Jexóva d’alɔ mǐ bɔ mǐ ‘su ɖo fí e è tun mǐ ɖó é’

Kassholm lɛ́ yi wěmaxɔmɛ Galádi tɔn ɖo 1979, bɔ ɖo xwe lɛ́ vlamɛ ɔ, è “tun” yě alǒ sɔ́ azɔ̌ d’así nú yě bɔ yě wa sinsɛnzɔ́ ɖo Iran, Maurice, Birmanie, Tanzanie, Ouganda kpó Zaïre kpó. Galádi wɛ yě se ɖe bɔ nǔkplɔ́nmɛtɔ́ ɖé, é wɛ nyí Jack Redford ɖe wě e d’alɔ yě hwenu e è “tun” yě, “hɔn” yě, bo “lɛ́ tun” yě azɔn mɔ̌kpán é ɖé xá yě ɖe. Mǐ ní jó xó nú yě.

Mi kɛnklɛ́n ɖɔ lěe mi mɔ nǔgbó ɔ gbɔn é nú mǐ.

Mats: Pologne wɛ tɔ́ ce nɔ ɖo Wɛ̌kɛ́hwan IIgɔ́ ɔ hwenu; é mɔ yɛmɛnúwiwa sinsɛn Katolíka tɔn tɔn gěgé. É ɖo mɔ̌ có, é nɔ ɖɔ hwɛhwɛ ɖɔ: “Nǔgbó ɔ ɖó ná ɖo fí ɖěvo ɖé!” Nukɔnmɛ ɔ, un wá mɔ ɖɔ nǔgbó wɛ. Un nɔ xɔ wěma e è ko zán kpo lɛ́ é. Un wá mɔ ɖokpó b’ɛ ɖó akpa fɛ́sinnɔ, bo nɔ nyí La vérité qui conduit à la vie éternelle. Xóta énɛ́ dɔn mì tawun, bɔ un xa wěma ɔ blěbú ɖo zǎn énɛ́ mɛ. Ayǐhɔ́ngbe tɔn zǎnzǎn ɔ, un tuun ɖɔ un ko mɔ nǔgbó ɔ!

Bɛ́ sín avril 1972 ɔ, un xa wěma Kúnnuɖetɔ́ Jexóva tɔn lɛ́ tɔn gěgé ɖěvo lɛ́, bo mɔ xósin nú nǔ e un nɔ kanbyɔ́ dó Biblu wú lɛ́ é. Lěe nǔ cí nú ajɔ̌tɔ́ e xó Jezu ɖɔ ɖo nǔjlɛ́dónǔwú tɔn mɛ é ɖɔhun wɛ é cí nú nyi lɔ; ée é mɔ jɛ̌ xɔ akwɛ́ ɖaxó ɖé gúdo é ɔ, é sa nǔ e é ɖó lɛ́ é bǐ bo dó xɔ. Un “sa” tuto e bló wɛ un ɖe bá yi kplɔ́n wěma ɖo kplɔ́nyijǐ-alavɔ bá húzú dotóo é, énɛ́ wɛ nyí ɖɔ un sa nǔ bǐ bá dó xɔ “jɛ̌” nǔgbó ɔ tɔn e un mɔ é. (Mat. 13:45, 46) Un bló batɛ́mu ɖo 10 décembre 1972.

Xwe ɖokpó mɔ̌ gúdo ɔ, mɛjitɔ́ ce lɛ́ kpó nɔví súnnu ce kpó lɔmɔ̌ yí nǔgbó ɔ bo bló batɛ́mu. Ðo juillet 1973 ɔ, un bɛ́ sinsɛnzɔ́ hwebǐnu tɔn. Un mɔ nɔví nyɔ̌nu ɖɛɛɖɛkpɛ e yí wǎn nú nǔ gbigbɔ tɔn lɛ́ é ɖokpó ɖo gběxosín-alijítɔ́ kanɖódónǔwútɔ́ e ɖo agun mǐtɔn mɛ lɛ́ é mɛ, bɔ nyǐkɔ tɔn nɔ nyí Ann-Catrin. Mǐ yí wǎn nú mǐɖée, bo wlí alɔ ɖo 1975. Mǐ zán xwe ɛnɛ e bɔ d’é wú lɛ́ é ɖo Strömsund; xá Suède tɔn ɖɛɛɖɛkpɛ ɖé wɛ, bɔ mɛ lɛ́ nɔ yí nǔgbó ɔ ɖo fínɛ́ tawun.

