TÀN 88
Jaan Bló Baptɛm Nú Jezu
KPƆ́N ahwannɛ́ e ɖò nya enɛ sín ta na ɖó jɛ wɛ é. Jezu wɛ nyí nya ɔ. Xwè 30 mɔ̌ ɖó wɛ é ɖè. Sunnu e kpo é kpo ɖò finɛ é nɔ nyí Jaan. Mǐ ko ɖɔ xó ɖé dó wutu tɔn wá yì. Hwenu e Mali yì ba hɛnnumɔ tɔn Elizabɛti kpɔ́n é ɔ, é víví nú yɛyɛví e ɖò xò Elizabɛti tɔn mɛ é kaka, bɔ é danwǔ. A ka flín à? Yɛyɛví enɛ ɔ, Jaan wɛ. Amɔ̌, etɛ wà wɛ Jaan kpo Jezu kpo ka ɖè ɖò finɛ?
Jaan nylɔ́ Jezu dó Judɛɛn Tɔ̀ ɔ mɛ tlolo wɛ. Lee è nɔ bló baptɛm nú mɛ gbɔn é nɛ. È nɔ nylɔ́ mɛ ɔ dó sìn mɛ, enɛ gudo ɔ, è nɔ ɖè é tɔ́n. È nɔ ylɔ Jaan ɖɔ Jaan Baptɛmublonumɛtɔ́ ɔ, ɖó é wɛ nɔ bló baptɛm nú mɛ lɛ. Amɔ̌, aniwu é ka bló baptɛm nú Jezu?
Jezu wɛ wá gɔ̌n tɔn, bo ɖɔ é ni bló baptɛm nú emi. Jaan nɔ bló baptɛm nú mɛ e jló na ɖexlɛ́ ɖɔ nǔ nyanya e emi wà lɛ é vɛ́ nú emi lɛ é. Amɔ̌, Jezu ɔ ka wà nǔ nyanya ɖé kpɔ́n, bɔ é na vɛ́ n’i wɛ à? Gbeɖé kpɔ́n. Jezu ɔ, Vǐ Mawu tɔn jiji wɛ n’i, bo gosin jixwé. Nǔ ɖevo wu wɛ é ɖɔ Jaan ni bló baptɛm nú emi. Mi nú mǐ ni ba dò nú nǔ e wu wɛ é.
Jezu ko nyí Atínkpatɔ́, cobo wá Jaan gɔ́n. Mɛ e nɔ zé atín dó bló tavo, zinkpo kpo nǔ ɖevo lɛ kpo na é wɛ è nɔ ylɔ ɖɔ atínkpatɔ́. Mali sín asú Jozɛfu ɔ, atínkpatɔ́ wɛ n’i, bɔ Jezu kplɔ́n azɔ̌ ɖò gɔ̌n tɔn. Amɔ̌, Jehovah sɛ́ Vǐ tɔn dó ayikúngban jí, bonu é na nyí atínkpatɔ́ ǎ. É ɖó azɔ̌ taji ɖé bo na zɔ́n ɛ. Hwe ɔ nu sù, bɔ Jezu na jɛ azɔ̌ enɛ ɔ wà jí. Enɛ wu ɔ, bo na dó ɖexlɛ́ ɖɔ emi wá bo na wà jlǒ Tɔ́ emitɔn tɔn ɔ, Jezu ɖɔ nú Jaan ɖɔ é ni bló baptɛm nú emi. Nǔ enɛ ka nyɔ́ Mawu nukún mɛ à?
Ɛɛn, ɖó ee Jezu tɔ́n sín sìn ɔ mɛ é ɔ, è sè gbè ɖé sín jixwé, bɔ é ɖɔ: ‘Vǐ ce vívɛ́ná ɖíe, xomɛ nɔ hun mì dó wutu tɔn tawun.’ Jinukúnsin lɔmɔ̌ hun, bɔ ahwannɛ́ enɛ wá ɖó jɛ Jezu ta. Amɔ̌, ahwannɛ́ nùjɔnǔ tɔn wɛ ǎ. Gbigbɔ mímɛ́ Mawu tɔn wɛ cí ahwannɛ́ ɔ ɖɔhun.
Jezu ɖó na lin tamɛ dó nǔ gègě jí. Enɛ wu ɔ, é yì nɔ gbetótló mɛ nú azǎn 40. Sataan wá xwetɔ́n. É tɛnkpɔn azɔn atɔn, bonu Jezu na gbà sɛ́n Jehovah tɔn lɛ. Loɔ, Jezu ka wà mɔ̌ ǎ.
Enɛ gudo ɔ, Jezu lɛkɔ sín gbetótló ɔ mɛ, bo wá xò gò sunnu ɖé lɛ, bɔ ye wá huzu ahwanvu alǒ deví tɔn nukɔntɔn lɛ. Mɛɖé lɛ nɔ nyí Andle, Piyɛɛ (ee è nɔ lɛ́ ylɔ ɖɔ Sinmɔɔ é), Filipu kpo Natanayɛli (ee è nɔ lɛ́ ylɔ ɖɔ Batelemi é) kpo. Jezu kpo ahwanvu tɔn yɔyɔ̌ enɛ lɛ kpo yì tokpɔn Galilee tɔn mɛ. Ee ye jɛ Galilee é ɔ, ye nɔte ɖò Kanaa. Natanayɛli sín toxo mɛ wɛ nyí Kanaa ɔ. Jezu yì alɔwliwli sín agɔ̌ ɖaxó ɖé tɛnmɛ, bo bló nùjiwǔ tɔn nukɔntɔn ɔ ɖò finɛ. A ka tuùn nùjiwǔ e wɛ é à? É sɔ́ sìn dó huzu vɛɛn.
Matie 3:13-17; 4:1-11; 13:55; Maki 6:3; Jaan 1:29-51; 2:1-12.