TÀN 82
Mɔludekayi kpo Ɛsitɛɛ Kpo
XWÈ kpɛɖé hwɛ̌ cobonu Ɛzla na yì Jeluzalɛmu ɔ, Mɔludekayi kpo Ɛsitɛɛ kpo wɛ nyí Izlayɛli-ví nukúnɖeji e ɖò axɔsuɖuto Pɛlusii tɔn mɛ lɛ é. Ɛsitɛɛ wɛ nyí axɔsi ɔ, bɔ tɔ́ tɔn nɔví sín vǐ Mɔludekayi nyí gǎnhɔnyitɔ́ xɔsu axɔsu ɔ tɔn. Mi nú mǐ ni kpɔ́n lee nǔ nyí mɔ̌ gbɔn é.
Ɛsitɛɛ kpó ɖò vǔ tawun có mɛjitɔ́ tɔn lɛ kú, bɔ Mɔludekayi wɛ kpé nukún dó wutu tɔn. Axɔsu Pɛlusii tɔn Axasuelusi ɖó hɔn mɛ ɖé ɖò toxo Cucaan tɔn mɛ, bɔ Mɔludekayi lɔ ɖò deví tɔn lɛ mɛ. Gbè ɖokpo sù, bɔ axɔsu ɔ sín asì Vaciti tlitó n’i. Enɛ wu ɔ, axɔsu ɔ da asì ɖevo. A ka tuùn mɛ e é da é à? Ɛsitɛɛ wɛ.
A ka mɔ nya goyitɔ́ enɛ e mɛ lɛ ɖò kɔ́ ɖé na wɛ é à? Amaa wɛ. É wɛ nyí gǎnhɔnyitɔ́ xɔsu Pɛlusii tɔn. Mɔludekayi wɛ junjɔn ayǐ ɖò finɛ. Amaa ba ɖɔ elɔ ni ɖèkɔ́ nú emi. Amɔ̌, Mɔludekayi bló mɔ̌ ǎ, ɖó é mɔ ɖɔ é kún sɔgbe bonu è na ɖèkɔ́ nú gbɛtɔ́ mɔhun ó. Nǔ enɛ sìn xomɛ nú Amaa kaka bɔ é kàn ayixa ɖé.
Amaa ɖó adingban nú axɔsu ɔ dó Izlayɛli-ví lɛ kɔ. É ɖɔ: ‘Gbɛtɔ́ baɖabaɖa wɛ nú ye, bɔ ye nɔ lɛ́ gbà sɛ́n towe lɛ. È ɖò na hu ye.’ Axasuelusi ka tuùn ɖɔ Izlayɛli-ví wɛ nú Ɛsitɛɛ ǎ. Enɛ wu ɔ, é ɖótó Amaa bo ɖè sɛ́n ɖé tɔ́n, bɔ è ɖó azǎn bo na hu Izlayɛli-ví lɛ bǐ.
Ee Mɔludekayi sè sɛ́n ɔ é ɔ, é ɖó linkpɔ́n n’i tawun. É sɛ́ wɛn dó Ɛsitɛɛ bo ɖɔ: ‘Yì mɔ axɔsu ɔ bo savo n’i ɖɔ é ni hwlɛn mǐ.’ Sɛ́n Pɛlusii tɔn ka ɖɔ ɖɔ cobonu è na yì axɔsu ɔ gɔ́n ɔ, é ɖó na ylɔ mɛ hwɛ̌. Amɔ̌, Ɛsitɛɛ kpɔ́n mɔ̌ ǎ, bo yì axɔsu ɔ gɔ́n. Ee axɔsu ɔ mɔ ɛ é ɔ, é dlɛn siká sín gankpo tɔn sɛ́dó é. Enɛ xlɛ́ ɖɔ è kún na hu i ó. Ɛsitɛɛ ylɔ axɔsu ɔ kpo Amaa kpo, bonu ye na wá ɖu nǔ ɖò gɔ̌n tɔn. Ee ye wá é ɔ, axɔsu ɔ kanbyɔ Ɛsitɛɛ ɖɔ etɛ é ka jló ɖɔ emi ni bló n’i é jí. Ɛsitɛɛ ɖɔ ɖɔ enyi é kpo Amaa kpo yí gbè, bonu emi lɛ́ yí jonɔ yetɔn ayihɔngbe tɔn ɔ, emi na ɖɔ nǔ ɔ n’i.
Ee ye wá nùɖuɖu ɔ tɛnmɛ é ɔ, Ɛsitɛɛ ɖɔ nú axɔsu ɔ ɖɔ: ‘È ɖò nyì kpo togun ce kpo na hu wɛ.’ Xomɛ sìn axɔsu ɔ, bɔ é kanbyɔ ɖɔ: ‘Mɛ ka gla bo ja nǔ mɔhun bló gbé?’
Ɛsitɛɛ ɖɔ: ‘Amaa nùbaɖabaɖa elɔ wɛ!’
Xomɛ lɛ́ sìn axɔsu ɔ d’eji, bɔ é ɖegbe ɖɔ è ni hu Amaa. Enɛ gudo ɔ, axɔsu ɔ sɔ́ Mɔludekayi bɔ é nyí gǎnhɔnyitɔ́ xɔsu. Mɔludekayi bló bɔ è ɖè sɛ́n yɔyɔ̌ ɖé tɔ́n. Sɛ́n enɛ na acɛ Izlayɛli-ví lɛ, bonu azǎn e è ɖó bo na hu ye é gbè sù ɔ, ye na jɛ ahwan dó gbɛ̀ yetɔn jí. Ðó Mɔludekayi nyí mɛ nukúnɖeji mɔhun wutu ɔ, mɛ gègě d’alɔ Izlayɛli-ví lɛ, bɔ ye gán sín kɛntɔ́ yetɔn lɛ sí.
Wema Biblu tɔn e nɔ nyí Esther é.