TÀN 90
Jezu kpo Nyɔnu Ðé kpo Ðò Dotɔ̀ Ðé Kɔn
JEZU nɔte ɖò tɔ̀ ɖé tó ɖò Samalii bo na gbɔjɛ. Ahwanvu tɔn lɛ yì nùɖuɖu xɔ gbé ɖò toxo mɛ. Nyɔnu e ɖɔ xó xá wɛ Jezu ɖè é wá sìn dun gbé. É ɖɔ nú nyɔnu ɔ ɖɔ: ‘Na sìn mì ma nu.’
Xó enɛ kpaca nyɔnu ɔ tawun. A ka tuùn nǔ e wu wɛ é à? Jezu nyí Jwifu, bɔ éyɛ ka nyí Samaliinu wu wɛ. Jwifu lɛ nɔ yí wǎn nú Samaliinu lɛ ǎ. Ye nɔ ɖɔ xó xá ye vɔ́vɔ́ ǎ! Amɔ̌, Jezu yí wǎn nú gbɛtɔ́ alɔkpa lɛ bǐ. Enɛ wu ɔ, é ɖɔ: ‘Enyi a ko tuùn mɛ e ɖɔ nú we ɖɔ: na mì sìn ma nu é wɛ ɔ, hwiɖesu wɛ na ko byɔ sìn mì, bɔ un na ko na sìn e nɔ na gbɛ̀ mɛ é we.’
Nyɔnu ɔ ɖɔ: ‘Mɛɖaxo, a ma ka ɖó nùɖé bo na dó dun sìn ɔ na nɛ, tɔ̀ ɔ ka lɛ́ gɔ́ngɔ́n. Fitɛ a ka na ba sìn e nɔ na gbɛ̀ mɛ é sín?’
Jezu tinmɛ n’i ɖɔ: ‘Enyi a nu sìn elɔ ɔ, kɔ na lɛ́ xú we. Amɔ̌, mɛ e ka na nu sìn e nyɛ na na ɛ é hɛn ɔ, é na nɔ gbɛ̀ kaka sɔyi.’
Nyɔnu ɔ ɖɔ: ‘Mɛɖaxo, kɛnklɛn bo na sìn enɛ mì! Enɛ ɔ, kɔ sɔ́ na xú mì gbeɖé, bonu un na lɛ́ tɔ́n sìn gbé wá fí ǎ.’
Nyɔnu ɔ vɛdo sìn jɔ sìn xó ɖɔ wɛ Jezu ɖè sín. Amɔ̌, nugbǒ e ɖɔ xó dó Mawu kpo axɔsuɖuto tɔn kpo wu é sín xó ɖɔ wɛ Jezu ɖè. Nugbǒ enɛ cí sìn e nɔ na gbɛ̀ mɛ é ɖɔhun. É hɛn ɔ, é na na gbɛ̀ mavɔmavɔ mɛ.
Jezu ɖɔ nú nyɔnu ɔ ɖɔ: ‘Yì ylɔ asú towe bo wá.’
Nyɔnu ɔ ka ɖɔ: ‘Un ma ɖó asú nɛ.’
Jezu ɖɔ: ‘Xó nugbǒ wɛ a ɖɔ. Amɔ̌, asú atɔ́ɔ́n wɛ a ko da wá yì, bɔ mɛ e kpo hwi kpo ɖò kpɔ́ dìn é lɔ ka nyí asú towe ǎ.’
É kpaca nyɔnu ɔ ɖesu, ɖó xó enɛ lɛ bǐ wɛ nyí nugbǒ. Nɛ̌ Jezu ka tuùn nǔ enɛ lɛ gbɔn? Jezu wɛ nyí Mɛ e sín Akpá Mawu dó bo ɖɔ emi na sɛ́dó é wu wɛ. Mawu wɛ ka ɖɔ nǔ enɛ lɛ n’i. Xó enɛ lɛ ɖɔ wɛ ye ɖè kɛɖɛ, bɔ ahwanvu Jezu tɔn lɛ lɛkɔ wá. Ee ye mɔ Jezu ɖò xó ɖɔ kpo nyɔnu Samaliinu ɔ kpo wɛ é ɔ, é kpaca ye.
Etɛ tàn elɔ ka kplɔ́n mǐ? É ɖexlɛ́ ɖɔ Jezu nɔ nyɔ́ xomɛ dó akɔ lɛ bǐ wu. Mǐ lɔmɔ̌ ɖó na wà mɔ̌. Mǐ ɖó na nɔ lin ɖɔ mɛɖé lɛ baɖa, ɖó ye nyí akɔ ɖevo wutu ǎ. Jezu jló ɖɔ mɛ bǐ ni tuùn nugbǒ e nɔ kplá mɛ yì gbɛ̀ mavɔmavɔ mɛ é. Mǐ lɔmɔ̌ ɖó na d’alɔ gbɛtɔ́ lɛ, bɔ ye na tuùn nugbǒ ɔ.