TÀN 21
Jozɛfu Sín Fofó lɛ Gbɛ́ Wǎn N’i
KPƆ́N lee wǔ kú nyaví e ɖò ɖiɖe ɔ mɛ é sɔ é. Jozɛfu wɛ. Fofó tɔn lɛ wɛ sà ɛ nú ajɔ̌tɔ́ enɛ lɛ e wá xwè Ejipu é. Jozɛfu na huzu kannumɔ ɖò dɔ̌n. Aniwu tɔ́ví tɔn lɛ ka wà nǔ nyanya enɛ? Ðó ye hwanwǔ dó Jozɛfu.
Tɔ́ yetɔn Jakɔbu yí wǎn nú Jozɛfu bɔ nǔ bǐ vɔ ɖ’ewu. É tɔ̀ awu gaga ɖɛkpɛɖɛkpɛ ɖé n’i, bo dó ɖexlɛ́ ɛ ɖɔ emi yí wǎn n’i. Ee fofó tɔn 10 lɛ mɔ lee Jakɔbu yí wǎn nú Jozɛfu sɔ é ɔ, ye jɛ wǔ hwan jí bo jɛ wǎn gbɛ́ n’i jí. Amɔ̌, enɛ kɛɖɛ wɛ zɔ́n bɔ ye gbɛ́ wǎn n’i ǎ.
Jozɛfu kú dlɔ̌ wè. Ðò dlɔ̌ wè lɛ bǐ mɛ ɔ, fofó tɔn lɛ ɖò kɔ́ ɖé n’i wɛ. Ee Jozɛfu ɖɔ dlɔ̌ lɛ nú fofó tɔn lɛ é ɔ, ye lɛ́ gbɛ́ wǎn n’i d’eji.
Jozɛfu sín fofó lɛ ɖò lɛngbɔ̌ tɔ́ yetɔn tɔn nyí wɛ gbè ɖokpo, bɔ Jakɔbu ɖɔ nú Jozɛfu ɖɔ é ni wá yí kpɔ́n lee ye ɖè gbɔn é. Ee Jozɛfu sín fofó lɛ mɔ ɛ ja é ɔ, mɛɖé lɛ ɖò ye mɛ bo ɖɔ: ‘Mi nú mǐ ni hu i!’ Amɔ̌, Lubɛn e nyí mɛxo nú ye bǐ é ɖɔ: ‘Eǒ, mi ma bló mɔ̌ ó!’ Ye gbɔ bo zé Jozɛfu nyì dó dotɔ̀ e ko xú é mɛ. Enɛ gudo ɔ, ye junjɔn ayǐ, bo jɛ tamɛ lin dó nǔ e ye na wà n’i é jí jí.
Isimayɛlinu ɖé lɛ wá xweyigbe pɛ́ɛ́, bɔ Juda ɖɔ nú tɔ́ví tɔn lɛ ɖɔ: ‘Mi nú mǐ ni sà ɛ nú Isimayɛlinu elɔ lɛ.’ Nǔ e ye wà é nɛ. Ye sà Jozɛfu yí gankwɛ 20. Nǔ baɖabaɖa tɛ ka nɛ!
Etɛ fofó tɔn lɛ ka na ɖɔ nú tɔ́ yetɔn? Ye hu gbagbǎ ɖokpo, bo sɔ́ awu ɖɛkpɛɖɛkpɛ Jozɛfu tɔn nylɔ dó hun tɔn mɛ azɔn mɔkpan. Enɛ gudo ɔ, ye zé awu ɔ yí xlɛ́ tɔ́ yetɔn Jakɔbu, bo ɖɔ: ‘Nǔ e mǐ mɔ é ɖíe. Kpɔ́n ɖɔ awu Jozɛfu tɔn wɛ à jí.’
Jakɔbu mɔ awu ɔ, bo wlí avǐ bo ɖɔ: ‘Kanlin baɖabaɖa ɖé wɛ na ko hu Jozɛfu.’ Nǔ e Jozɛfu sín fofó lɛ jló ɖɔ tɔ́ yetɔn ni lin é pɛ́ɛ́ nɛ. Wǔ kú Jakɔbu tawun. É ya avǐ nú azǎn mɔkpan. Amɔ̌, Jozɛfu kpò ɖò gbɛ̀. Mi nú mǐ ni kpɔ́n nǔ e jɛ dó wutu tɔn ɖò Ejipu é.
Genèse 37:1-35.