TÀN 67
Jozafati Ðeji Dó Jehovah Wu
A KA tuùn mɛ e ɖò ɖiɖe ɔ mɛ lɛ é à? Etɛ wà wɛ ye ka ɖè? Ahwan fun gbé wɛ ye xwè, bɔ mɛ e ɖò nukɔn lɛ é ɖò han jì wɛ. Amɔ̌, a sixu kanbyɔ ɖɔ: ‘Etɛwu hanjitɔ́ lɛ ma ka hɛn hwǐ kpo hwǎn kpo bo na dó fun ahwan ɔ ǎ?’ Mi nú mǐ ni kpɔ́n.
Jozafati wɛ nyí axɔsu ɖò axɔsuɖuto akɔta wè tofɔligbé tɔn lɛ mɛ. Hwenu e é ɖò axɔsu ɖu wɛ é ɔ, Axabu kpo Jezabɛlu kpo lɔ ɖò acɛ kpa wɛ ɖò axɔsuɖuto akɔta 10 totaligbé tɔn lɛ mɛ. Jozafati nyí axɔsu ɖagbe tɔ́ tɔn Asa ɖɔhun. Enɛ zɔ́n bɔ mɛ e ɖò axɔsuɖuto akɔta wè tofɔligbé tɔn mɛ lɛ é nɔ vivo mɛ nú xwè gègě.
Amɔ̌ dìn ɔ, nùɖé jɛ bo ɖó adohu adohu nú togun ɔ. Mɛɖé lɛ wá ɖɔ nú Jozafati ɖɔ: ‘Ahwangɔnu ɖaxó ɖé gosin Mɔwabu, Amɔnu kpo Seyii Só kpo jí, bo ja ahwan tɔ́n we gbé.’ Izlayɛli-ví gègě xò yeɖee kplé dó Jeluzalɛmu, bo byɔ alɔdo Mawu tɔn. Ye byɔ tɛmpli ɔ mɛ, bɔ Jozafati xoɖɛ bo ɖɔ: ‘Jehovah Mawu mǐtɔn è, mǐ tuùn nǔ e mǐ na wà é ǎ. Mǐ ɖó agbɔ̌n ɖě ɖò ahwangɔnu ɖaxó elɔ nukɔn ǎ. Mǐ ɖò alɔdo towe byɔ wɛ.’
Jehovah ɖótó ye, bo ɖɔ nú deví tɔn lɛ ɖokpo, bɔ é ɖɔ nú togun ɔ ɖɔ: ‘Ahwan ɔ nyí mitɔn ǎ, Mawu tɔn wɛ. Mi ɖò ahwan na fun wɛ ǎ. Mi vɛ́ nɔ xwii, ba kpɔ́n lee Jehovah na hwlɛn mi gbɔn é.’
Enɛ wu ɔ, Jozafati ɖɔ nú togun ɔ ayihɔngbe tɔn zǎnzǎn ɖɔ: ‘Mi ɖeji dó Jehovah wu!’ Enɛ gudo ɔ, é fɔ hanjitɔ́ ɖé lɛ ɖó ahwanfuntɔ́ tɔn lɛ nukɔn, bɔ ye ɖò zɔnlin ɖi wɛ, bo ɖò han jì dó kpa Jehovah wɛ. A ka tuùn nǔ e jɛ hwenu e ye sɛkpɔ fí e na fun ahwan ɔ ɖé wɛ ye ɖè é à? Jehovah huzu ayi dó xomɛ nú kɛntɔ́ yetɔn e wá tɔ́n ahwan ye lɛ é, bɔ ye jɛ yeɖee hu jí. Ee Izlayɛli-ví lɛ wá fí ɔ é ɔ, ye bǐ ko kú!
Jiɖe e Jozafati ɖó dó Jehovah wu é xlɛ́ ɖɔ é nyɔ̌nùí à cé? Enyi mǐ lɔmɔ̌ ɖeji dó Jehovah wu ɔ, mǐ na nyí nùnywɛtɔ́.
1 Rois 22:41-53; 2 Chroniques 20:1-30.