TÀN 92
Jezu Fɔ́n Mɛ Sín Kú
ÐYƆVIVU e mɔ wɛ a ɖè ɖò finɛ é ko ɖó xwè 12. Jezu wɛ hɛn alɔ tɔn, nɔ tɔn kpo tɔ́ tɔn kpo nɛ ɖò te ɖò akpá tɔn nɛ. A ka tuùn nǔ e wu xomɛ hun ye sɔmɔ̌ é à? Mi nú mǐ ni ba dò na.
Tɔ́ tɔn nɔ nyí Jayilusu, bo nyí mɛ nukúnɖeji ɖé. Ðyɔvivu tɔn bɛ́ azɔn gbè ɖokpo, bɔ è sɔ́ ɛ mlɔ́ ayǐ. Azɔn ɔ ka ɖò te kpɔ́n n’i wɛ ǎ. É nyɔ́ wà ɔ, é fɔ́n bo ɖò syɛnsyɛn d’eji wɛ. Ado jɛ Jayilusu kpo asì tɔn kpo hu jí, ɖó ye mɔ ɖɔ vǐ emitɔn ɖò kúdónú. Vǐ nyɔnu ɖokpo géé e ye ɖó é nɛ. Jayilusu ka ko sè xó dó nùjiwǔ e Jezu bló lɛ é wu. Enɛ wu ɔ, é ɖido Jezu ba gbé.
Ee Jayilusu mɔ Jezu é ɔ, mɛ e lɛlɛ̌ dó é lɛ é sukpɔ́ kaka. Amɔ̌, Jayilusu ba tɛn gbɔn mɛ lɛ mɛ, bo yì jɛkpo ɖò Jezu nukɔn. É savo nú Jezu, bo ɖɔ: ‘Vǐ ce ɖò azɔn jɛ wɛ tawun. Kɛnklɛn bo wá gbɔ azɔn n’i.’ Jezu ɖɔ n’i ɖɔ emi na wá.
Ee ye ɖò yìyì wɛ é ɔ, mɛ e lɛlɛ̌ dó Jezu lɛ é ɖò fyɔnfyɔn ɛ wɛ gbɔn fí bǐ. Jezu nɔte ajijimɛ, bo kanbyɔ ɖɔ: ‘Mɛ̌ ka ɖó alɔ wǔ ce?’ Jezu mɔ ɖò lanmɛ ɖɔ hlɔnhlɔn ɖé tɔ́n sín emi wu. Enɛ wu ɔ, é tuùn ɖɔ mɛɖé ɖó alɔ emi wu. Mɛ̌ ka wɛ? Nawe ɖé wɛ bo ɖò azɔn jɛ wɛ tawun, bɔ é ko bló xwè 12. É wá bo ɖó alɔ awu Jezu tɔn wu, bɔ azɔn tɔn gbɔ!
Nǔ enɛ zɔ́n bɔ ayi Jayilusu tɔn j’ayǐ, ɖó é mɔ ɖɔ azɔn gbɔ nú mɛ kún vɛwǔ ɖebǔ nú Jezu ó. Amɔ̌, mɛɖé gosin Jayilusu xwé bo wá ɖɔ n’i ɖɔ: ‘Ma sɔ́ dó tagba nú Jezu ó. Vǐ towe ko kú.’ Jezu sè xó enɛ, bo ɖɔ nú Jayilusu ɖɔ: ‘Ma ɖi xɛsi ó, vǐ towe na gán.’
Ee ye wá Jayilusu xwé é ɔ, mɛ lɛ bǐ ɖò avǐ ya wɛ, bo ɖò alě na wɛ. Amɔ̌, Jezu ɖɔ nú ye ɖɔ: ‘Mi ma ya avǐ ó. Vǐ ɔ kú ǎ. Amlɔ dɔ wɛ é ɖè.’ Loɔ, ye jɛ Jezu cá ko jí, ɖó ye tuùn ɖɔ vǐ ɔ ko kú.
Jezu kplá vǐ-tɔ́ ɔ, vǐ-nɔ ɔ kpo mɛsɛ́dó tɔn atɔn kpo, bɔ ye byɔ xɔ e mɛ vǐ ɔ ɖò ayimimlɔ ɖè é. É hɛn vǐ ɔ sín alɔ, bo ɖɔ: ‘Site!’ Bɔ vǐ ɔ fɔ́n, lee mɔ gbɔn wɛ a ɖè ɖò ɖiɖe ɔ mɛ é. É site, bo jɛ zɔnlin ɖi jí! Nǔ e zɔ́n, bɔ tɔ́ tɔn kpo nɔ tɔn kpo ɖò awǎjijɛ mɛ sɔmɔ̌ é nɛ.
Mɛ nukɔntɔn e Jezu fɔ́n sín kú é nɛ ǎ. Mɛ nukɔntɔn e xó Biblu ɖɔ é wɛ nyí vǐ sunnu asúkúsi ɖé tɔn, bɔ é nɔ nɔ toxo Nayini tɔn mɛ. Gudo mɛ ɔ, Jezu fɔ́n Mali kpo Mata kpo sín nɔví Lazaa sín kú. É na lɛ́ fɔ́n mɛ gègě sín kú ɖò axɔsuɖuɖu tɔn sín hwenu. Xomɛ ɖó na hun mǐ à cé?
Luka 8:40-56; 7:11-17; Jaan 11:17-44.