TÀN 54
Nya E Ðó Hlɔnhlɔn Hú Mɛ Bǐ É
A KA tuùn nyikɔ nya e nɔ ayikúngban jí, bo ɖó hlɔnhlɔn hú mɛ bǐ é tɔn à? Sansɔɔn wɛ. Hwɛɖɔtɔ́ wɛ n’i. Jehovah wɛ na hlɔnhlɔn Sansɔɔn. Cobonu è na jì Sansɔɔn ɔ, Jehovah ɖɔ nú nɔ tɔn ɖɔ: ‘Zaanɖé ɔ, a na jì vǐ sunnu ɖé. Bɔ é na nɔ nukɔn nú Izlayɛli, bo na hwlɛn ɛ sín Filisitiinu lɛ sí.’
Mɛ baɖabaɖa wɛ Filisitiinu lɛ nyí, bo nɔ nɔ Kanaa. Ye ɖó ahwanfuntɔ́ gègě, bɔ ye nɔ ɖò tagba dó nú Izlayɛli-ví lɛ wɛ. Sansɔɔn ɖido Filisitiinu lɛ gɔ́n gbè ɖokpo, bɔ kinikini ɖé ɖò adǎn jí bo wá kpé é. Sansɔɔn hu kinikini ɔ ɖó alɔ wu. É lɛ́ hu Filisitiinu kanweko donu mɔkpan.
Sansɔɔn wá yí wǎn nú nyɔnu e nɔ nyí Dalila é. Gǎn Filisitiinu lɛ tɔn lɛ d’akpá nú Dalila ɖɔ, enyi é ɖɔ nǔ e zɔ́n bɔ Sansɔɔn ɖó hlɔnhlɔn sɔmɔ̌ é nú ye ɔ, ye mɛ ɖokpo ɖokpo na na ɛ gankwɛ 1 100. Dalila jló ɖɔ akwɛ tobutobu enɛ ni yì tɛ́ ɛ ǎ. É ɖó wanyiyi jɔ wanyiyi nú Sansɔɔn kpo togun Mawu tɔn kpo ǎ. Enɛ wu ɔ, é jɛ tagba dó nú Sansɔɔn jí, bonu é na ɖɔ nǔ e zɔ́n bɔ é ɖó hlɔnhlɔn sɔmɔ̌ é n’i.
Gudo mɛ ɔ, Sansɔɔn gbɔ bo ɖɔ nǔ e zɔ́n bɔ é ɖó hlɔnhlɔn sɔmɔ̌ é n’i. É ɖɔ n’i ɖɔ: ‘Sín hwenu e è jì mì é ɔ, è kpa ɖa nú mì kpɔ́n gbeɖé ǎ. Mawu wɛ ɖè mì, bɔ un nyí devizɔwatɔ́ bunɔ ɖé e è nɔ ylɔ ɖɔ Naziliinu é. Enyi è kpa ɖa ce gbeɖé ɔ, hlɔnhlɔn ce na vɔ.’
Ee Dalila sè mɔ̌ é ɔ, é tɛnkpɔn bɔ Sansɔɔn d’amlɔ jɛ asá tɔn jí. Enɛ gudo ɔ, é ylɔ nya ɖé, bɔ nya ɔ wá kpa ɖa nú Sansɔɔn. Ee Sansɔɔn fɔ́n é ɔ, é ba hlɔnhlɔn kpò. Filisitiinu lɛ byɔ xɔ ɔ mɛ bo wlí i. Ye lyɔ nukún tɔn lɛ, bo sɔ́ ɛ dó ɖó kannumɔ.
Filisitiinu lɛ ɖò yɛhwe yetɔn Dagɔɔn sín xwè ɖu wɛ gbè ɖokpo, bo ɖé Sansɔɔn tɔ́n sín gankpa mɛ, bo jló na cá n’i. Ða Sansɔɔn tɔn ka ko sù nɛ. Sansɔɔn ɖɔ nú nyaví e kplá ɛ ɔ ɖɔ: ‘Gbɔ bonu ma hɛn dotín e hɛn xɔ ɔ ɖó te lɛ é.’ Enɛ gudo ɔ, Sansɔɔn xoɖɛ sɛ́dó Jehovah, bo byɔ ɛ hlɔnhlɔn. É tɔ́ dó dotín lɛ wu, bo súxó, bo ɖɔ: ‘Gbɔ bonu ma kú kpo Filisitiinu elɔ lɛ kpo.’ Filisitiinu 3 000 wɛ ɖò xɔ ɔ ta. Vlafo Fililsitiinu ɖevo lɛ sixu ko wá xwè ɔ tɛnmɛ, bo ɖò xɔ ɔ mɛ. Ee Sansɔɔn tɔ́ dó dotín lɛ wu é ɔ, xɔ ɔ hɔ, bo hu ye bǐ.
Juges wemata 13 jɛ 16.