TÀN 19
Jakɔbu Ðó Xwédo Ðaxó Ðé
KPƆ́N xwédo ɖaxó e ɖò ɖiɖe ɔ mɛ é. Jakɔbu sín vǐ sunnu 12 lɛ wɛ. É lɛ́ ɖó vǐ nyɔnu lɛ lɔ. A ka tuùn ye ɖě sín nyikɔ à? Mi nú mǐ ni slɛ́ vǐ tɔn ɖé lɛ sín nyikɔ.
Lea jì Lubɛn, Sinmɛnyɔ́ɔ, Levíi kpo Juda kpo. Ee Hlacɛli ma ko jì vǐ ɖě ǎ é ɔ, é kú wǔ n’i tawun. Enɛ wu ɔ, é zé deví nyɔnu tɔn Biluxa jó nú Jakɔbu, bɔ é jì Dani kpo Nɛfutalíi kpo n’i. Lea lɔmɔ̌ zé deví nyɔnu tɔn Zilupa jó nú Jakɔbu, bɔ éyɛ jì Gadi kpo Asɛ́ɛ kpo n’i. Lea lɛ́vɔ wá jì Isakáa kpo Zabulɔn kpo.
Gudogudo bǐ ɔ, Hlacɛli wá kpéwú bo jì vǐ ɖokpo, bo sùn nyǐ ɖɔ Jozɛfu. Mǐ na wá kplɔ́n nú gègě dó Jozɛfu wu, ɖó é wá nyí mɛ nukúnɖeji ɖé. Vǐ sunnu 11 e Jakɔbu jì hwenu e é ɖò Hlacɛli sín tɔ́ Labaan gɔ́n é nɛ.
Jakɔbu lɛ́ jì vǐ nyɔnu ɖé lɛ. Amɔ̌, mɛ ɖokpo géé e sín nyikɔ Biblu ɖɔ é wɛ nyí Dina.
Hwe ɔ nu sù, bɔ Jakɔbu jló na jó Labaan dó bo na lɛkɔ yì Kanaa. Enɛ wu ɔ, é kplé xwédo tɔn, lɛngbɔhwan tɔn kpo nyibu tɔn lɛ kpo ɖó kpɔ́, bɔ ye wlí ali bo ɖido Kanaa.
Ee Jakɔbu kpo xwédo tɔn kpo lɛkɔ wá Kanaa gudo é ɔ, Hlacɛli lɛ́ jì vǐ sunnu ɖokpo. É jì vǐ enɛ ɔ kpo wuvɛ̌ kpo bo kú, hwenu e ye xwè toxo Eflati tɔn mɛ é. Amɔ̌ vǐ ɔ ka gán. Jakɔbu sùn nyǐ vǐ enɛ ɔ ɖɔ Bɛnjamɛ.
Mǐ ɖó na hɛn nyikɔ Jakɔbu sín vǐ sunnu 12 lɛ tɔn ɖó ayi mɛ, ɖó fí e togun Izlayɛli tɔn blebu gosin é nɛ. Vǐ sunnu Jakɔbu tɔn 10 kpo Jozɛfu tɔn wè kpo sín nyikɔ wɛ è ɖó nú akɔta Izlayɛli tɔn 12 lɛ. Ee è jì vǐ enɛ lɛ gudo é ɔ, Izaki lɛ́ nɔ gbɛ̀ nú xwè gègě. Vivǔ gègě e é ɖó é na ko hun xomɛ n’i. Amɔ̌, mi nú mǐ ni kpɔ́n nǔ e jɛ dó vivǔ tɔn Dina wu é.
Genèse 29:32-35; 30:1-26; 35:16-19; 37:35.