TÀN 61
Davidi Nyí Axɔsu
SAWULU lɛ́vɔ tɛnkpɔn, bo na wlí Davidi. É cyan mɛ e nyɔ́ ahwan fun ganji é 3 000, bo jɛ gbě tɔn mɛ. Ee Davidi sè mɔ̌ é ɔ, é sɛ́ mɛɖé lɛ dó ɖɔ ye n’i yì ba dò nú fí e Sawulu kpo mɛ tɔn lɛ kpo na nɔ zǎn ɔ mɛ é, bo wá. Enɛ gudo ɔ, Davidi kanbyɔ mɛ wè ɖò mɛ tɔn lɛ mɛ ɖɔ: ‘Mi mɛ̌ ka jló na xwedó mì yì ahwansla Sawulu tɔn mɛ?’
Abicayi ɖɔ n’i ɖɔ: ‘Nyɛ wɛ.’ Dada Davidi tɔn Zeluyaa sín vǐ wɛ nú Abicayi. Ee Sawulu kpo mɛ tɔn lɛ kpo ɖò amlɔ dɔ wɛ é ɔ, Davidi kpo Abicayi kpo zɔn kɛɖɛɛkɛɖɛɛ, bo byɔ ahwansla ɔ mɛ. Ye fɔ Sawulu sín hwǎn kpo singò tɔn kpo ɖò ta tɔn ligbé. Mɛɖebǔ mɔ ye, abǐ sè gbè yetɔn ǎ, ɖó ye bǐ ko d’amlɔ jɛ tó jí.
Kpɔ́n Davidi kpo Abicayi kpo lo. Ye gosin finɛ wuyɛyɛ̌-afɔyɛ́yɛ́, bo wá ɖò só ɖé jí. Davidi súxó sɛ́dó gǎn ahwangɔnu Izlayɛli tɔn, bo ɖɔ: ‘Abunɛɛ, etɛwu a ma ka ɖò gǎn towe, axɔsu ɔ cɔ́ wɛ ǎ? Kpɔ́n! Fitɛ hwǎn tɔn kpo singò tɔn kpo ka ɖè?’
Sawulu nyí fɔ́n. É wlí Davidi sín gbè, bo kanbyɔ ɖɔ: ‘Davidi, hwi wɛ à?’ A ka mɔ Sawulu kpo Abunɛɛ kpo ɖò dò finɛ à?
Davidi yí gbè nú Sawulu, bo ɖɔ: ‘Nyɛ wɛ, axɔsu, aklunɔ ce.’ Davidi lɛ́ kanbyɔ ɛ ɖɔ: ‘Etɛwu a ka ɖò biba na wlí mì wɛ? Agɔ tɛ un ka jɛ dó we? Axɔsu è, hwǎn towe ɖíe. Sɛ́ mɛ ɖokpo dó bonu é wá sɔ́.’
Sawulu yí hwɛgbe, bo ɖɔ: ‘Un wà nǔ nyì dò. Un wà xlonɔnú.’ Enɛ gudo ɔ, Davidi wlí ali bo ɖido, bɔ Sawulu lɛkɔ ɖido xwé. Amɔ̌, Davidi ɖɔ dó ayi mɛ ɖɔ: ‘Sawulu na wá hu mì gbè ɖokpo. Un ɖó na hɔn yì Filisitiinu lɛ tó mɛ.’ Nǔ e é wà é nɛ. Davidi kpéwú bo blɛ́ Filisitiinu lɛ, bɔ ye mɔ ɖɔ é ɖò emi jí lo.
Filisitiinu lɛ wá tɔ́n ahwan Izlayɛli gbè ɖokpo. Sawulu kpo Jonataan kpo kú ɖò ahwan ɔ hwenu. Wǔ kú Davidi tawun, bɔ é wlan han ɖagbe ɖagbe ɖé. É ɖɔ ɖò han ɔ mɛ ɖɔ: ‘Un ɖò aluwɛ mɛ nú we tawun, nɔví ce Jonataan. A vɛ́ nú mì ɖesu!’
Enɛ gudo ɔ, Davidi lɛkɔ wá Eblɔnu toxo mɛ ɖò Izlayɛli. Ahwan ɖé tɔ́n ɖò mɛ e sɔ́ Sawulu sín vǐ Ici-Bocɛti axɔsu lɛ é kpo mɛ e ba ɖɔ Davidi ni nyí axɔsu lɛ é kpo tɛntin. Amɔ̌, Davidi sín mɛ lɛ ɖó ɖuɖeji. Xwè 30 wɛ Davidi ɖó hwenu e è sɔ́ ɛ axɔsu é. É ɖu axɔsu ɖò Eblɔnu nú xwé tɛnwe adaɖé. É jì vǐ ɖò finɛ. Ye mɛ ɖé lɛ nɔ nyí Amɔɔ, Abusalɔmu kpo Adonija kpo.
Davidi kpo mɛ tɔn lɛ kpo ɖido toxo ɖɛkpɛɖɛkpɛ e nɔ nyí Jeluzalɛmu é yí gbé gbè ɖokpo. Zeluyaa sín vǐ ɖevo e nɔ nyí Joabu é wɛ nɔ nukɔn nú ye ɖò ahwan ɔ hwenu. Enɛ wu ɔ, Davidi d’ajɔ Joabu, bo sɔ́ ɛ gǎn ɖó ahwangɔnu tɔn nu. Davidi jɛ axɔsu ɖu jí ɖò Jeluzalɛmu lo.
1 Samuel 26:1-25; 27:1-7; 31:1-6; 2 Samuel 1:26; 3:1-21; 5:1-10; 1 Chroniques 11:1-9.