Ann-Catrin: Hwenu e tɔ́ ce ja kplɔ́nyijǐ-alavɔ fó gbé é wɛ é mɔ nǔgbó ɔ ɖo Stockholm. Sun atɔn kpowun jɛ́n un ɖó hwe ɔ nu, amɔ̌, é nɔ kplá mì hɛn yi kplé lɛ́, bo nɔ lɛ́ kplá mì yi sinsɛnzɔ́ ɔ mɛ. Mamáa ce nɔ ba mɔ̌ ǎ, bo nɔ tɛ́n kpɔ́n bá xlɛ́ ɖɔ mɛ nyanya wɛ Kúnnuɖetɔ́ lɛ́ nyí. Amɔ̌, é kpé wú ǎ, bɔ ɖo nukɔnmɛ ɔ, é lɔ bló batɛ́mu. Ée un ɖó xwe 13 é ɔ, un bló batɛ́mu, bɔ ée un ɖó xwe 16 é ɔ, un húzú gběxosín-alijítɔ́. Ée un wa sinsɛnzɔ́ ɖo Umeå, fí e è ɖó hudó wɛnjlátɔ́ Axɔ́súɖuto ɔ tɔn tɔn ɖe tawun é ɖé gúdo é ɔ, un húzú gběxosín-alijítɔ́ titewungbe.

Ée nyi kpó Mats kpó wlí alɔ gúdo é ɔ, mǐ d’alɔ gbɛtɔ́ gěgé bɔ yě mɔ nǔgbó ɔ, bɔ énɛ́ hɛn awǎjijɛ wá nú mǐ. Mɛ énɛ́ lɛ́ ɖokpó wɛ nyí Maivor; ɖyɔ̌vǐ jɔ́lwɛ́ ɖé wɛ, bo jó lɔ̌nyijǐ-fɔnkan-yihúndatɔ́zɔ́ e ná wa wɛ é ɖe é dó, bɔ é kpó nɔví nyɔ̌nu ce kpɛví kpó nɔ wa gběxosín-alijítɔ́zɔ́ ɖó kpɔ́. Yě yi Galádi ɖo 1984 ɖó kpɔ́, bo ɖo mɛsɛ́dózɔ́ wa wɛ ɖo Équateur.

Nɛ̌ mi ka xwedó wěɖexámɛ e ɖɔ è ní “su ɖo fí e è tun [mɛ] ɖó é” gbɔn ɖo fí vovo e mi wa mɛsɛ́dózɔ́ ɖe lɛ́ é?

Mats: Hwɛhwɛ wɛ è nɔ “lɛ́ tun” mǐ, énɛ́ wɛ nyí ɖɔ, è nɔ lɛ́ sɔ́ azɔ̌ yɔ̌yɔ́ ɖěvo lɛ́ d’así nú mǐ. Amɔ̌, nǔ e nɔ d’alɔ mǐ bɔ mǐ nɔ húzú sɔgbe xá hǔzúhúzú lɛ́ é ɖokpó wɛ nyí ɖɔ mǐ nɔ tɛ́n kpɔ́n bo nɔ wa nǔ e wú mǐ kpé é bǐ bo nɔ xwedó kpɔ́ndéwú Jezu tɔn hwebǐnu, tají ɔ, mɛɖéesɔ́hwe tɔn. (Koló. 2:6, 7) Ði kpɔ́ndéwú ɔ, mǐ nɔ ɖó nukún ɖɔ Kúnnuɖetɔ́ e ɖo ayǐ ɔ jí lɛ́ é ní húzú sɔgbe xá ninɔmɛ mǐtɔn ǎ, é nyɔ́ wa ɔ, mǐ nɔ tɛ́n kpɔ́n bo nɔ tuun nǔ e wú yě nɔ wa nǔ lɛ́ ɖo ali ɖé nu é. Mǐ nɔ ba ná mɔ nǔ jɛ linlin yětɔn kpó nǔwalɔ yětɔn kpó mɛ. Lě do mǐ xwedó kpɔ́ndéwú Jezu tɔn sɔ é ɔ, mɔ̌ do wɛ mǐ nɔ mɔ ɖɔ è ‘tun mǐ nyi tɔ tó,’ bɔ mǐ ná vun ɖo fí ɖěbǔ e è sɛ́ mǐ dó é sɔ.—Ðɛh. 1:2, 3.

