TÀN 89
É Nya Nǔsatɔ́ lɛ Sín Tɛmpli Mɛ
JEZU ɖò xomɛsin jí ɖò finɛ, kabǐ? A ka tuùn nǔ e wu é ɖò xomɛsin jí sɔmɔ̌ é à? Sunnu enɛ lɛ e ɖò tɛmpli Mawu tɔn mɛ ɖò Jeluzalɛmu é nyí mɛxoɖutɔ́ wu wɛ. Ye ɖò biba na sɔ́ mɛ e nɔ wá sɛ̀n Mawu ɖò finɛ lɛ é dó jɛ dɔkun wɛ.
A ka mɔ nyibu’sú winnyawinnya, lɛngbɔ̌ kpo ahwannɛ́ e ɖò finɛ lɛ é kpo à? Ye ɖò kanlin enɛ lɛ sà wɛ ɖò tɛmpli ɔ mɛ. A ka tuùn nǔ e wu wɛ é à? Izlayɛli-ví lɛ nɔ ɖó hudo kanlin kpo xɛ e ye na sɔ́ dó savɔ̌ nú Mawu na lɛ é kpo tɔn wu wɛ.
Sɛ́n Mawu tɔn ɖɔ ɖɔ enyi Izlayɛli-ví ɖé wà nǔ nyì dò ɔ, é ɖó na savɔ̌ nú Mawu. Izlayɛli-ví lɛ nɔ lɛ́ savɔ̌ ɖó hwɛjijɔ ɖevo lɛ wu. Amɔ̌, fitɛ ye ka nɔ mɔ kanlin kpo xɛ lɛ kpo ɖè dó savɔ̌ nú Mawu?
Izlayɛli-ví ɖé lɛ ɖó kanlin kpo xɛ yeɖesunɔ tɔn lɛ kpo, bo hɛn ɔ ye na sɔ́ dó savɔ̌. Amɔ̌, Izlayɛli-ví gègě ɖè bo ɖó kanlin alǒ xɛ ɖě ǎ. Mɛ ɖevo lɛ ɖè, bɔ xwé yetɔn lín dó Jeluzalɛmu tawun, bɔ ye sixu hɛn kanlin yetɔn lɛ ɖebǔ wá tɛmpli ɔ mɛ ǎ. Enɛ wu ɔ, ye nɔ wá xɔ kanlin alǒ xɛ e sín hudo ye ɖó lɛ é ɖò finɛ. Amɔ̌, sunnu enɛ lɛ nɔ sà axivɛ́nú tɔn nú ye. Ye nɔ tafú mɛ lɛ. Gɔ́ nú enɛ ɔ, ye ɖó na sà nǔ ɖò tɛmpli Mawu tɔn mɛ ǎ.
Nǔ e sìn xomɛ nú Jezu é nɛ. Enɛ wu ɔ, é flí tavo akwɛɖyɔtɔ́ lɛ tɔn, bo fúnfún akwɛ yetɔn bǐ. É lɛ́ sɔ́ kàn dó bló bǎ na, bo nya kanlin lɛ bǐ sín tɛmpli ɔ mɛ. É ɖɔ nú ahwannɛ́satɔ́ lɛ ɖɔ: ‘Mi bɛ́ nǔ mitɔn lɛ bo tɔ́n sín fí! Mi ma zé Tɔ́ ce sín xwé dó huzu ajɔxwé na ó.’
Ahwanvu Jezu tɔn ɖé lɛ kpo é kpo ɖò tɛmpli ɔ mɛ ɖò Jeluzalɛmu. Nǔ e wà wɛ Jezu ɖè é kpaca ye. Bɔ ye flín xó elɔ e Biblu ɖɔ dó Vǐ Mawu tɔn wu é: ‘Wanyiyi nú xwé Mawu tɔn na jì zo ɖò lanmɛ n’i myɔ ɖɔhun.’
Hwenu e Jezu ɖò Jeluzalɛmu, bo ɖò te kpɔ́n Dindinwayi-xwè é ɔ, é bló nùjiwǔ gègě. Enɛ gudo ɔ, Jezu yì Judee, lobo lɛkɔ ɖido Galilee. Amɔ̌, ee é ɖò yìyì wɛ é ɔ, é gbɔn tokpɔn Samalii tɔn mɛ. Mi nú mǐ ni kpɔ́n nǔ e jɛ ɖò finɛ é.