TÀN 52
Jedewɔn kpo Sunnu 300 lɛ Kpo
A KA mɔ nǔ e ɖò jijɛ wɛ ɖò ɖiɖe ɔ mɛ é à? Ahwanfuntɔ́ Izlayɛli tɔn wɛ nyí sunnu enɛ lɛ bǐ. Ye fɛ yì dò bo ɖò sìn nu wɛ. Hwɛɖɔtɔ́ Jedewɔn wɛ nyí nya e ɖò te ɖò akpá yetɔn é. É ɖò lee nu sìn gbɔn wɛ ye ɖè é kpɔ́n wɛ.
Kpɔ́n lee nu sìn ɔ gbɔn wɛ sunnu enɛ lɛ ɖè é tlítlí. Mɛɖé lɛ jɛkpo, bo dó nu sìn ɔ mɛ. Amɔ̌, mɛ ɖokpo ɖò alɔ sɔ́ dó wún sìn ɔ na wɛ, bo na mɔ tɛn dó kpɔ́n nǔ e ɖò jijɛ lɛlɛ̌ dó é wɛ lɛ é. Nǔ taji wɛ, ɖó Jehovah ɖɔ nú Jedewɔn ɖɔ é ni cyan sunnu e ɖò sìn nu wɛ, bo ka ɖò acéjí lɛ é kɛɖɛ. Mawu ɖɔ ɖɔ mɛ e kpò lɛ é ɖó na yì xwé. Mǐ ni kpɔ́n nǔ e wu wɛ é.
Adǎn gègě ko lɛ́ gbò Izlayɛli-ví lɛ. Tó e ye tlí nú Jehovah é wɛ zɔ́n. Madiannu lɛ ɖó hlɔnhlɔn hú ye, bo nɔ doya nú ye. Enɛ wu ɔ, Izlayɛli-ví lɛ súxó ylɔ Jehovah ɖɔ é ni d’alɔ emi, bɔ Jehovah ka sè xósusu yetɔn.
Jehovah ɖɔ nú Jedewɔn ɖɔ é ni kplé ahwangɔnu tɔn. Nugbǒ ɔ, Jedewɔn kplé ahwanfuntɔ́ 32 000. Amɔ̌, mɛ 135 000 na kpé ahwan xá wɛ Izlayɛli ɖè. É ɖò mɔ̌ có, Jehovah ɖɔ nú Jedewɔn ɖɔ: ‘Mi sukpɔ́ dín.’ Etɛwu Jehovah ka ɖɔ mɔ̌?
Enyi Izlayɛli ɖu ɖò ahwan ɔ jí ɔ, ye sixu lin ɖɔ emi ɖesu wɛ kpé nǔ wu wɛ zɔ́n. Ye sixu lin ɖɔ emi kún ɖó hudo Jehovah tɔn cobo na ɖu ɖò ahwan jí ó. Enɛ wu wɛ Jehovah ɖɔ nú Jedewɔn ɖɔ: ‘Ðɔ nú mɛ e ɖò xɛsi ɖi wɛ lɛ é ɖɔ ye bǐ ni yì xwé.’ Ee Jedewɔn ɖɔ mɔ̌ é ɔ, ahwanfuntɔ́ 22 000 lɛkɔ yì xwé. Sunnu 10 000 wɛ kpò, bo na tɔ́n ahwan ahwanfuntɔ́ 135 000 nɛ.
Amɔ̌, ɖǒtó! Jehovah ɖɔ: ‘Mi lɛ́ sukpɔ́ dín.’ Enɛ wu ɔ, é ɖɔ nú Jedewɔn ɖɔ é ni kplá ye bonu ye ni nu sìn ɖò tɔsisa enɛ tó. Enyi mɛɖebǔ jɛkpo bo nu sìn ɔ Jedewɔn ɖó na lɛkɔ n’i yì xwé. Jehovah d’akpá ɖɔ: ‘Hwi kpo sunnu 300 e na ɖò acéjí hwenu e ye ɖò sìn nu wɛ é kpo wɛ na ɖu ɖò ahwan ɔ jí.’
Ahwanfunfun ɔ hwenu sù, bɔ Jedewɔn má sunnu 300 lɛ ɖó donu atɔn. É fɔ lanzo kpo zɛ̌n e mɛ zohwin ɖè é kpo nú ye mɛ ɖokpo ɖokpo. Ee zǎn ɖibla xwete é ɔ, ye yì lɛlɛ̌ dó kɛntɔ́ yetɔn lɛ sín ahwansla. Enɛ gudo ɔ, ye bǐ kwín lanzo yetɔn lɛ, bo gbà zɛ̌n lɛ, bo súxó zɛɛn, bo ɖɔ: ‘Hwǐ Jehovah tɔn kpo Jedewɔn tɔn kpo!’ Kɛntɔ́ yetɔn lɛ fɔ́n kpo adohu adohu kpo.Ye jɛ hinhɔn jí, bɔ Izlayɛli-ví lɛ ɖu ɖò ahwan ɔ jí.
Juges wemata 6 jɛ 8.