A ka tuun a?
Ðo xwe kanweko nukɔntɔn ɔ mɛ ɔ, nɛ̌ vɔ̌sánúxwlémawutɔ́ lɛ́ ka nɔ wa kanlin e yě sɔ́ dó sá vɔ̌ ná lɛ́ é sín hun sín nǔ gbɔn?
ÐO XWE lɛ́ bǐ mɛ ɔ, vɔ̌sánúxwlémawutɔ́ Izlayɛ́li hwexónu tɔn ɔ tɔn lɛ́ nɔ sɔ́ kanlin afatɔ́n mɔ̌kpán dó sá vɔ̌ ɖo vɔ̌sákpe tɛ́npli ɔ tɔn jí. Sɔgbe xá nǔ e hwenuxówlántɔ́ Josèphe ɖɔ é ɔ, ɖo Dǐndínwáyixwe ɔ hwenu ɔ, è nɔ zán lɛ̌ngbɔ́ 250000 jɛjí dó sá vɔ̌ ná, bɔ énɛ́ nɔ zɔ́n bɔ hun gěgé nɔ kɔn nyi ayǐ. (Lev. 1:10, 11; Kɛ́n. 28:16, 19) Fítɛ́ hun énɛ́ lɛ́ bǐ ka nɔ yi?
Dobanúnǔtɔ́ dokunkun tɔn lɛ́ mɔ sinhwín ɖaxó ɖé bɔ è ɖe sín tɛ́npli Elódu tɔn e è zán káká jɛ hwenu e è sú tɛ́npli ɔ sín kún dó ɖo 70 H.M. tɔn é. É ɖo wɛn ɖɔ, yě nɔ zán sinhwín énɛ́ dó bló bɔ hun lɛ́ nɔ sa sín só e jí tɛ́npli ɔ ɖe é jí yi.
Mǐ ní kpɔ́n nǔ e nɔ d’alɔ bɔ è nɔ hɛn vɔ̌sákpe ɔ ɖó mímɛ́ jí é we:
Do lɛ́ ɖo vɔ̌sákpe ɔ glɔ́: Wěma xóxó e kpi Jwifu lɛ́ sín sɛ́n kpó nǔwalɔ lɛ́ kpó sín tan bɔ è wlán ɖo xwe kanweko 2gɔ́ ɔ gúdo é ɖé ɖɔ ali doglɔ́ tɔn énɛ́ lɛ́ sín xó. Wěma ɔ tínmɛ ɖɔ do we ɖo vɔ̌sákpe ɔ sín zwe lɛ́ ɖokpó jí. Hun vɔ̌ e è sá lɛ́ é tɔn kpó sin e è nɔ zán dó klɔ́ vɔ̌sákpe ɔ jí é kpó nɔ sa gbɔn do lɛ́ mɛ, bo nɔ sa yi tɔdo Sedlɔ́n tɔn mɛ. Wěma hwe mǐtɔn nu tɔn e kpi hwenuxó Jwifu lɛ́ tɔn sín tan é ɖé ɖɔ xó dó do ɖěɖěe dobanúnǔtɔ́ dokunkun tɔn lɛ́ mɔ lɛ́ é wú ɖo ali ɖokpó ɔ nu. Dobanúnǔtɔ́ dokunkun tɔn lɛ́ zɔn dó nǔ e yě mɔ lɛ́ é jí bo yí gbe ɖɔ, é cí ɖɔ do lɛ́ mɛ wɛ hun e nɔ gosín atáa ɔ jí lɛ́ é nɔ sa gbɔn.
Sin sukpɔ́: Vɔ̌sánúxwlémawutɔ́ lɛ́ ɖó hudó sin gěgé tɔn bá dó klɔ́ vɔ̌sákpe ɔ sín do kpó do e mɛ hun lɛ́ nɔ sa gbɔn é kpó. Bo ná dó kpé azɔ̌ tají énɛ́ wú ɔ, vɔ̌sánúxwlémawutɔ́ lɛ́ nɔ mɔ sin e sín hudó yě ɖó é ɖo toxo ɔ mɛ. Bo ná dó mɔ sin e sín hudó yě ɖó ɖo vɔ̌sákpe ɔ kɔn é ɔ, yě ɖe ali nú sin sín toxo ɔ mɛ wá vɔ̌sákpe ɔ kɔn, bo nɔ yí sin énɛ́ lɛ́ dó sitɛ́nu lɛ́ kpó sindo lɛ́ kpó mɛ. Dobanúnǔtɔ́ dokunkun tɔn Joseph Patrich tínmɛ ɖɔ tɛ́npli ɖěvo ɖě kún sɔ́ ɖe ɖo hwenɛ́nu bo nɔ zán wlɛnwín gɛ́dɛ́ gɛ́dɛ́ énɛ́ dó dɔn sin wá tɛ́npli mɛ, bo lɛ́ ɖe sin kwíjikwíji lɛ́ sín mɛ ó.