TÀN 10
Sìn Vɔ Gbɛ̀ Ɔ
MƐ E ma byɔ tɔjihun ɔ mɛ ǎ lɛ é kpó ɖò gbɛ̀ e ye nɔ zán ɖ’ayǐ é zán wɛ. Ye ko ɖi ɖɔ sìn na vɔ gbɛ̀ ɔ ǎ. Mɛkiko yetɔn na ko lɛ́ jɛ jí hú ɖ’ayǐ tɔn. Amɔ̌, é na nɔte zaanɖé.
Jǐ wlǐ ajijimɛ. Sìn nɔ kɔn nyì ayǐ zoo è ɖò sìn kɔn sín basya mɛ wɛ ɖɔhun. Xó e Nɔwee ɖɔ é jɛ! Amɔ̌, mɛɖebǔ sɔ sixu byɔ tɔjihun ɔ mɛ ǎ ɖó hwenu ko yì. Jehovah ko sú hɔn ɔ gbánwún gbánwún.
Sìn cyɔn ayikúngban ɔ nukún mɛ bǐ tlolo. É ci tɔsisa ɖaxó ɖɔhun. É nɔ mu atín lɛ zindɛ́, bo nɔ blí awinnya ɖaxó ɖaxó lɛ lobo nɔ lɛ́ dó gbè. Ado hu gbɛtɔ́ lɛ bǐ. Ye xá só lɛ jí. Có, kpɔ́n lee é na ko vɛ́ nú ye sɔ, ɖɔ ye kún ɖótó Nɔwee bo byɔ tɔjihun ɔ mɛ hwenu e hɔn ɔ kpó ɖò nuvo é ó! Amɔ̌, hwenu ko yì tawun.
Sìn ɔ fɔ́n bo ɖò jǐ yì wɛ kpowun, ɖó jǐ ɖò jija wɛ kaka nú kéze 40 zǎn 40. Sìn bú só lɛ kaka jɛ só ɖaxó lɛ bǐ jí. Gbɛtɔ́ kpo kanlin e ma ɖò tɔjihun ɔ mɛ ǎ lɛ é kpo bǐ wɛ kú lee Mawu ɖɔ gbɔn é. Amɔ̌, xwédo Nɔwee tɔn kpo kanlin e ɖ’emɛ lɛ é kpo kɛɖɛ wɛ gán.
Nɔwee kpo vǐ tɔn lɛ kpo bló tɔjihun ɔ ganji. Sìn ɔ sɔ́ ɛ yì aga bɔ é nɔ fò tɔ̀. Ee jǐ ɔ ja kɛ̀n é ɔ, hwesivɔ jɛ hunhun jí. Nùjiwǔ tɛ ɖíe! Sìn gɔ́ fí bǐ. Tɔjihun ɔ kɛɖɛ jɛn è nɔ mɔ ɖò sìn ɔ nukún mɛ.
Mɛ jiganjigan lɛ bǐ kú. Ye sɔ́ sixu xò daka ɖě gbɛtɔ́ lɛ wu ǎ. Ye kpo nɔ yetɔn lɛ kpo mɛ nyanya ɖevo lɛ kpo bǐ kú. Amɔ̌, etɛ ka jɛ dó mɛ jiganjigan enɛ lɛ sín tɔ́ wu?
Mɛ jiganjigan enɛ lɛ sín tɔ́ nyí gbɛtɔ́ mǐ ɖɔhun ǎ. Wɛnsagun wɛ nú ye, bɔ ye sɔ́ agbaza gbɛtɔ́ tɔn dó bo wá ayikúngban jí. Enɛ wu ɔ, hwenu e Sìn Vɔ Gbɛ̀ é ɔ, ye kú kpo mɛ nyanya lɛ kpo ǎ. Ye jó agbaza gbɛtɔ́ tɔn ɔ dó bo lɛkɔ ɖido jixwé. Amɔ̌, Mawu sɔ́ lɔn bonu ye mɔ tɛn ɖò wɛnsagun tɔn lɛ tɛntin ǎ. Enɛ wu ɔ, ye huzu Sataan sín wɛnsagun lɛ. Biblu ylɔ ye ɖɔ awovi lɛ.
Mawu bló bɔ jɔhɔn ɖé nyì, bɔ sìn ɔ jɛ mimɛ jí. Ðò sun atɔ́ɔ́n gudo ɔ, tɔjihun ɔ glí ɖó só ɖé jí. Azǎn mɔkpan ko wá yì cobɔ mɛ e ɖò tɔjihun ɔ mɛ lɛ é wá kpéwú bo mɔ só lɛ sín ta sɛ́dó. Sìn ɔ fɔ́n bo ɖò mimɛ wɛ.
Bonu Nɔwee na kpɔ́n ɖɔ sìn ɔ ko mɛ̀ fó à jí ɔ, é ɖè xɛ wiwi e nyí avunsákɔwó é tɔ́n. Xɛ enɛ lɛlɛ̌ kaka bo lɛkɔ wá, ɖó é mɔ fí e nyɔ́ nɔ n’i ɖò ayikúngban jí é ɖebǔ ǎ. É wà mɔ̌ azɔn gègě, bo nɔ wá ɖó ci tɔjihun ɔ jí.
Enɛ gudo ɔ, Nɔwee lɛ́ ɖè ahwannɛ́ ɖokpo tɔ́n. Amɔ̌, ahwannɛ́ ɔ lɔmɔ̌ lɛkɔ wá, ɖó é mɔ fí e nyɔ́ nɔ n’i é ɖebǔ ǎ. Nɔwee lɛ́ ɖè é tɔ́n azɔn wegɔ ɔ, bɔ é lɛkɔ wá kpo olivuma kpo ɖò bɛnu. Ee Nɔwee mɔ olivuma ɔ é ɔ, é mɔ ɖɔ sìn ɔ ko mɛ̀ fó. Nɔwee lɛ́ ɖè é tɔ́n azɔn atɔngɔ ɔ, bɔ é mɔ fí e nyɔ́ nɔ n’i é bo sɔ́ lɛkɔ wá ǎ.
Mawu ɖɔ nú Nɔwee ɖɔ: ‘Tɔ́n sín tɔjihun ɔ mɛ. Kplá xwédo towe kpo kanlin lɛ kpo tɔ́n.’ Ye nɔ tɔjihun ɔ mɛ hú xwè ɖokpo. Kpɔ́n lee xomɛ na ko hun ye sɔ hwenu e ye bǐ tɔ́n sín tɔjihun ɔ mɛ bo kpó ɖò gbɛ̀ é!
Genèse 7:10-24; 8:1-17; 2 Piyɛɛ 2:9.