TÀN 46
Ahoho Jeliko Tɔn
ETƐ ka ɖò ahoho Jeliko tɔn hɔ wɛ? É cí ɖɔ bɔnbu ɖaxó wɛ gbà ɛ ɖɔhun. Amɔ̌, bɔnbu ɖě ko ɖè hwenɛnu ǎ, mɔ̌ jɛn agbǎ lɔ ma ko ɖè ǎ é nɛ. Nùjiwǔ Jehovah tɔn ɖevo wɛ! Mi nú mǐ ni kpɔ́n lee nǔ ɔ jɛ gbɔn é.
Jehovah ɖɔ nú Jozuwe ɖɔ: ‘Hwi kpo ahwanfuntɔ́ towe lɛ kpo ni ɖi zɔnlin lɛlɛ̌ dó toxo ɔ. Mi ɖi zɔnlin lɛlɛ̌ dó azɔn ɖokpo gbè ɖokpo kaka nú azǎn ayizɛ́n. Mi zé akɔjɛgba ɔ hɛn. Vɔsanúxwlémawutɔ́ tɛnwe na jɛ nukɔn na, bo na kwín lanzo yetɔn lɛ.
‘Azǎn tɛnwegɔ ɔ gbè ɔ, mi na ɖi zɔnlin lɛlɛ̌ dó toxo ɔ azɔn tɛnwe. Enɛ gudo ɔ, ye na kwín lanzo lɛ hlɔnhlɔn ɖò wǔ, bɔ mi bǐ na súxó tlili. Enɛ ɔ, ahoho ɔ bǐ na hɔ zɛɛn!’
Jozuwe kpo togun ɔ kpo bló nǔ e Jehovah ɖɔ é. Ee ye ɖò zɔnlin ɔ ɖi wɛ é ɔ, ye ɖě nɔ kɛ nu ǎ. Lanzo lɛ kpo afɔ yetɔn lɛ kpo kɛɖɛ sín gbè jɛn è nɔ sè. Ado ɖó na ko hu togun Mawu tɔn sín kɛntɔ́ e ɖò Jeliko lɛ é. A ka mɔ kàn vɔvɔ e è sìn dó flɛtɛli nu é à? Flɛtɛ mɛ̌ tɔn ka wɛ? Laxabu tɔn wɛ. É bló nǔ e amɛ̌ wè lɛ ɖɔ n’i é. Hɛnnumɔ tɔn lɛ kpo é kpo bǐ ɖò xɔ tɔn mɛ, bo ɖò nǔ e ɖò jijɛ wɛ lɛ é kpɔ́n wɛ.
Ee ye ɖi zɔnlin lɛlɛ̌ dó toxo ɔ azɔn tɛnwe azǎn tɛnwegɔ ɔ gbè é ɔ, ye kwín lanzo lɛ, bɔ ahwanfuntɔ́ lɛ súxó tlili. Ahoho ɔ bǐ hɔ. Enɛ gudo ɔ, Jozuwe ɖɔ: ‘Mi hu mɛ e ɖò toxo ɔ mɛ é bǐ, bo dó toxo ɔ zo. Kpatagan, siká, ganvɔ kpo gan kpo kɛɖɛ jɛn mi na jó dó, bo na bɛ́ ye dó dɔkungba e ɖò goxɔ Jehovah tɔn mɛ é mɛ.’
Jozuwe ɖɔ nú amɛ̌ wè lɛ ɖɔ: ‘Mi yì Laxabu xɔ mɛ, bo ɖè hɛnnumɔ tɔn lɛ kpo é kpo tɔ́n.’ Laxabu kpo hɛnnumɔ tɔn lɛ kpo gán, lee amɛ̌ lɛ ko d’akpá tɔn n’i gbɔn é.
Josué 6:1-25.