TÀN 51
Hwiliti kpo Nawomii Kpo
A NA mɔ wema e è nɔ ylɔ ɖɔ Ruth é ɖò Biblu mɛ. Xwédo ɖé nɔ gbɛ̀ hwenu e hwɛɖɔtɔ́ lɛ ɖò nu nú Izlayɛli é, bɔ wema enɛ kpi tàn tɔn. Hwiliti ɔ, nyɔnu Mɔwabunu ɖé wɛ. É nyí Izlayɛli-ví ǎ. Amɔ̌, ee Hwiliti kplɔ́n nǔ dó Jehovah, Mawu nugbǒ ɔ wu é ɔ, é wá yí wǎn nú Jehovah tawun. Nawomii ɔ, nyɔɖaxo wɛ. É wɛ kplɔ́n nǔ Hwiliti dó Jehovah wu.
Nawomii ɔ, Izlayɛli-ví wɛ. Adɔ ɖé tɔ́n ɖò Izlayɛli, bɔ é kpo asú tɔn kpo vǐ tɔn sunnu wè lɛ kpo yí sá xwé dó Mɔwabu. Asú tɔn wá kú. Enɛ gudo ɔ, vǐ tɔn sunnu lɛ da Mɔwabunu wè. Ye nɔ nyí Hwiliti kpo Ɔlupa kpo. Xwè 10 mɔ̌ gudo ɔ, Nawomii sín vǐ sunnu wè lɛ lɔ kú. Kpɔ́n lee é na ko kú wǔ nú Nawomii kpo vǐ tɔn sì wè lɛ kpo sɔ́ é! Etɛ Nawomii ka na wà dìn?
Gbè ɖokpo wá sù, bɔ Nawomii lɛkɔ ɖido mɛ tɔn lɛ gɔ́n. Hwiliti kpo Ɔlupa kpo jló na jó é dó ǎ. Enɛ wu ɔ, ye xwedó é. Amɔ̌, ee ye sɛyi kpɛɖé é ɔ, Nawomii ɖɔ nú vǐ tɔn sì lɛ ɖɔ: ‘Mi lɛkɔ yì xwé, bo yì nɔ nɔ mitɔn lɛ gɔ́n.’
Nawomii kplá’sí kɔ nú ye, bo dó dó é ɖ’abɔ nú ye. Ye wlí avǐ, ɖó ye yí wǎn nú Nawomii tawun. Ye ɖɔ: ‘Eǒ! Mǐ na xwedó we yì mɛ towe lɛ mɛ.’ Amɔ̌, Nawomii ɖɔ: ‘Mi ɖó na lɛkɔ, vǐ ce lɛ. Nǔ na nyɔ́ nú mi hú ɖò xwé mitɔn lɛ gbè.’ Enɛ wu ɔ, Ɔlupa lɛkɔ ɖido xwé. Amɔ̌, Hwiliti ka lɛkɔ ǎ.
Nawomii ɖɔ nú Hwiliti ɖɔ: ‘Ɔlupa ko lɛkɔ ɖido. Hwi lɔ ni xwedó é.’ Amɔ̌ Hwiliti ɖɔ: ‘Ma zín jǐ ce nú ma jó we dó ó! Jǒ mì dó nú ma xwedó we. Fí e a na yì é wɛ un na yì. Fí e a na nɔ ɔ wɛ un na nɔ. Mɛ towe lɛ na nyí mɛ ce lɛ. Mawu towe na nyí Mawu ce. Fí e a na kú jɛ é wɛ un na kú jɛ, bɔ è na ɖi mì dó finɛ.’ Ee Hwiliti ɖɔ mɔ̌ gudo é ɔ, Nawomii sɔ́ zín jǐ tɔn ɖě ǎ.
Ye mɛ wè lɛ wá Izlayɛli, bo sá xwé nyì finɛ. Tlolo ɔ, Hwiliti jɛ azɔ̌ wà ɖò gle lɛ mɛ jí, ɖó hwenu e è nɔ ya jinukún e nɔ nyí orge ɖò Flansegbe mɛ é wɛ. Nya e è nɔ ylɔ ɖɔ Boazu é nɔ jó é dó, bɔ é nɔ ya orge ɖò gle tɔn gbè. A ka tuùn mɛ e nyí nɔ Boazu tɔn é à? Laxabu Jelikonu ɔ wɛ.
Boazu ɖɔ nú Hwiliti gbè ɖokpo ɖɔ: ‘Un sè nǔ e a wà nú Nawomii lɛ é bǐ, lee a nyɔ́ xomɛ dó wutu tɔn gbɔn é. Un tuùn ɖɔ a jó tɔ́, nɔ kpo tò towe kpo dó, bo wá ɖò mɛ e a ma tuùn ɖ’ayǐ ǎ lɛ é tɛntin. Jehovah ni dó nú we!’
Hwiliti ɖɔ: ‘Mɛɖaxo, a nyɔ́ xomɛ dó wutu ce tawun. Lee a ɖɔ xó nú mì gbɔn é nyɔ́, bo dó gbɔ nú mì.’ Boazu yí wǎn nú Hwiliti tawun, bɔ é sɔ́ lín có ye da yeɖee ǎ. Kpɔ́n lee xomɛ na ko hun Nawomii sɔ́ é! Xomɛ Nawomii tɔn lɛ́ hun tawun, hwenu e Hwiliti kpo Boazu kpo jì vǐ yetɔn nukɔntɔn e ye sùn nyǐ ɖɔ Obɛdi é. Obɛdi wá nyí daagbo Davidi tɔn. Mǐ na wá kplɔ́n nǔ dó Davidi wu.
Wema Biblu tɔn e nɔ nyí Ruth é.