Nǔ e nǔxatɔ́ lɛ́ kanbyɔ́ lɛ́ é
Mɛ̌ mɛ̌ é ka nyí “wɛnsagun e è cyán” bɔ è ɖɔ xó yětɔn ɖo 1 Timɔtée 5:21 mɛ lɛ́ é?
Mɛsɛ́dó Pɔ́lu wlán nǔ élɔ́ sɛ́dó mɛxó agun tɔn gbɛ̌ tɔn Timɔtée: “Un ɖe gbe nú we dó nǔjɔnǔ mɛ ɖo Mawu, Klísu Jezu kpó wɛnsagun e è cyán lɛ́ é kpó nukɔn ɖɔ a ní xwedó wěɖexámɛ énɛ́ lɛ́; ma ka ɖó linlin agɔ dó mɛɖé wú, alǒ ɖe mɛɖé ɖó vo ɖo mɛɖé mɛ dó wa mɔ̌ ó.”—1 Tim. 5:21.
Nukɔntɔn, mǐ sixú ɖɔ xó dó wɛnsagun ɖěɖěe ma ɖo wɛnsagun énɛ́ lɛ́ mɛ ǎ lɛ́ é jí. É ɖo wɛn ɖɔ yě kún ɖo mɛ 144000 lɛ́ mɛ ó. Hwenu e Pɔ́lu wlán nǔ sɛ́dó Timɔtée é ɔ, è ko ɖo klisánwun e gbigbɔ sɔ́ lɛ́ é fɔ́n dó jǐxwé wɛ ǎ. Mɛsɛ́dó lɛ́ kpó mɛ ɖěvo e gbigbɔ sɔ́ lɛ́ é kpó ko húzú nǔɖíɖó gbigbɔ tɔn lɛ́ ǎ, énɛ́ wú ɔ, “wɛnsagun e è cyán lɛ́ é” sixú dó gesí yě ǎ.—1 Kɔ. 15:50-54; 1 Tɛ. 4:13-17; 1 Jaan 3:2.
Gɔ́ ná ɔ, “wɛnsagun e è cyán lɛ́ é” sixú dó gesí wɛnsagun ɖěɖěe tlí tó ɖo Sinvɔgbɛ ɔ hwenu lɛ́ é ǎ. Yědɛɛ lɛ́ wɛ xo kpóɖó nú Satáan bo húzú awǒvi lɛ́ bɔ Jezu klán gbe xá yě. (Bǐb. 6:2; Luk. 8:30, 31; 2 Pi. 2:4) Ðo sɔgúdo ɔ, è ná glɔ́n yě dó domaɖó-azan ɖé mɛ nú xwe afatɔ́n, bɔ énɛ́ gúdo ɔ, è ná sú yě kpó Awǒvi kpó sín kún dó.—Ju. 6; Nǔɖe. 20:1-3, 10.
‘Wɛnsagun ɖěɖěe è cyán’ bɔ Pɔ́lu ɖɔ xó yětɔn lɛ́ é ɖó ná ko nyí wɛnsagun ɖěɖěe ɖo jǐxwé bo ɖo gǔdo nú ‘Mawu kpó Klísu Jezu kpó’ e xó è ɖɔ ɖo wěmafɔ ɖokpó ɔ mɛ lɛ́ é.
Wɛnsagun gbejínɔtɔ́ afatɔ́n donu mɔ̌kpán wɛ ɖe. (Ebl. 12:22, 23) Mǐ ɖó ná lin ɖɔ yě mɛ bǐ wɛ nɔ wa azɔ̌ ɖokpó ɔ ɖo hwe ɖokpó ɔ nu ǎ. (Nǔɖe. 14:17, 18) Flín ɖɔ hweɖénu wá su bɔ è sɔ́ azɔ̌ dó así nú wɛnsagun ɖokpó bɔ é ná sú kún dó nú ahwanfuntɔ́ Asilíi tɔn 185000. (2 Axɔ́. 19:35) È sixú ko sɔ́ azɔ̌ dó así nú wɛnsagun ɖé lɛ́, bɔ “yě ná ɖe nǔ e nɔ nyí afɔklɛ́nnú nú mɛ lɛ́ é bǐ kpó mɛ e nɔ fɔ́n bo nɔ ɖo sɛ́n gba wɛ lɛ́ é bǐ kpó sín Axɔ́súɖuto [Jezu tɔn] mɛ.” (Mat. 13:39-41) Ðěvo lɛ́ sixú “xo mɛ tɔn e è cyán lɛ́ é kplé” dó jǐxwé. (Mat. 24:31) Gɔ́ ná ɔ, ɖěvo lɛ́ nɔ ‘kpé nukún mǐ wǔ gbɔn fí bǐ.’—Ðɛh. 91:11; Mat. 18:10; sɔ́ jlɛ́ dó Matíe 4:11; Luki 22:43 wú.
“Wɛnsagun e è cyán” bɔ 1 Timɔtée 5:21 ɖɔ xó yětɔn lɛ́ é sixú ko ɖo wɛnsagun ɖěɖěe è sɔ́ azɔ̌ bǔnɔ e cá kan xá togun Mawu tɔn lɛ́ é dó así ná lɛ́ é dó gesí wɛ. Nǔ e lɛ́ lɛ̌ dó wěmafɔ ɔ lɛ́ é xlɛ́ ɖɔ wě e nǔnywɛ́ kpé é wɛ Pɔ́lu ɖe xá mɛxó agun tɔn e agun ɔ ɖó ná ɖó sísí ná lɛ́ é. Mɛxó agun tɔn lɛ́ ɖó ná “ɖó linlin agɔ dó mɛɖé wú, alǒ ɖe mɛɖé ɖó vo ɖo mɛɖé mɛ” hwenu e yě ɖo nukún kpé dó xó lɛ́ wú wɛ é ǎ, yě ka ɖó ná zɔn kplakpla jí dó wá gbeta ɖé kɔn, alǒ dó ɖɔ hwɛ ǎ. Hwɛjijɔ tají e wú yě ná xwedó wě e Mawu sɔ́ dó ayi mɛ nú Pɔ́lu bɔ é ɖe xá yě é wɛ nyí ɖɔ “Mawu, Klísu Jezu kpó wɛnsagun e è cyán lɛ́ é kpó nukɔn” wɛ yě ɖo nǔ wa ɖe wɛ. Hǔn, é ɖo wɛn ɖɔ è sɔ́ azɔ̌ e cá kan xá agun ɔ, ɖi xɛ nyinya agun ɔ jí, nukɔn ninɔ nú wɛnjíjlázɔ́ ɔ kpó gbe ɖíɖó nú Jexóva kpó sín azɔ̌ dó así nú wɛnsagun ɖé lɛ́.—Mat. 18:10; Nǔɖe. 14:6.