TÀN 86
Sunví Ðé Xlɛ́ Ali Sunnu Ðé Lɛ
AKA mɔ sunví e ɖò kínkɔ́n wɛ bɔ sunnu enɛ ɖò alɔ dlɛn dó wɛ é à? Hwenu e ye gosin Jeluzalɛmu é wɛ sunví ɔ tɔ́n. Sunnu enɛ lɛ gosin Zǎnzǎnhweji. Ye nɔ mɔ nǔ jɛ sun sín wuntun lɛ wu. Ye ɖi nǔ ɖɔ sunví yɔyɔ̌ enɛ na nɔ nukɔn nú ye yì mɛ nukúnɖeji ɖé gɔ́n.
Ee sunnu lɛ wá Jeluzalɛmu é ɔ, ye kanbyɔ ɖɔ: ‘Fitɛ vǐ e è jì, bɔ é na nyí Jwifu lɛ xɔsu é ka ɖè?’ Nyikɔ Izlayɛli-ví lɛ tɔn ɖevo wɛ nyí “Jwifu lɛ”. Sunnu lɛ lɛ́ ɖɔ: ‘Mǐ mɔ sunví e ɖè jiji tɔn xlɛ́ é ɖò Zǎnzǎnhweji fí e mǐ gosin é, bɔ mǐ wá xwé kanbyɔ gbé.’
Ee axɔsu Jeluzalɛmu tɔn Elodu sè xó enɛ é ɔ, ayi tɔn bǐ gbado. É jló ɖɔ mɛ ɖevo ni yí axɔsuɖuɖu ɔ sín emi sí ǎ. Enɛ wu ɔ, Elodu ylɔ vɔsanúxwlemawutɔ́gán lɛ, bo kanbyɔ ye ɖɔ: ‘Fitɛ è ka na jì axɔsu e sín akpá è dó é ɖè?’ Ye yí gbè n’i ɖɔ: ‘Bɛteleyɛmu wɛ Biblu ɖɔ.’
Enɛ gudo ɔ, Elodu ylɔ sunnu e gosin Zǎnzǎnhweji lɛ é, bo ɖɔ nú ye ɖɔ: ‘Mi yì ba dò nú vǐ ɔ céɖécéɖé. Enyi mi mɔ ɛ hǔn, mi wá ɖɔ nú mì, bonu nyɛ lɔmɔ̌ na yì kàn xwé byɔ.’ Amɔ̌, Elodu jló na hu vǐ ɔ wɛ!
Sunví ɔ ka nɔ nukɔn nú sunnu lɛ kaka yì Bɛteleyɛmu, bo nɔte ɖò fí e vǐ ɔ ɖè é. Ee sunnu lɛ byɔ xɔ ɔ mɛ é ɔ, ye mɔ Mali kpo yɛyɛví Jezu kpo. Ye kàn agban nú Jezu. Amɔ̌, Jehovah ka wá xò dlɔ̌ sunnu lɛ ɖɔ ye ni ma sɔ́ lɛkɔ gbɔn Elodu gɔ́n ó. Enɛ wu ɔ, ye wlǐ ali ɖevo bo yì tò yetɔn mɛ.
Ee Elodu mɔ ɖɔ sunnu e gosin Zǎnzǎnhweji lɛ é flú emi é ɔ, xomɛ sìn i kaka. Enɛ wu ɔ, é ɖegbe ɖɔ è ni hu vǐ sunnu e ɖò Bɛteleyɛmu bo ma ko ɖó xwè wè ǎ é kaka jɛ e ko ɖó xwè wè lɛ é bǐ jí. Amɔ̌, Jehovah ka ko xò dlɔ̌ Jozɛfu dó mɛhwenu, bɔ é hɔn yì Ejipu kpo xwédo tɔn kpo. Ee Jozɛfu wá sè ɖɔ Elodu ko kú é ɔ, é kplá Mali kpo Jezu kpo, bɔ ye lɛkɔ wá Nazalɛti. Finɛ wɛ Jezu nɔ bo sù.
A ka tuùn mɛ e bló bɔ sunví yɔyɔ̌ enɛ hɔ́n é à? Ee sunnu enɛ lɛ mɔ sunví ɔ é ɔ, Jeluzalɛmu wɛ ye tó yì hwɛ̌. A ka flín à? Sataan Awovi wɛ jló na hu Vǐ Mawu tɔn. É tuùn ɖɔ Axɔsu Jeluzalɛmu tɔn Elodu na tɛnkpɔn bo na hu i. Enɛ wu wɛ é bló bɔ sunví ɔ hɔ́n.