Ann-Catrin: Cóbónú atín e è vɔ́ tun é ɖé ná su ɔ, é lɛ́ ɖó hudó hwesivɔ́ tɔn. Jexóva nɔ xlɛ́ hwebǐnu ɖɔ “hwe” wɛ émí nyí nú mǐ. (Ðɛh. 84:12) É ná mǐ kplékplé nɔví súnnu kpó nɔví nyɔ̌nu kpó gbigbɔ tɔn wǎnyíyínɔ ɖé. Ði kpɔ́ndéwú ɔ, ɖo agun kpɛví mǐtɔn mɛ ɖo Téhéran, ɖo Iran ɔ, mǐ ɖu vǐví mɛyíyí e gba kpé ɖo Biblu sín táan mɛ é tɔn. É ná ko jló mǐ ɖɔ mǐ ní nɔ Iran, amɔ̌ ɖo juillet 1980 ɔ, sɛ́n gbɛ́ azɔ̌ Kúnnuɖetɔ́ Jexóva tɔn lɛ́ tɔn ɖo fínɛ́, bɔ è byɔ́ mǐ ɖɔ mǐ ní gosín to ɔ mɛ ɖo ganxixo 48 mɛ. È sɛ́ mǐ dó Zaïre (Congo égbé tɔn) ɖo Aflíka.

Azɔn nukɔntɔn e un se ɖɔ è sɛ́ mǐ dó Aflíka é ɔ, un ya avǐ. Nǔ e un se dó dan kpó azɔn kpó Aflíka tɔn lɛ́ wú é dó xɛsi mì. Amɔ̌, xɔ́ntɔn vívɛ́ mǐtɔn e ko wa sinsɛnzɔ́ ɖo dɔ̌n nú hwenu línlín é we ɖɔ nú mǐ ɖɔ: “Mi ma ka ko yi dɔ̌n nɛ́! Mi ɖó linlin ɖagbe dó dɔ̌n wú, énɛ́ ɔ, mi ná mɔ ɖɔ Aflíka ná nyɔ́ nú mi.” Nǔ ka nyí mɔ̌ nǔgbó! Nɔví lɛ́ nɔ yí wǎn nú mɛ, bo nɔ lɛ́ yí mɛ. Nǔgbó ɔ, ée é byɔ́ ɖɔ mǐ ná gosín Zaïre ɖo xwe ayizɛ́n gúdo ɖó è gbɛ́ azɔ̌ mǐtɔn wútu é ɔ, un ko nǔ dó xomɛ, ɖó un ɖ’ayi wú ɖɔ un ɖo ɖɛ xo sɛ́dó Jexóva wɛ din ɖɔ: “Kɛnklɛ́n jó mǐ dó nú mǐ ná nɔ Aflíka.”

Nǔ ɖagbe tɛ́ lɛ́ sín vǐví mi ka ɖu ɖo xwe lɛ́ gblamɛ?

