TÀN 93
Jezu Na Nùɖuɖu Mɛ Gègě
NǓ BAÐABAÐA ɖé jɛ. È hu Jaan Baptɛmublonumɛtɔ́ ɔ. Axɔsu ɔ sín asì Elodiadi wɛ gbɛ́ wǎn n’i, bo zɔ́n axɔsu ɔ bɔ è gbò ta tɔn.
Ee Jezu sè mɔ̌ é ɔ, wǔ kú i tawun. É ɖido zɔ fí e mɛɖé ma na mɔ ɛ ɖè ǎ é. Amɔ̌, gbɛtɔ́ lɛ nyì ahwan jɛ gudo tɔn. Ee Jezu mɔ ye é ɔ, nǔ yetɔn blawu n’i. Enɛ wu ɔ, é ɖɔ xó nú ye dó axɔsuɖuto Mawu tɔn wu, bo lɛ́ gbɔ azɔn nú azinzɔnnɔ e ɖò ye mɛ lɛ é.
Gbadanu sù é ɔ, ahwanvu tɔn lɛ wá gɔ̌n tɔn, bo ɖɔ: ‘Fí e mǐ ɖè é ya dó toxo ɖebǔ ǎ, zǎn ɖíe ka ko ɖò kúkú wɛ é. Nyì mɛ lɛ, bonu ye na yì ba nùɖé xɔ ɖu ɖò gletoxo e sɛya fí lɛ é mɛ.’
Jezu ka yí gbè nú ye ɖɔ: ‘Ye ɖó na yì gbɔn mɔ̌ ǎ. Miɖesunɔ ni na nùɖuɖu ye.’ Jezu lilɛ kpannukɔn Filipu, bo kanbyɔ ɛ ɖɔ: ‘Fitɛ mǐ ka na mɔ nùɖuɖu xɔ ɖè, bɔ é na kpé mɛ elɔ lɛ bǐ?’
Filipu ka yí gbè n’i ɖɔ: ‘Cobonu è na xɔ nùɖuɖu, bɔ ye bǐ na mɔ kpɛɖé kpɛɖé ɔ, è na zán akwɛ tawun.’ Andle ka yí xó bo ɖɔ: ‘Nyaví ɖé ɖò fí, bo hɛn wɔxúxú atɔ́ɔ́n kpo hweví wè kpo. Amɔ̌, é ka sixu jɛ fí ɖebǔ nú mɛ tobutobu elɔ lɛ ǎ.’
Jezu ɖɔ: ‘Mi ɖɔ nú mɛ lɛ, bonu ye ni junjɔn gbehan lɛ jí.’ Enɛ gudo ɔ, é xoɖɛ sɛ́dó Mawu dó nùɖuɖu ɔ jí, lobo má ɛ ɖó yɔywɛ. Ahwanvu tɔn lɛ má wɔxúxú lɛ kpo hweví lɛ kpo nú mɛ lɛ bǐ. Ye bǐ bló sunnu 5 000, gɔ́ nú nyɔnu kpo yɔkpɔvu afatɔ́ɔ́n mɔkpan kpo. Ye bǐ ɖu nǔ, bo gɔ́xò. Ahwanvu Jezu tɔn lɛ bɛ́ nǔ e ye ɖu kpò lɛ é kplé, bɔ xasun 12 gɔ́.
Jezu wá ɖɔ nú ahwanvu tɔn lɛ ɖɔ ye ni byɔ tɔjihun mɛ, bo ɖido Xù Galilee tɔn sín agě ɖě ɔ jí. Zǎn enɛ mɛ ɔ, jɔhɔn ɖaxó ɖé jɛ nyinyi jí, bɔ aslɔkɛ́ lɛ nɔ xó dó tɔjihun ɔ wu kpo adǎn kpo. Ahwanvu lɛ bǐ sín ayi gbado. Ee zǎn vlɔ ɖó wè é ɔ, ye mɔ mɛɖé, bɔ é ɖò zɔnlin ɖi wɛ gbɔn tɔ̀ ɔ jí, bo ja gɔ̌n yetɔn. Xɛsi jɛ ye jí, bɔ ye súxó, ɖó ye tuùn nǔ e mɔ wɛ ye ɖè é ǎ.
Jezu ɖɔ nú ye ɖɔ: ‘Nyɛ wɛ, mi ma ɖi xɛsi ó.’ Loɔ, ye ɖi ǎ. Enɛ wu ɔ, Piyɛɛ ɖɔ: ‘Aklunɔ, enyi hwi jɛn wɛ nugbǒ hǔn, bo ɖegbe nú ma ɖi zɔnlin gbɔn tɔ̀ ɔ jí wá kpé we.’ Jezu ɖɔ n’i ɖɔ: ‘Wǎ!’ Piyɛɛ jɛte, bo ɖi zɔnlin gbɔn tɔ̀ ɔ jí! Loɔ, xɛsi jɛ jǐ tɔn, bɔ é jɛ dò yì jí. Amɔ̌, Jezu hwlɛn ɛ.
Jezu lɛ́vɔ na nùɖuɖu gbɛtɔ́ afatɔ́ɔ́n mɔkpan hwe ɖevo nu. Wɔxúxú tɛnwe kpo hweví kpɛví kpɛví kpɛɖé kpo wɛ é dó na nùɖuɖu ye, bɔ ye bǐ ɖu nǔ bo gɔ́xò. Lee Jezu kpé nukún dó gbɛtɔ́ lɛ wu gbɔn é jiwǔ à cé? Axɔsuɖuɖu tɔn hwenu ɔ, mǐ na jɛ nǔ ɖebǔ dò kpɔ́n gbeɖé ǎ.
Matie 14:1-32; 15:29-38; Jaan 6:1-21.