TÀN 74
Nya E Ma Nɔ Ði Xɛsi Ǎ É
KPƆ́N mɛ lɛ ɖò dɔnkpɛvu enɛ cá ko wɛ. A ka tuùn mɛ e wɛ é à? Jelemii wɛ. Gbeyiɖɔ Mawu tɔn ɖé wɛ, bo ɖò wɛn taji ɖé dó wɛ.
Tlolo e Axɔsu Joziasi jɛ kún sú dó nú vodun sínsɛ́n jí ɖò tò ɔ mɛ é wɛ Jehovah ɖɔ Jelemii na nyí gbeyiɖɔ emitɔn. Amɔ̌, Jelemii mɔ ɖɔ emi kún ko sù gbeyiɖɔ nyí ó. É ɖò mɔ̌ có, Jehovah ɖɔ Emi na d’alɔ ɛ.
Jelemii ɖɔ nú Izlayɛli-ví lɛ ɖɔ ye ni lɛkɔ sín nǔnyanyawiwa gudo. É ɖɔ: ‘Akɔta lɛ nɔ sɛ̀n Mawu nugbǒ ɔ ǎ.’ Mɔ̌ ɖokpo ɔ, Izlayɛli-ví gègě wɛ jó Jehovah Mawu nugbǒ ɔ dó, bo nɔ sɛ̀n vodun lɛ. Ee Jelemii ɖɔ nú togun ɔ ɖɔ Mawu na dɔn tó nú ye ɖó nǔnyanyawiwa yetɔn lɛ wu é ɔ, ye jɛ kiko é jí.
Xwè ɖò xwè jí jɛ wɛ é ɔ, Joziasi wá kú. Sun atɔn gudo ɔ, vǐ tɔn Jexoyakimu jɛ tɛn tɔn mɛ. Jelemii kpó ɖò ɖiɖɔ nú togun ɔ wɛ ɖɔ: ‘Enyi mi ma huzu jujɔ ǎ ɔ, è na sú kún dó nú Jeluzalɛmu.’ Vɔsanúxwlémawutɔ́ lɛ wlí Jelemii, bo súxó ɖɔ: ‘A ɖó na kú, ɖó xó enɛ lɛ e a ɖɔ é wu.’ Enɛ gudo ɔ, ye ɖɔ nú axɔví Izlayɛli tɔn lɛ ɖɔ: ‘Jelemii ɖó na kú, ɖó é nyla nu dó tò mǐtɔn wu.’
Etɛ Jelemii ka na wà dìn? Ado hu i ǎ. É ɖɔ nú ye bǐ ɖɔ: ‘Jehovah wɛ sɛ́ mì dó, bo ɖɔ ma ɖɔ xó enɛ lɛ nú mi. Enyi mi ma huzu jujɔ ǎ ɔ, Jehovah na sú kún dó nú Jeluzalɛmu. Amɔ̌, mi ni mɔ nǔ jɛ nǔ elɔ wu: Enyi mi hu mì hǔn, xomɛvɔnɔ wɛ mi hu nɛ.’
Axɔví lɛ jó Jelemii dó nyì gbɛ̀, amɔ̌, Izlayɛli-ví lɛ huzu jujɔ ǎ. Gudo mɛ ɔ, axɔsu Babilɔnu tɔn Nɛbukadunɛzaa wá gbà Jeluzalɛmu tò ɔ, bo bɛ́ Izlayɛli-ví afatɔ́ɔ́n donu mɔkpan yì kannumɔgbenu. Enyi mɛ e a ma tuùn kpɔ́n ǎ lɛ é wá wlí we gannugánnú, bo dɔn we yì tò e a ma tuùn ǎ é mɛ ɔ, nɛ̌ é ka na cí gbɔn nú we?
Jérémie 1:1-8; 10:1-5; 26:1-16; 2 Rois 24:1-17.