TÀN 99
Nùɖuɖu Taji Ðé
NYƆNUZÁNGBE zǎnmɛ wɛ Jezu kpo mɛsɛ́dó tɔn 12 lɛ kpo wá Dindinwayi-xwè sín nùɖuɖu ɖu gbé, ɖò síngbó ɖé jí ɖò xɔ ɖaxó enɛ mɛ. Juda Isikaliɔti wɛ ɖò xɔ ɔ mɛ tɔ́n sín wɛ. Lee vɔsanúxwlémawutɔ́ lɛ na wlí Jezu gbɔn é ɖɔ nú ye gbé wɛ é xwè.
Nǔwiwa enɛ kpò sɔ é ɔ, Juda yì kanbyɔ ye ɖɔ: ‘Enyi un d’alɔ mi bonu mi wlí Jezu ɔ, etɛ mi ka na na mì?’ Ye ɖɔ: ‘Gankwɛ gban.’ Enɛ wu ɔ, Juda xwè ye kplá wá fí e Jezu ɖè é gbé. Nǔ baɖabaɖa nɛ à cé?
Ee ye ɖu Dindinwayi-xwè ɔ fó é ɔ, Jezu ɖó nùɖuɖu taji ɖé ayǐ. É dlɛn wɔxúxú dó mɛsɛ́dó tɔn lɛ, bo ɖɔ: ‘Mi yí bo ɖu, ɖó elɔ nɔte nú agbaza ce e na na mi wɛ è ɖè é.’ Enɛ gudo ɔ, é dlɛn vɛɛn kɔfu ɖokpo dó ye, bo ɖɔ: ‘Mi yí bo nu, ɖó elɔ nɔte nú hun ce e na kɔn nyì ayǐ dó ta mitɔn mɛ é.’ Biblu ylɔ nùɖuɖu enɛ ɖɔ ‘nùɖuɖu Aklunɔ tɔn.’
Izlayɛli-ví lɛ nɔ ɖu Dindinwayi-xwè dó flín hwenu e wɛnsagun Mawu tɔn ‘dín gbɔn’ xwé yetɔn lɛ ta nu ɖò Ejipu, bo hu nukɔn-ví Ejipunu lɛ tɔn lɛ é. Amɔ̌ dìn ɔ, Jezu jló ɖɔ ahwanvu emitɔn lɛ ni nɔ flín emi, bo nɔ lɛ́ flín lee emi sɔ́ gbɛ̀ emitɔn jó dó ta yetɔn mɛ gbɔn é. Nǔ e wu é ɖɔ nú ye ɖɔ ye ni nɔ bló nǔwiwa taji enɛ xwewu xwewu é nɛ.
Ee ye ɖu Nùɖuɖu Aklunɔ Tɔn ɔ fó é ɔ, Jezu ɖɔ nú mɛsɛ́dó tɔn lɛ ɖɔ ye ni kpàn akɔ́n bo lidǒ ɖò nùɖiɖi mɛ. Enɛ gudo ɔ, ye jihan dó kpa Mawu, bo tɔ́n sín finɛ. Zǎn sixu ko vlɔ ɖó wè wá yì. Mǐ ni kpɔ́n fí e ye yì é.
Matie 26:14-30; Luka 22:1-39; Jaan wemata 13 jɛ 17; 1 Kolɛntinu lɛ 11:20.