Mats: Ðó azɔ̌ e è sɔ́ d’así nú mǐ lɛ́ é wú ɔ, mǐ zun xɔ́ntɔn vívɛ́ xá mɛsɛ́dó e gosín fí vovo lɛ́ é gěgé. Gɔ́ ná ɔ, ɖo azɔ̌ vovo e è sɔ́ d’así nú mǐ é ɖé lɛ́ mɛ ɔ, nǔ e nɔ d’awǎjijɛ bǔnɔ nú mǐ é wɛ nyí Biblu kplɔ́nkplɔ́n e wú mǐ nɔ kpé nukún dó lɛ́ é, hweɖélɛ́nu ɔ, mɛ ɖokpó nɔ ɖó 20 mɔ̌! Wǎnyíyí kpó mɛyíyí kpó nɔví Aflíka tɔn lɛ́ tɔn lɔmɔ̌ cí ayi ce mɛ. Hwenu e mǐ ɖo agun lɛ́ ba kpɔ́n wɛ ɖo Tanzanie é ɔ, nǔ e xɔ́ntɔn lɛ́ gěgé wa dó yí mǐ é “zɛ nǔ e yě ɖó é wú.” Hwenɛ́nu ɔ, mǐ kpó mɔ̌to mǐtɔn e mɛ mǐ nɔ dɔ́ é kpó wɛ nɔ ɖo yiyi wɛ, bɔ mǐ nɔ gán ɖó xɔ yětɔn lɛ́ kpá. (2 Kɔ. 8:3) Nǔɖé ɖo tají nú mǐ tawun hwe ɔ nu bɔ mǐ nɔ ylɔ́ ɖɔ nǔ e jɛ lɛ́ é sín hwenu. Ðo kéze ɖokpó ɖokpó sín vivɔnu ɔ, nyi kpó Ann-Catrin kpó nɔ jínjɔ́n ayǐ bo nɔ ɖɔ nǔ e jɛ ɖo kézé ɔ mɛ lɛ́ é lobo nɔ dó kú nú Jexóva nú kpɔ́ e é nɔ xá mǐ é.

Ann-Catrin: Nú nyɛ ɔ, nǔ e nɔ dó awǎjijɛ nú mì hú gǎn é wɛ nyí kplékplé nɔví lɛ́ tɔn mǐtɔn e gbɔn gbɛ ɔ bǐ mɛ bɔ un ɖ’é mɛ é. Mǐ kplɔ́n gbe yɔ̌yɔ́ gěgé, ɖi Farsi, Flanségbe, Luganda kpó Swahili kpó, bo lɛ́ kplɔ́n nǔ e sɔ́ akpakpa mɛ é gěgé dó xá vovo wú. Mǐ d’alɔ mɛ gěgé bɔ yě húzú ahwanvú, zun xɔ́ntɔn jɔ xɔ́ntɔn lɛ́, bo lɛ́ w’azɔ̌ ‘ɖó kpɔ́’ xá yě ɖo sinsɛnzɔ́ Jexóva tɔn mɛ.—Sof. 3:9.

Mǐ lɛ́ mɔ nǔjíwǔ vovo lɛ́ ɖo nǔ ɖaaɖagbe ɖěɖěe Jexóva dá lɛ́ é mɛ. Hweɖébǔnu e mǐ yí gbe nú azɔ̌ e è sɔ́ d’así nú mǐ ɖo sinsɛnzɔ́ Jexóva tɔn mɛ é ɔ, é nɔ cí nú mǐ ɖɔ mǐ kpó Jexóva kpó ɖo tomɛ yi wɛ, bɔ é nyí alixlɛ́mɛtɔ́ mǐtɔn wɛ ɖɔhun. É bló bɔ mǐ mɔ nǔ e mǐɖésúnɔ ma sixú nɔ mǐɖóɖó bo mɔ kpɔ́n gbeɖé ǎ lɛ́ é kpɔ́n.

Wǔvɛ́ tɛ́ lɛ́ mi ka mɔ? Nɛ̌ mi ka ɖí xwi xá yě gbɔn?

Mats: Mǐ jɛ azɔn gěgé ɖo xwé lɛ́ gblamɛ, káká jɛ hwesivɔ́zɔn jí. È wa mɛzizɛzɔ́ maɖónukún ɖé lɛ́ nú Ann-Catrin. Ado lɛ́ hu mǐ dó mɛjitɔ́ mɛxómɔ mǐtɔn lɛ́ wú; énɛ́ wú ɔ, é su nukún mǐtɔn ɖɔ nɔví mǐtɔn lɛ́ nɔ yá wǔ ɖe afɔ nukɔntɔn ɔ bo nɔ kpé nukún dó yě wú. Yě wa azɔ̌ énɛ́ kpó suúlu kpó, kpó awǎjijɛ kpó, kpódó wǎnyíyí kpán. (1 Tim. 5:4) É ɖo mɔ̌ có, hweɖélɛ́nu ɔ, mǐ nɔ ɖó linlin agɔ lɛ́ ɖó mǐ ɖo biba wɛ bo ná wa nǔ nú mɛjitɔ́ mǐtɔn lɛ́ hú alɔ e mǐ nɔ nɔ zɔ bo nɔ dó yě kpowun é.

