TÀN 84
Wɛnsagun Ðé Wá Mali Gɔ́n
NYƆNU ɖɛkpɛɖɛkpɛ enɛ nɔ nyí Mali. Izlayɛli-ví wɛ n’i, bo nɔ nɔ toxo Nazalɛti tɔn mɛ. Mawu tuùn ɖɔ mɛ ɖagbe wɛ n’i. Nǔ e zɔ́n bɔ é sɛ́ wɛnsagun Gabliyɛ dó ɖɔ é ni dó wɛn ɛ é nɛ. A ka tuùn wɛn e Gabliyɛ dó Mali é à? Mi nú mǐ ni kpɔ́n.
Gabliyɛ ɖɔ n’i ɖɔ: ‘Kú dó lěhwenu, hwi mɛ e Mawu jɔwu hú mɛ bǐ é. Jehovah ɖò kpɔ́ xá we.’ Mali ka mɔ mɛ enɛ kpɔ́n ǎ. Ayi tɔn gbado, ɖó é tuùn nǔ e ɖɔ wɛ mɛ ɔ ɖè é ǎ. Amɔ̌, Gabliyɛ hwìhwɛ́ ayi tɔn.
É ɖɔ: ‘Mali, ma ɖi xɛsi ó. Jehovah hun xomɛ dó wutu towe ɖesu. Enɛ wu wɛ é jló na bló nùjiwǔ ɖé nú we. A na jì vǐ sunnu ɖokpo ɖò malin-malin mɛ, bo na sùn nyǐ i ɖɔ Jezu.’
Gabliyɛ lɛ́ ɖɔ: ‘Vǐ enɛ na nyí mɛ nukúnɖeji ɖé, bɔ è na nɔ ylɔ ɛ ɖɔ Mawu Ajalɔnnɔ-ví. Jehovah na sɔ́ ɛ axɔsu, Davidi ɖɔhun. Amɔ̌, Jezu na ɖu axɔsu kaka sɔyi, bɔ axɔsuɖuɖu tɔn na vɔ gbeɖé ǎ!’
Mali kanbyɔ ɖɔ: ‘Nɛ̌ nǔ ka sixu nyí mɔ̌ gbɔn? Un tlɛ ko da asú ǎ. Nyì ɖíe ma tuùn sunnu kpɔ́n ǎ é, bɔ nɛ̌ un ka na jì vǐ gbɔn?’
Gabliyɛ ɖɔ n’i ɖɔ: ‘Hlɔnhlɔn Mawu tɔn na wá jǐ towe. Enɛ wu wɛ è na nɔ ylɔ vǐ ɔ ɖɔ Vǐ Mawu tɔn.’ Enɛ gudo ɔ, é ɖɔ nú Mali ɖɔ: ‘Flín hɛnnumɔ towe Elizabɛti. Mɛ lɛ ɖɔ ɖɔ é ko kpò dín, bo kún sɔ́ sixu jì vǐ ó. Amɔ̌ dìn ɔ, é na jì vǐ sunnu ɖé ɖò malin-malin mɛ. Enɛ wu ɔ, a na mɔ ɖɔ nǔ ɖebǔ kún glo Mawu ó.’
Mali ɖɔ: ‘Deví Jehovah tɔn wɛ un nyí! Lee a ɖɔ gbɔn ɔ, ni nyí mɔ̌ nú mì pɛ́ɛ́.’ Enɛ gudo ɔ, wɛnsagun ɔ jó é dó.
Mali hwlɛndo bo yì ba Elizabɛti kpɔ́n. Ee Elizabɛti sè Mali sín gbè é ɔ, é víví nú vǐ e ɖò xò tɔn mɛ é, bɔ é danwǔ. Gbigbɔ Mawu tɔn gɔ́ ayi mɛ nú Elizabɛti, bɔ é ɖɔ nú Mali ɖɔ: ‘Mawu xoɖɛ ɖagbe dó jǐ towe hú nyɔnu lɛ bǐ.’ Mali xɔ sun atɔn mɔ̌ ɖò Elizabɛti gɔ́n, enɛ gudo ɔ, é wá yì Nazalɛti.
Mali nyí asixɔntɔn nú nya e nɔ nyí Jozɛfu é. Amɔ̌, ee Jozɛfu sè ɖɔ Mali ɖò xò é ɔ, é lin ɖɔ emi kún sɔ́ ɖó na da ɛ ó. Enɛ gudo ɔ, wɛnsagun Mawu tɔn ɖɔ n’i ɖɔ: ‘Xɛsi ma ɖi we nú a gɔn Mali da ó, ɖó vǐ e ɖò xò tɔn mɛ é ɔ, nǔwiwa Mawu tɔn wɛ.’ Enɛ wu ɔ, Mali kpo Jozɛfu kpo da yeɖee, bo ɖò te kpɔ́n Jezu sín jiji.