TÀN 70
Jonasi kpo Hweví Ðaxó ɔ Kpo
KPƆ́N nya e ɖò sìn ɔ mɛ é. Adǎn ɖaxó wɛ ɖò gbigbo é wɛ, kabǐ? Hweví enɛ jló na sɔ́ ɛ mì! A ka tuùn nya e wɛ é à? Jonasi wɛ. Mi nú mǐ ni kpɔ́n nǔ e jɛ, bɔ adǎn ɖaxó enɛ ɖò gbigbo é wɛ é.
Gbeyiɖɔ Jehovah tɔn wɛ nú Jonasi. Gbeyiɖɔ Jehovah tɔn Elizee kú bɔ é na nɔ zaan é ɔ, Jehovah ɖɔ nú Jonasi ɖɔ: ‘Yì toxo ɖaxó Ninivu tɔn mɛ. Nǔ nyanya wiwa yetɔn wá gbɛgbɛɖɛgbɛ, bɔ Un ba ɖɔ a ni yì tinmɛ nú ye.’
Amɔ̌, Jonasi ka ba na yì ǎ. Enɛ wu ɔ, é byɔ tɔjihun e xwè fí ɖevo sésé é mɛ. Hɔn e Jonasi hɔn, bo ɖido fí ɖevo é hun xomɛ nú Jehovah ɖebǔ ǎ. Enɛ wu ɔ, É fɔ́n jɔhɔn ɖaxó ɖé dó xù ɔ jí. Jɔhɔn ɔ syɛn kaka, bo ja tɔjihun ɔ syɔ gbé. Ado hu tɔjihunkúntɔ́ lɛ, bɔ ye jɛ xó sú ylɔ yɛhwe yetɔn lɛ jí ɖɔ ye ni wá d’alɔ emi.
Jonasi wá ɖɔ nú ye ɖɔ: ‘Jehovah Mawu e ɖó jinukúnsin kpo ayikúngban kpo é wɛ un nɔ sɛ̀n. Nùɖé wɛ É zɔ́n mì, bɔ un ka ba na wà ǎ bo ɖò hinhɔn wɛ.’ Tɔjihunkúntɔ́ lɛ wá kanbyɔ ɛ ɖɔ: ‘Etɛ mǐ ka na wà nú we, bɔ jɔhɔn ɔ na xwɛ?’
Jonasi ɖɔ: ‘Mi zé mì nyì dó xù ɔ mɛ, enɛ ɔ, jɔhɔn ɔ na xwɛ. Tɔjihunkúntɔ́ lɛ ba na wà mɔ̌ ǎ. Amɔ̌, ee jɔhɔn ɔ fɔ́n bo ɖò syɛnsyɛn d’eji wɛ é ɔ, ye gbɔ bo zé Jonasi nyì dó xù ɔ mɛ. Tlolo ɔ, jɔhɔn ɖaxó ɔ xwɛ, bɔ xù ɔ ɖó adǎn wiwa te.
Ee ye zé Jonasi nyì xù ɔ mɛ é ɔ, hweví ɖaxó ɖé zé é mì. Amɔ̌, é ka kú ǎ. Jonasi nɔ hweví ɔ xomɛ nú kéze atɔn zǎn atɔn. Tó e Jonasi tlí, bo ma yì Ninivu ǎ é wá vɛ́ n’i ɖesu. Enɛ wu ɔ, a ka tuùn nǔ e é wà é à?
Jonasi xoɖɛ sɛ́dó Jehovah ɖɔ é ni d’alɔ emi. Nugbǒ ɔ, hweví ɔ vi Jonasi sɔ́ nyì agě jí. Jehovah sín nùjiwǔ wɛ. Enɛ gudo ɔ, Jonasi yì Ninivu. Tàn elɔ kplɔ́n mǐ ɖɔ mǐ ɖó na wà nǔ ɖebǔ e Jehovah zɔ́n mǐ é, kabǐ?
Wema Biblu tɔn e nɔ nyí Yona é.