TÀN 60
Abigayɛlu kpo Davidi Kpo
AKA tuùn nawe e ja Davidi kpé gbé é à? Abigayɛlu wɛ. Ayi tɔn ɖò te, bɔ é lɔn nú Davidi wà nǔ nyanya ǎ. Amɔ̌, cobonu mǐ na kplɔ́n nǔ dó enɛ wu ɔ, mǐ na tó kpɔ́n nǔ e jɛ dó Davidi wu é hwɛ̌.
Ee Davidi hɔn nú Sawulu gudo é ɔ, é hwla éɖee dó só xomɛ. Nɔví tɔn lɛ kpo hɛnnumɔ tɔn e kpò lɛ é kpo wá yí gɔ́ n’i. Sunnu 400 mɔ̌ wɛ wá jɛ gɔ̌n tɔn, bɔ é huzu gǎn yetɔn. Enɛ gudo ɔ, Davidi wá yì mɔ axɔsu Mɔwabu tɔn bo ɖɔ n’i ɖɔ: ‘ Kɛnklɛn bonu tɔ́ ce kpo nɔ ce kpo ni tó ɖò gɔ̌n towe hwɛ̌.’ Gudo mɛ ɔ, Davidi kpo mɛ e gɔ́ n’i lɛ é kpo jɛ hinhɔn hwla dó sókan lɛ mɛ jí.
Enɛ gudo wɛ Davidi wá xò gò Abigayɛlu. Asú Abigayɛlu tɔn Nabalu nyí dɔkunnɔ, bo ɖó ayikúngban gègě. É lɛ́ ɖó lɛngbɔ̌ 3 000 kpo gbagbǎ 1 000 kpo. Nabalu nyí nya hunnylatɔ́ ɖé. Asì tɔn Abigayɛlu nyɔ́ ɖɛkpɛ tawun, bɔ nǔwiwa tɔn lɛ nɔ jɛ gan. É tlɛ hwlɛn xwédo tɔn gán gbè ɖokpo. Mǐ ni kpɔ́n lee nǔ nyí mɔ̌ gbɔn é.
Davidi kpo mɛ tɔn lɛ kpo nyɔ́ xomɛ dó Nabalu wu. Ye kpé nukún dó lɛngbɔ̌ tɔn lɛ wu. Enɛ wu ɔ, Davidi sɛ́ mɛɖé lɛ dó gbè ɖokpo ɖɔ ye ni yí nùɖuɖu wá nú emi ɖò Nabalu gɔ́n. Davidi sín mɛ lɛ wá Nabalu gɔ́n, bo mɔ bɔ é kpo mɛɖé lɛ kpo ɖò fún kpá nú lɛngbɔ̌ lɛ wɛ. Xwè zǎn ɖé gbè wɛ, bɔ nùɖuɖu ɖò Nabalu sí kpɔ́. Enɛ wu ɔ, Davidi sín mɛ lɛ ɖɔ: ‘Mǐ nyɔ́ xomɛ dó wutu towe. Mǐ fin lɛngbɔ̌ towe ɖě ǎ, é nyɔ́ wá ɔ, mǐ kpé nukún dó ye wu wɛ. Dìn ɔ, kɛnklɛn bo na nùɖuɖu kpɛɖé mǐ.’
Nabalu ɖɔ: ‘Un na na nùɖuɖu ce gbɛtɔ́ mi ɖɔhun lɛ ǎ.’ É nyla gbè nú ye tawun, bo lɛ́ ɖɔ xó nyanya dó Davidi wu. Ye lɛkɔ yì mɔ Davidi, bo ɖó gbè n’i. Xomɛ sìn Davidi tawun, bɔ é ɖɔ nú mɛ tɔn lɛ ɖɔ: ‘Mi fɔ hwǐ mitɔn lɛ!’ Ye wlǐ ali bo ɖido Nabalu kpo mɛ tɔn lɛ kpo hu gbé.
Nabalu sín mɛ lɛ ɖokpo wá yì mɔ Abigayɛlu, bo wlí xó e asú tɔn ɖɔ nú Davidi sín mɛ lɛ é ɖɔ n’i. Tlolo ɔ, Abigayɛlu dó nùɖuɖu sín agban nú sɔkɛtɛkɛtɛ ɖé lɛ, bo wlí ali. Ee é kpé Davidi é ɔ, é jɛte sín sɔkɛtɛkɛtɛ tɔn jí, bo dó nu dò, bo ɖɔ: ‘Mɛɖaxo, kɛnklɛn, ma keya nú asú ce Nabalu sín xó ó. Xlonɔ wɛ n’i, bɔ é nɔ wá xlonɔnú. Nùɖuɖu ɖé lɛ ɖíe. Kɛnklɛn yí, bo sɔ́ nǔ e jɛ lɛ é sín hwɛ kɛ mǐ.’
Davidi ɖɔ n’i ɖɔ: ‘Nyɔnu nùnywɛtɔ́ wɛ nú we. A lɔn bonu un hu Nabalu, ɖó alɔgudokpɛ dó nú mɛ tɔn wu ǎ. Yì xwé dó fífá mɛ.’ Gudo mɛ ɔ, Nabalu wá kú, bɔ Davidi da Abigayɛlu.
1 Samuel 22:1-4; 25:1-43.