Ann-Catrin: Ðo 1983 hwenu e mǐ ɖo sinsɛnzɔ́ wa wɛ ɖo Zaïre é ɔ, slǔ kpó slǎ kpó dó ya nú mì syɛ́nsyɛ́n. Dotóo ɔ ɖɔ nú Mats ɖɔ: “Asi towe ní ma dɔ́ tomɛ fí égbé ó!” Ayǐhɔ́ngbe tɔn ɔ, mǐ dó jɔmɛhún e nɔ bɛ́ agban é ɖé bo yi Suède; jɔmɛhún ɖokpó e mǐ mɔ gbe nɛ́ gbe é nɛ́.

Mats: Mǐ lin ɖɔ mɛsɛ́dózɔ́ mǐtɔn ná nɔ te, énɛ́ wú ɔ, mǐ ya avǐ titewungbe. Amɔ̌, nǔ e dotóo ɔ ɖɔ é sɔ́ jɛ ǎ, bɔ Ann-Catrin lɛ́ mɔ éɖée mɛ. Xwe ɖokpó gúdo ɔ, mǐ kpé wú bo lɛ́ lɛ́ kɔ yi Zaïre, bo nɔ agun kpɛví Swahili tɔn ɖé mɛ ɖo Lubumbashi.

Ann-Catrin: Hwenu e mǐ ɖo Lubumbashi é ɔ, un gblé xo. Mǐ ɖó xo énɛ́ e un mɔ é sín nukún ɖ’ayǐ ǎ có, vǐ mǐtɔn e kú é vɛ́ nú mì tawun. Amɔ̌, ɖo hwenu wǔ bláblá tɔn énɛ́ ɔ, mǐ mɔ nǔmaɖónukún ɖé sín Jexóva gɔ́n. Mǐ bɛ́ Biblu kplɔ́nkplɔ́n gěgé lěe mǐ ma ko kpé wú bo bló gbɔn kpɔ́n ǎ é. Ðo nǔ ma kpé xwe ɖokpó vlamɛ ɔ, wɛnjlátɔ́ e ɖo agun ɔ mɛ lɛ́ é sín kɛ́n gosín 35 yi jɛ 70, bɔ mɛ e nɔ wá kplé lɛ́ é sín kɛ́n gosín 40 yi jɛ 220. Mǐ hɛn alɔnu mǐtɔn ján ɖo sinsɛnzɔ́ ɔ mɛ tawun bɔ nyɔ̌ná Jexóva tɔn lɛ́ dó gbɔ nú mì titewungbe. É ɖo mɔ̌ có, mǐ nɔ flín yɛ̌yɛ́ví mǐtɔn bo nɔ ɖɔ xó dó wǔ tɔn. Akpakpa ɖo mǐ sɔ́ wɛ nú mǐ ná mɔ lěe Jexóva ná dó gbɔ nú mǐ bǐ mlɛ́mlɛ́ gbɔn é.

Mats: É wá jɛ hweɖénu bɔ gǎn vɔ ɖo asi ce wú bǐ. Hwe ɖokpó ɔ nu ɔ, è mɔ cancer du côlon nú mì, b’ɛ byɔ́ ɖɔ è ná wa azɔ̌ nú mì. Amɔ̌, un ɖo ganjí din. Bɔ asi ce lɔ ɖo nǔ e wú é kpé lɛ́ é bǐ wa wɛ.

