɛ nɔ fá sɔ hwenu e mǐ lɛ wǔ gúdo é! Biblu kplɔ́nkplɔ́n lɔ sixú zɔ́n bɔ mǐ ná nɔ ganjí. (Efɛ́. 5:26) Wěɖexámɛ ɖé lɛ́ ɖíe bo sixú d’alɔ:
Blǒ tuto ɖé. Biblu kplɔ́nkplɔ́n mɛɖésúnɔ tɔn ɖo “nǔ tají hú gǎn” ɖěɖěe klisánwun ɖé ma ɖó ná dó vɛ̌ ná ǎ lɛ́ é mɛ. (Filí. 1:10) Bo ná dó d’alɔ we bónú a ná nɔ xwedó tuto towe ɔ, étɛ́wú a ma ka ná tɛ́ ɛ ɖó fí e ɖo nukún jí é ɖé, ɖi dǒwútɛ ɖé jí alǒ sinfánú towe wú ǎ. Alǒ alǒkan towe sísɔ́ ɖó alɔ ɖé jí nú é ná nɔ flín we táan kpɛɖé jɛ nukɔn nú nǔkplɔ́nkplɔ́n ganmɛ ɔ, sixú d’alɔ.
Ba hwenu kpó nǔkplɔ́nkplɔ́n walɔ kpó e ná nyɔ́ nú we hú gǎn é. Nɛ̌ a ka nɔ ba ná kplɔ́n nǔ gbɔn? Ði kpɔ́ndéwú ɔ, é ka nɔ bɔ wǔ nú we bɔ a nɔ kplɔ́n nǔ nú ganxixo ɖokpó bɔ nǔ ɖěbǔ nɔ fɛ́ ayi towe ǎ a? Alǒ a nɔ ba ɖɔ nǔkplɔ́nkplɔ́n towe ní nɔ kléwún mɛ bo ka ná nɔ nyí hwɛhwɛ wɛ a? Hwi wɛ tuun nǔ e ná nyɔ́ nú we hú gǎn é. Énɛ́ wú ɔ, hɛn énɛ́ ayi mɛ hwenu e a ná ɖo tuto nǔkplɔ́nkplɔ́n tɔn towe bló wɛ é. Ényí nǔkplɔ́nkplɔ́n gan towe xo bɔ nǔkplɔ́nkplɔ́n ma ka sɔ́ jló we ǎ ɔ, étɛ́wú a ma ka ná wá gbeta ɔ kɔn bo ná kplɔ́n nú cɛ́jú wǒ ɖé kpowun ǎ? Nǔ kplɔ́nkplɔ́n nú cɛ́jú wǒ nyɔ́ hú gǎn nǔ ɖěbǔ ma kplɔ́n. Gɔ́ ná ɔ, ényí a bɛ́ ɔ, é sixú lɛ́ wá sɔ́ akpakpa we bɔ a ná gbɛ kan d’é nu.—Filí. 2:13.
Nɔ cyán xóta lɛ́ ɖ’ayǐ. Ényí a ko júnjɔ́n ayǐ hwɛ̌, cóbó wá jɛ nǔ e a ná kplɔ́n é kanbyɔ́ hwiɖée jí ɔ, a ná sixú ‘zán hwenu towe ganjí ǎ.’ (Efɛ́. 5:16) Étɛ́wú a ma ka ná wlán xóta ɖěɖěe jí a ba ná kplɔ́n nǔ dó lɛ́ é ɖ’ayǐ ǎ? Nǔkanbyɔ́ ɖé wá ayi mɛ nú we hweɖébǔnu hǔn, wlǎn ɖ’ayǐ. Ðo nǔkplɔ́nkplɔ́n ɖokpó ɖokpó sín vivɔnu ɔ, a sixú nɔ wlán xóta ɖěvo e jí a ba ná kplɔ́n nǔ dó lɛ́ é gɔ́ ná.
Ényí é byɔ́ ɖó mɔ̌ hǔn, nɔ bló hǔzúhúzú lɛ́. Nɔ dó gǎn bo nɔ bló hǔzúhúzú ɖé lɛ́ ɖo tuto towe wú, ɖi táan nabí e a nɔ zán dó kplɔ́n nǔ é kpó xóta e a nɔ cyán lɛ́ é kpó. Nǔ e ɖo tají é wɛ nyí hwenu e a nɔ kplɔ́n nǔ é, táan nabí e a nɔ kplɔ́n ná é, alǒ nǔ e a nɔ kplɔ́n é ǎ, loɔ, lěe a nɔ kplɔ́n ɖo gbesisɔmɛ gbɔn é wɛ ɖo tají.
Nǔ kplɔ́nkplɔ́n ɖo gbesisɔmɛ nɔ hɛn le wá tawun. É nɔ zɔ́n bɔ mǐ nɔ vɛ́ xá Jexóva d’é jí, nɔ kplɔ́n lěe mǐ ná nɔ wa nǔ kpó nǔnywɛ́ kpó gbɔn é mǐ, bo nɔ lɛ́ ná hlɔ̌nhlɔ́n mǐ.—Joz. 1:8.