TÀN 100
Jezu Ðò Jikpá Jɛsemanɛ Tɔn Mɛ
EE JEZU kpo mɛsɛ́dó tɔn lɛ kpo tɔ́n sín xɔ ɔ mɛ é ɔ, ye ɖido jikpá Jɛsemanɛ tɔn mɛ. Ye ko ɖó aca bo nɔ yì finɛ ɖ’ayǐ. Jezu ɖɔ nú ye ɖɔ ye ni nɔ wunzɛn bo xoɖɛ. Éyɛ sɛyi nukɔn kpɛɖé bo xwè agbɔnnúsú dò, bo jɛ ɖɛ xò jí.
Enɛ gudo ɔ, Jezu lɛkɔ wá mɛsɛ́dó tɔn lɛ gɔ́n. Etɛ a ka lin ɖɔ ye na ko ɖò wiwa wɛ? Ye ɖò amlɔ dɔ wɛ! Azɔn atɔn wɛ Jezu ɖɔ nú ye ɖɔ ye ɖó na nɔ wunzɛn, amɔ̌, é lɛkɔ wá hweɖebǔnu ɔ, ye nɔ ɖò amlɔ dɔ wɛ. Azɔn gudo tɔn e Jezu lɛkɔ wá é ɔ, é ɖɔ nú ye ɖɔ: ‘Nɛ̌ mi ka na d’amlɔ hwe elɔ nu gbɔn? Gan ɔ ko xò, bɔ è na jó mì dó kɛntɔ́ ce lɛ sín alɔ mɛ.’
Hwenɛnu pɛ́ɛ́ ɔ, è jɛ zingidi mɛ gègě tɔn sè jí. Kpɔ́n, mɛ lɛ nɛ jǎwe kpo hwǐ kpo kpò kpo nɛ. Ye hɛn zohwin, bo dó ɖò nukúnnú mɔ na wɛ. Ee ye sɛkpɔ é ɔ, mɛ ɖokpo tɔ́n sín mɛ lɛ mɛ, bo yì Jezu gɔ́n tlɔlɔ. É kisi n’i, lee mɔ gbɔn wɛ a ɖè ɖò ɖiɖe ɔ mɛ é. Juda Isikaliɔti wɛ! Aniwu é ka kisi nú Jezu?
Jezu dɔ: ‘Juda, si wɛ a na ki nú mì, bo dó sà mì à?’ Juda ko na xlɛ̌ mɛ lɛ ɖɔ mɛ e emi na kisi na é wɛ ye na wlí. Enɛ wu ɔ, Jezu sín kɛntɔ́ lɛ zɔn jǐ tɔn bo wlí i. Amɔ̌, Piyɛɛ jló na xò hun dó Jezu tamɛ. Enɛ wu ɔ, é sún hwǐ e é hɛn é dó mɛ e sɛkpɔ ɛ é jí. Hwǐ ɔ xò ta nya ɔ tɔn kpò bo yí kpa tó tɔn. Amɔ̌, Jezu ɖ’alɔ tó nya ɔ tɔn wu, bɔ tó jɛ tó tɛnmɛ.
Jezu ɖɔ nú Piyɛɛ ɖɔ: ‘Sɔ́ hwǐ towe ɖò tɛn tɔn mɛ. A lin ɖɔ un hɛn ɔ na ɖɔ nú tɔ́ ce, bɔ é na sɛ́ wɛnsagun afatɔ́ɔ́n mɔkpan dó hwlɛn mì à cé?’ Jezu hɛn ɔ, é na wà mɔ̌ có é ka bló mɔ̌ ǎ, ɖó é tuùn ɖɔ hwenu ɔ ko sú bɔ kɛntɔ́ emitɔn lɛ na wlí emi. Enɛ wu ɔ, é tin bɔ ye kplá ɛ ɖido. Mǐ ni kpɔ́n nǔ e jɛ dó Jezu wu dìn é.
Matie 26:36-56; Luka 22:39-53; Jaan 18:1-12.