Mǐ wá mɔ ɖɔ é kún nyí mǐ ɖokpó wɛ ɖo tagba lɛ́ ɖí xwi xá wɛ ó. Ðo akɔhwan e è fun ɖo 1994 ɖo Rwanda é gúdo ɔ, mǐ yi ba nɔví gěgé kpɔ́n ɖo bibɛtɛn kpá lɛ́ mɛ. Nǔɖiɖi yětɔn, didɛ yětɔn kpó mɛyíyí yětɔn e ma ɖó dogbó ǎ é kpó mimɔ kplɔ́n mǐ ɖɔ Jexóva ɖó hlɔ̌nhlɔ́n bo ná nɔ gǔdo nú togun tɔn ɖo tagba ɖěbǔ mɛ.—Ðɛh. 55:23.

Ann-Catrin: Mǐ ɖí xwi xá wǔvɛ́ ɖěvo hwenu e mǐ yi alaxɔ Ouganda tɔn hunhun domɛ ɖo 2007 é. Ðo tuto ɔ gúdo ɔ, mǐ kpó mɛsɛ́dó lɛ́, gɔ́ nú mɛ e nɔ nɔ Betɛ́li lɛ́ é kpó 25 mɔ̌ dó hǔn ɖidó Nairobi ɖo Kenya. Cóbónú mǐ ná wá dogbó Kenya tɔn jí ɔ, agbanhún ɖé zɛ gbě bo wá gba dó hǔn mǐtɔn wú. Hǔnkuntɔ́ ɔ kpó xɔ́ntɔn mǐtɔn atɔ́ɔ́n kpó kú ɖo tɛn tɔn mɛ; nɔví nyɔ̌nu mǐtɔn ɖokpó lɛ́ wá kú ɖo dotóoxwé. Akpakpa ɖo mǐ sɔ́ wɛ nú mǐ ná lɛ́vɔ́ wá mɔ nɔví énɛ́ lɛ́!—Jɔb. 14:13-15.

Akpa ce lɛ́ wá kú. Amɔ̌, nyi kpó asú ce, gɔ́ nú mɛ kwínwe ɖěvo lɛ́ kpó jɛ linkpɔ́nzɔn ɖó alitawoví ɔ wú. Ðo ninɔmɛ ce mɛ ɔ, zǎnmɛ wɛ linkpɔ́nzɔn ɔ nɔ dó tagba nú mì, bo nɔ fɔ́n mì sín amlɔ mɛ b’ɛ nɔ cí nú mì ɖɔ hǔn ce jló ná nɔ te wɛ ɖɔhun. É dó xɛsi. Amɔ̌, ɖɛ vívɛ́ xixo sɛ́dó Jexóva kpó gbɔ e wěmafɔ e mǐ yí wǎn ná é ɖé lɛ́ dó nú mǐ é kpó zɔ́n bɔ mǐ dɛ ɖ’é nu. Mǐ lɛ́ ba alɔdó dotóo lɛ́ tɔn b’ɛ hɛn le wá tawun. Mǐ mɔ mǐɖée mɛ hú gǎn din, bo nɔ byɔ́ Jexóva ɖɔ é ní d’alɔ mǐ nú mǐ ná dó gbɔ nú mɛ ɖěvo e ɖo xwi ɖí xá nǔ ɖokpó ɔ wɛ lɛ́ é.

Hwenu e mi ɖo lěe mi kpé wú bo ɖí xwi xá tagba lɛ́ gbɔn é ɖɔ wɛ é ɔ, mi ɖɔ Jexóva hɛn émí “azin ɖɔhun.” Étɛ́ ɖɔ gbé mǐ ka ja?

Mats: Xógbe Swahili tɔn ɖé mɛ wɛ è ɖe xógbe énɛ́ sín bɔ tínmɛ tɔn nyí “È hɛn mǐ azin ɖɔhun.” Lěe mɛɖé nɔ hɛn azin kɛ́ɖɛ́ kɛ́ɖɛ́ bónú é ní ma gba ó gbɔn é ɔ, Jexóva nɔ gǔdo nú mǐ kpó wǎnyíyí kpó ɖo azɔ̌ e è ɖe nú mǐ lɛ́ é ɖokpó ɖokpó mɛ. Mǐ nɔ mɔ nǔ e sín hudó mǐ ɖó lɛ́ hwebǐnu, mǐ tlɛ nɔ mɔ hú nǔ e sín hudó mǐ ɖó é. Ali e nu mǐ mɔ wǎnyíyí kpó gǔdonɔnúmɛ kpó Jexóva tɔn ɖe é ɖokpó wɛ nyí lěe Hǎgbɛ́ alixlɛ́mɛtɔ́ ɔ se wǔvɛ́ xá mǐ gbɔn é.

