TÀN 94
Jezu Yí Wǎn nú Vǐ Kpɛví Lɛ
KPƆ́N Jezu ɖò ɖiɖe ɔ mɛ. É dɔn nyaví kpɛví ɖé dó awa mɛ. A sixu ɖɔ ɖɔ Jezu keya nú vǐ kpɛví lɛ nugbǒ. Mɛsɛ́dó tɔn lɛ wɛ ɖò kpinkpɔn ɛ wɛ. Etɛ ɖɔ nú ye wɛ Jezu ka ɖè? Mǐ ni ba dò na.
Tò línlín ɖé mɛ wɛ Jezu kpo mɛsɛ́dó tɔn lɛ kpo gosin tlolo. Mɛsɛ́dó lɛ ko dɔn nǔ ɖò yeɖee tɛntin ɖò ali jí. Enɛ wu ɔ, ee ye wá xwégbe é ɔ, Jezu kanbyɔ ye ɖɔ: ‘Ani dɔn wɛ mi ka ɖè ɖò ali jí?’ Jezu tuùn nǔ e dɔn wɛ ye ɖè é ganji. Amɔ̌, é kanbyɔ mɛsɛ́dó lɛ bo kpɔ́n ɖɔ ye ka na ɖɔ n’i à jí.
Mɛsɛ́dó lɛ ɖě kɛ nu ǎ, ɖó mɛ e hugǎn mɛ bǐ ɖò ye mɛ é sín nǔ dɔn wɛ ye ɖè ɖò ali jí. Mɛsɛ́dó ɖé lɛ ba bo na nyí mɛ nukúnɖeji hú mɛ é kpò lɛ é. Jezu tinmɛ nú ye ɖɔ jijɔ mɔhun kún sɔgbe ó. Nɛ̌ é ka bló mɔ̌ gbɔn?
É ylɔ nyaví kpɛví ɖé bo sɔ́ ɛ ɖó te ɖò nukɔn ye bǐ tɔn. Enɛ gudo ɔ, é ɖɔ nú ahwanvu tɔn lɛ ɖɔ: ‘Un jló ɖɔ mi ni tuùn nugbǒ elɔ: enyi mi ma huzu jijɔ bo cí yɔkpɔvu lɛ ɖɔhun ǎ ɔ, mi na byɔ axɔsuɖuto Mawu tɔn mɛ gbeɖé ǎ. Mɛ e hugǎn mɛ bǐ ɖò axɔsuɖuto ɔ mɛ é wɛ nyí mɛ e cí yɔkpɔvu elɔ ɖɔhun é.’ A ka tuùn nǔ e wu Jezu ɖɔ mɔ̌ é à?
Vǐ kpɛví lɛ nyí mɛ nukúnɖeji hú mɛ ɖevo lɛ kpo ye gbɔ kpo nɔ ɖɔ nùɖé nú ye ǎ. Enɛ wu ɔ, mɛsɛ́dó lɛ ɖó na kplɔ́n bo na cí vǐ kpɛví lɛ ɖɔhun, bo ɖó na nɔ ɖò mɛ e na nyí mɛ nukúnɖeji é sín adɔn dɔn wɛ ǎ.
Azɔn gègě wɛ Jezu ɖè lee é yí wǎn nú vǐ kpɛví lɛ sɔ́ é xlɛ́. Sun yɔywɛ ɖé gudo ɔ, mɛɖé lɛ kplá vǐ yetɔn lɛ wá nú Jezu. Mɛsɛ́dó lɛ ka tɛnkpɔn bo na sú ali dó ye. Loɔ Jezu ɖɔ nú mɛsɛ́dó tɔn lɛ ɖɔ: ‘Mi jó vǐ kpɛví lɛ dó nú ye ni wá gɔ̌n ce; mi ma sú ali dó ye ó, ɖó axɔsuɖuto Mawu tɔn ɔ, mɛ e cí ye ɖɔhun lɛ é tɔn wɛ.’ Ee é ɖɔ mɔ̌ é ɔ, é dɔn vǐ lɛ dó awa mɛ bo xoɖɛ dó ye jí. Mǐ kplɔ́n ɖɔ Jezu yí wǎn nú vǐ kpɛví lɛ. Nǔ enɛ ka hun xomɛ nú we à cé?
Matie 18:1-4; 19:13-15; Maki 9:33-37; 10:13-16.