TÀN 65
È Má Axɔsuɖuto Ɔ
A KA tuùn nǔ e wu nya enɛ ɖò awu tɔn ja wɛ é à? Jehovah wɛ ɖɔ é ni wà mɔ̌. Gbeyiɖɔ Mawu tɔn Axijaa wɛ nyí nya ɔ. A ka tuùn nǔ e gbeyiɖɔ Mawu tɔn ɖé nyí é à? Mɛ e Mawu nɔ ɖɔ nǔ e na wá jɛ lɛ é na é wɛ.
Jeloboamu ɖɔ xó na wɛ Axijaa ɖè ɖò ɖiɖe ɔ mɛ. Jeloboamu nyí nya nukúnɖeji ɖé, bo nɔ w’azɔ̌ nú Salomɔɔ. Ee Axijaa kpé Jeloboamu ɖò ali jí é ɔ, é bló nùɖé bɔ é kpaca mɛ. É ɖè awu yɔyɔ̌ e é dó é, bo ja ɛ ɖó 12. É ɖɔ nú Jeloboamu ɖɔ: ‘Fɔ xwɛ 10.’ A ka tuùn nǔ e wu Axijaa fɔ xwɛ 10 nú Jeloboamu é à?
Axijaa tinmɛ ɖɔ Jehovah na yí axɔsuɖuto ɔ sín Salomɔɔ sí. É ɖɔ ɖɔ Jehovah na fɔ akɔta 10 jó nú Jeloboamu. Enɛ xlɛ́ ɖɔ akɔta wè géé jí wɛ Salomɔɔ sín vǐ Holoboamu na ɖu axɔsu dó.
Ee Salomɔɔ sè nǔ e Axijaa ɖɔ é ɔ, é sìn xomɛ n’i kaka, bɔ é ba na hu Jeloboamu. Amɔ̌, Jeloboamu hɔn yì Ejipu. É nɔ zaan é ɔ, Salomɔɔ kú. É ɖu axɔsu nú xwè 40, bɔ vǐ tɔn Holoboamu jɛ tɛn tɔn mɛ. Jeloboamu ɖò Ejipu bo sè ɖɔ Salomɔɔ kú. Enɛ wu ɔ, é lɛkɔ wá Izlayɛli.
Holoboamu nyí axɔsu ɖagbe ɖé ǎ. É tlɛ lɛ́ syɛn nukún dó togun ɔ wu hú lee tɔ́ tɔn Salomɔɔ bló gbɔn é. Jeloboamu kpo mɛ nukúnɖeji ɖé lɛ kpo yí mɔ Holoboamu, bo byɔ ɛ ɖɔ é ni nyɔ́ xomɛ dó togun ɔ wu. Amɔ̌, Holoboamu ka ɖótó ye ǎ. É nyɔ́ wà ɔ, é lɛ́ syɛn nukún hú xóxó ɔ. Enɛ wu ɔ, togun ɔ sɔ́ Jeloboamu axɔsu dó akɔta 10 nu. Amɔ̌, akɔta wè kpò ɖò Holoboamu sín acɛ glɔ. Bɛnjamɛ kpo Juda kpo sín akɔta wɛ.
Jeloboamu jló ɖɔ togun ɔ ni yì Jeluzalɛmu bo sɛ̀n Jehovah ɖò tɛmpli Tɔn mɛ ǎ. Enɛ wu ɔ, é bló nyibuví siká tɔn wè, bonu akɔta 10 lɛ na nɔ sɛ̀n. Tlolo ɔ, adakaxixo gɔ́ tò ɔ mɛ.
Axɔsuɖuto akɔta wè lɛ tɔn lɔ ɖò wuvɛ̌ mɛ. Holoboamu jɛ axɔsu ɖu jí é ɔ, é yì xwè atɔ́ɔ́n ǎ, bɔ axɔsu Ejipu tɔn tɔ́n ahwan Jeluzalɛmu, bo bɛ́ akwɛnú gègě sín tɛmpli Jehovah tɔn mɛ. Enɛ wu ɔ, tɛmpli ɔ nɔ lee Salomɔɔ gbá sɔ́ nyì é nú hwenu nabi ɖé ǎ.
1 Rois 11:26-43; 12:1-33; 14:21-31.