TÀN 53
Akpá E Jɛfute Dó É
A KO d’akpá, bɔ ɖiɖe tɔn wá vɛwǔ nú we kpɔ́n à? Nǔ enɛ xá nya e ɖò ɖiɖe ɔ mɛ é wɛ zɔ́n, bɔ wǔ kú i sɔmɔ̌. Hwɛɖɔtɔ́ akɔnkpantɔ́ Izlayɛli tɔn ɖé wɛ n’i, bɔ è nɔ ylɔ ɛ ɖɔ Jɛfute.
Jɛfute nɔ gbɛ̀ hwenu e Izlayɛli-ví lɛ jó Jehovah sinsɛn dó é. Ye lɛ́vɔ jɛ nǔ nyanya wà jí. Enɛ wu ɔ, Jehovah tin bɔ Amɔnunu lɛ doya nú ye. Enɛ zɔ́n, bɔ Izlayɛli-ví lɛ súxó ylɔ Jehovah, bo ɖɔ: ‘Mǐ hu hwɛ dó we. Kɛnklɛn, hwlɛn mǐ!’
Nǔ nyanya e Izlayɛli-ví lɛ wà é vɛ́ nú ye. Ye lɛ́vɔ jɛ Jehovah sɛ̀n jí, bo dó xlɛ́ ɖɔ é vɛ́ nú emi. Enɛ wu ɔ, Jehovah lɛ́ jɛ alɔ dó ye jí.
Izlayɛli-ví lɛ sɔ́ Jɛfute, bonu é na nɔ nukɔn nú ye, bɔ ye na tɔ́n ahwan Amɔnunu lɛ. Jɛfute jló ɖɔ Jehovah ni d’alɔ emi ɖò ahwan ɔ hwenu. Enɛ wu ɔ, é d’akpá nú Jehovah ɖɔ: ‘Enyi a d’alɔ mì bonu un ɖu ɖò Amɔnunu lɛ jí ɔ, un na na we mɛ nukɔntɔn e na tɔ́n sín xwé ce gbè, bo na wá kpé mì é.’
Jehovah ɖótó akpá e Jɛfute dó é, bo d’alɔ ɛ bɔ é ɖu ɖò ahwan ɔ jí. Ee Jɛfute lɛkɔ ja xwé é ɔ, a ka tuùn mɛ nukɔntɔn e gosin xwé tɔn gbè, bo wá kpé é à? Vǐ nyɔnu tɔn wɛ. Vǐ ɖokpo e é ka ɖó é nɛ. Jɛfute súxó, bo ɖɔ: ‘Yěgè, vǐ nyɔnu ce! Aluwɛ tɛ mɛ ɖíe a dɔn mì dó é! Amɔ̌, un ko d’akpá nú Jehovah, un ka ɖó na ɖè.’
Ee Jɛfute sín vǐ nyɔnu wá sè akpá e tɔ́ tɔn dó é ɔ, wǔ tó kú é lɔmɔ̌ hwɛ̌. Ðó é na jó tɔ́ tɔn kpo xɔ́ntɔn tɔn lɛ kpo dó, bo na yí sɛ̀n Jehovah ɖò goxɔ Tɔn mɛ ɖò Cilo kaka jɛ hwenu e é na kú é. Enɛ wu ɔ, é ɖɔ nú tɔ́ tɔn ɖɔ: ‘Enyi a ko d’akpá nú Jehovah ɔ, a ɖó na ɖè.’
Jɛfute sín vǐ nyɔnu ɔ ɖido Cilo nugbǒ, bo sɛ̀n Jehovah ɖò goxɔ Tɔn mɛ kaka jɛ hwenu e é kú é. Nyɔnu e ɖò Izlayɛli lɛ é nɔ yí ba ɛ kpɔ́n xwewu xwewu tɛgbɛ, bɔ ye nɔ jɛ awǎ ɖó kpɔ́ nú azǎn ɛnɛ. Togun ɔ yí wǎn nú Jɛfute sín vǐ nyɔnu, ɖó Jehovah sɛntɔ́ tewungbeju wɛ n’i.
Juges 10:6-18; 11:1-40.