Ann-Catrin: Un jló ná ɖɔ xó dó lěe Jexóva nɔ gǔdo nú mǐ kpó wǎnyíyí kpó gbɔn é sín kpɔ́ndéwú ɖokpó wú. Gbe ɖokpó ɔ, è ylɔ́ mì bo ɖɔ nú mì ɖɔ tɔ́ ce ɖo azɔn jɛ wɛ syɛ́nsyɛ́n bo ɖo dotóoxwé ɖo Suède. Zǎnsúkpɛ́zɔn wɛ Mats jɛ fó kɛ́ɖɛ́. Akwɛ́ káká ɖé sɔ́ ɖo mǐ sí nú mǐ ná dó jɔmɛhún yi xwé ǎ, énɛ́ wú ɔ mǐ gbɔ bo wá gbeta ɔ kɔn bá sa mɔ̌to mǐtɔn. Énɛ́ gúdo ɔ, mɛ we ylɔ́ mǐ; mɛ nukɔntɔn ɔ, asú kpó asi kpó e se ninɔmɛ mǐtɔn é ɖé wɛ bɔ yě jló ná sú jɔmɛhúndókwɛ́ mɛ ɖokpó tɔn. Mɛ wegɔ́ ɔ, nɔví nyɔ̌nu mɛxómɔ ɖé wɛ bo ko sɛ akwɛ́ xwe bá dó d’alɔ “mɛ e ɖo hudó mɛ é ɖé.” Nukúnxwixwe yɔywɛ ɖé mɛ kpowun ɔ, Jexóva d’alɔ mǐ!—Ebl. 13:6.

Étɛ́ lɛ́ mi ka kplɔ́n ɖo xwe 50 e mi ko bló ɖo sinsɛnzɔ́ hwebǐnu tɔn mɛ é mɛ?

Ann-Catrin: Un kplɔ́n ɖɔ hlɔ̌nhlɔ́n mǐtɔn wɛ nyí ɖɔ mǐ ‘ná cí xwíí, bo ná ɖeji.’ Ényí mǐ ɖeji dó Jexóva wú ɔ, ɖo ali ɖé nu ɔ, é nɔ sɔ́ ahwan mǐtɔn dó ɖó étɔn. (Eza. 30:15; 2 Tan 20:15, 17) Ðó mǐ sɛn Jexóva lěe mǐ kpé wú gbɔn é bǐ ɖo azɔ̌ e è sɔ́ d’así nú mǐ lɛ́ é bǐ mɛ wútu ɔ, mǐ mɔ nyɔ̌ná hú lěe mǐ sixú mɔ gbɔn ɖo ali ɖěvo ɖěbǔ nu é.

Mats: Nǔ tají e un kplɔ́n é wɛ nyí ɖɔ má nɔ ɖeji dó Jexóva wú ɖo ninɔmɛ lɛ́ bǐ mɛ, bo ná mɔ lěe é ná wa nǔ dó ta ce mɛ gbɔn é. (Ðɛh. 37:5) É gɔn akpá e é dó ɖɔ émí ná wa mɔ̌ é ɖe gbeɖé ǎ. Mǐ kpo ɖo nǔgbó xó énɛ́ tɔn mɔ wɛ ɖo sinsɛnzɔ́ e wa wɛ mǐ ɖe din ɖo Betɛ́li Birmanie tɔn é mɛ.

Mǐ ba ɖɔ mɛ wínnyáwínnyá e jló ná vlɔ́n kan nú sinsɛnzɔ́ yětɔn lɛ́ é ní ɖu le wǎnyíyí Jexóva tɔn e ma nɔ sɛ do ǎ é tɔn mǐɖɔhun. Mǐ kú d’é jí ɖɔ yě ná kpé wú, ényí yě jó Jexóva dó nú é bló bónú yě su ɖo fí ɖěbǔ e è tun yě ɖó é ɔ nɛ́.